餐廳吹歐陸風，好似去左小島海邊餐廳咁，職員用英文介紹menu。Brunch set有頭盤、主菜及飲品，每款都好多選擇。頭盤有4款，主菜都有18款。我哋叫左兩個set，另外再加左個extra bites item同甜品。
是日餐湯：老公叫揀左南瓜湯，南瓜味重，甜甜地，濃結適中，幾好。
炸黑松露蘑菇球：外面炸到好脆，咬落去軟軟。每口充滿黑松露忌廉蘑菇醬，味道好濃，真係好好食。
巴斯克甜椒煮蜆：蜆肉新鮮，大隻帶鮮甜味道。醬汁用左蕃茄做底汁，另外仲加左紅黃椒同洋蔥，甜甜地帶酸，開胃之選。
阿根廷安格斯肉眼牛排：叫左五成熟，牛扒肉質較軟，牛味濃，入口帶肉汁，旁邊黑松露紅酒汁調味好好，點埋佢仲好食，唔錯。伴菜有薯條，分量多，剛炸起，夠熱好味。
盲鰽魚海鮮鍋：魚肉質厚實，有口感。魚皮煎到金黃，裡面有青口同蜆做配菜，食材新鮮，仲有煎過嘅薯仔粒。整體海鮮味濃，我就幾鐘意。
榛子朱古力醬煎香蕉可麗餅：可麗餅即係法式烤餅，法國嘅傳統煎餅。餅皮濕潤帶蛋香，搽埋滿滿榛子朱古力醬，煎香蕉上面仲有層薄薄脆焦糖，整體好夾，食完好滿足。
飲品：叫左泡沫咖啡同鮮奶咖啡，咖啡味剛好，唔會過濃。鮮奶咖啡有拉花，仲可以用黎呃吓like添。
