爆辣冷麵 (已搬遷) 新店位置

好耐冇食，呢排天氣熱返可以食返爆辣冷面。由bb辣訓練到食到小辣喇，佢哋嘅辣唔係一般咁簡單，確實係越食越上癮呀！帶定個飯袋嚟買外賣，發現啲蟹子同麵嘅比例差唔多1:1！本來諗住買一盒蟹子冷麵就算，但諗諗吓買多盒餸夜晚餐飯加料，呢盒咩都有啲（印象中有腸仔粟米蟹柳蟹子水魷墨丸豬大腸？）哈哈，新年懶正撈起，撈蟹子冷麵都差唔多啦。個味就正正常常，係中學年代食到嘅撈麵味，好似佢哋再多啲蒜味，都幾勁，食完個口會臭成日個隻（哈哈）記得要啪幾粒薄荷糖，如果唔係戴住口罩就辛苦自己喇！至於小辣，認真，我都係一個食得辣嘅人，小辣已經係好辣吓㗎喇，奉勸如果未食過想挑戰自己嘅朋友，唔好第一次就叫中辣呀！