灣仔冰室 (已結業)

喺灣仔開完個會都差唔多8點幾，攰到暈咁制，喺附近嘅茶餐廳醫完肚就快啲返屋企瞓，點知又俾我撞到間好嘢。首先大胃同事就叫咗半隻沙薑雞，茶餐廳啲雞通常都又乾又凍又冇味，心諗算啦都係求其食。點知上枱嘅時間大家都好驚喜，第一隻雞係熱嘅，肉質彈牙多汁，一啲都唔乾，質素可以同出名嘅酒樓媲美。另外個同事就叫咗個雞扒腸仔通粉，通粉同腸仔就唔特別講啦，因為都係差唔多，不過塊雞扒就要講吓，個味道好似去食泰式燒雞嘅味道咁，不過唔辣嘅，帶少少甜，有少少黃薑粉味，煎到啱啱好，冇雪味。我相信材料都係新鮮嘅。我就見到門口張叉燒煎蛋飯嘅相，影得唔錯所以就想試下。嚟到嘅時候嗰兩隻荷包蛋煎得好靚。叉燒都係用嘅梅頭肉做嘅，肉同埋脂肪比例都啱啱好，每一啖都食到油香，食落帶少少爽口，估唔到茶餐廳都食到個咁正嘅叉燒飯。之後再叫咗杯奶茶紅豆冰，奶茶味濃加埋紅豆一齊飲，好特別!味道都好夾，唔太甜，好似飲緊台式嘅奶茶咁，不過味道就係正宗港式奶茶。食到尾嘅時間跟餐仲可以加錢食埋個甜品，我就揀咗個好立克奶凍。奶凍上面係栗米甜脆脆，奶味就比較濃但係都食到有好立克嘅味，size都唔細㗎。估唔到間茶記可以做得咁好。下次可以再嚟幫襯。