獎門自家烏冬 (已結業)

估唔到而家出街食碗烏冬都咁難。入到餐廳坐低，約5分鐘左右開始叫野食，隻手舉左3分鐘先有個男侍應(冇著制服，可能係經理), 拎住d 野食經過叫我等等，轉頭黎，但之後既3-5分鐘仍然見佢只係不停出菜，我再舉手跟住同朋友講左句仲未有人落單，又話轉頭。嗰位男侍應聽到，立即黎落單，我諗服務都唔係太差，可能因為唔夠人手太忙唔記得。點知等左15分鐘仲未有野食，跟住有位女侍應問我地叫左野食未？問我地叫左乜野。原來漏左單！我明明見住個男侍應落完單行埋部機度篤篤下入單，原來根本冇幫我地落單! 個女侍應仲問我之前係邊位幫我地落單，我就話係個男既，佢地就係度笑笑口講唔好意思。之後等左5-10分鐘d 野食仲未到… 問d 侍應就話整緊。吓…見人地d野食係咁出，坐我間離差唔多時間坐低既人都食完走。我地嗰張漏單就仲整緊。最後我地忍唔住拍枱走人。從女侍應奇怪既笑容, 相信嗰位男侍應並唔係第一次"漏單"。我地係因為肚餓而入去俾錢食野既客人，唔係為浪費時間去呆坐同俾侍應'娛樂'架。