太安樓車仔麵 (已結業)

難得放假唔使出街，當然要做乖仔陪阿媽食午餐啦。唔想食茶餐廳，燒味飯又無咩特別，突然腦海閃起車仔麵，但又唔記得佢開幾點，要做乖仔當然就親自落去睇睇啦。Yeah！開咗鋪即係有得食啦，即打俾阿媽問佢食咩啦，佢要油麵，要豬皮、豬大腸同豬紅，還記得阿媽鍾意食辣，特登叫佢加少少辣油刺激下；我就要瀨粉，要鳳爪、辣齋同牛肚。全程都無理會佢俾幾多餸。返到屋企當然即刻開餐，打開先發現佢個碗差點唔能夠裝滿三餸一麵。兩母子當然好溫馨咁交換餸一齊食啦。豬皮都幾爽口，最緊要係無毛！豬大腸算粗身，仲要有少許肥膏，正呀！本人唔食豬紅，但見佢都幾實淨，唔容易散；雖然只得兩隻鳳爪，但保證一定比酒樓的為大，並且軟硬度適中；D辣齋都幾大舊，又唔算好辣，剛好可以暖下個身；係牛肚差少少，切得太幼身，相比於鳳爪辣齋，立刻比下去！還要一提嘅係佢會自動先俾一條生菜，唔使係咁食肉！