中央飯店

营业中

休息中

重阳节long weekend ，专程嚟到深水埗中央饭店，感受旧式酒楼车水马龙嘅氛围，蒸气、叫喊同新闻报道共冶一炉，场内以中老年人为主，有一两枱游客，互不打扰，一种大隐隐于市嘅闲情逸致。蒸笼点心除咗日常选择，传统一啲仲有大包同鱼肚烧卖。阿姐都会推住煎酿三宝等嘅热气之选绕场。特别推荐鸡扎、鲜虾粉果同芋角，完美演绎大件夹抵食，份量十足，味道亦不差。至于蚝仔肉松汤饭，价钱亲民，用料的确大方，如果已经食咗点心，三至四人share都好足够。不过口味偏淡，未有特别记忆点，建议留力食点心。最后嗌咗酸甜炸软壳蟹，非常可惜嘅一道𩠌，软壳蟹新鲜炸好，理应香脆可口，但系未加温嘅酸甜酱好似一盘冷水，帮软壳蟹迅速降温，又热又冻嘅口感相当突兀。总括，中央饭店充满旧区情调，系一幅朴实无华嘅平民写照，点心表现豪迈大方，但𠮶日试嘅小菜就不尽人意，希望下次试佢嘅晚市会有更大惊喜。