香港洋務工會(香港遊樂部) (已結業)

都係有啲姐姐派傳單先知，公司附近新開左間樓上飯堂，費時又要大排長龍等太興，就同同事上去試下好唔好食。環境算係企理，幾衛生，一定好過樓下馬路賣雙餸飯個檔，感覺比較污糟。當日有六款菜式，自選兩種，揀左馬蹄肉餅同炒菜心，分量唔少，女仔食叫少飯會合適啲，當日仲有個好似係大廚既人，猛咁叫盛餸啲姐姐夾多幾條菜，加左啲印象分。味道合理，正正常常，唔會過咸，有啲住家菜味道，肉餅幾好食，食得出有「揵」過，唔會太淋身有啲口感。湯都不過不失，味道偏淡，但起碼無味精，不過呢度得紙包飲品，如果有埋即沖咖啡奶茶仲好，夏天中午飲杯凍飲爽好多。最後都希望提一提餐廳可以轉用可清洗碗碟，堂食都用即棄膠盒，太浪費啦。