616牛肉火鍋專門店 (已結業)

616一直係我想去既餐廳，自從喺深圳食過牛肉火鍋，就一直念念不忘，因為牛既不同部位都可以食到，真係要幾刁鑽有幾刁鑽！最近見到呢間新開既616，真係雙眼發光！《牛雜湯底 $68》牛雜單點要$48，但連湯只需要$68，條數點計都係$68抵啲！湯底內有好多牛雜，包括牛肚、牛肺，牛腸等等，食到最後一刻都仲有，而且湯底會越煲越有牛雜味，好啱鐘意食牛雜既朋友！《冰麻牛 $38》必食！超鐘意呢個麻辣小食！入面有牛肚、牛舌同青瓜，麻辣夠香又唔會太辣，配啤酒真係一流！我地食完忍唔住再點多一份！《招牌慢煮牛腩 $48》必食！牛腩只需要番熱就食得！牛腩經過十幾小時既慢煮變得好入味但肉質都仍然保持到一絲絲既口感。《金花趾 $68》金花趾好靚，明顯見到爽口既紋路，只要滾幾秒已經食得，口感爽口。《牛駝峰 $48》牛駝峰口感比較似肥牛，軟綿而帶肉汁,係抵食既！呢間確實係愛牛人士必食餐廳，價錢相宜而味道非常唔錯！