麥奀雲吞麵世家 (嘉城大廈)

营业中

休息中

已經有一段時間冇幫襯過麥奀記，今日剛剛路過元朗教育路，發現佢開咗一間新舖，咁蹺又係午飯時間，於是同朋友一齊入去光顧。叫咗一個加大嘅雲吞麵，同埋一個牛筋撈麵。佢雲吞麵嘅份量一向都係偏細，所以叫個加大，一般嘅大雲吞麵應該有六粒雲吞，但係佢只係得食五粒。雲吞嘅湯欠缺大地魚同蝦頭嘅濃味，非常之寡，並唔合格。雲吞尚算可以，面的確係彈嘅，但係整體嚟講絕對唔可以叫做出色。牛筋撈麵就十分之差啦，首先佢嘅份量係小到我以為佢係將人哋食淨嘅俾我食。牛筋冇一條係完整嘅，全部都係碎濕濕，而麵亦都少得可憐。隔籬枱嘅顧客見到我碟撈麵都話有冇咁細碟啊！咁樣做生意實在係太離譜，唔怪得知而家咁多香港人都寧願上大陸食嘢，作為一間 “所謂”嘅米芝蓮食肆,收得貴冇人會怪你，但係食物嘅份量同質素咁差，就真係自作孽啦，祝佢好運！不過我就一定唔會再幫襯佢！