三多炸肶 (已結業)

岩岩買咗份炸脾餐，上網有做個research，認同部份食客所指辣粉太辣帶苦。輪候過程唔耐，約莫10分鐘，即叫即炸，好香。不過，爆檸真係好無謂，作為茶記凍檸茶fans，無啦啦係入面加爆珠，味道既唔係檸蜜又唔係檸茶，唔湯唔水，失望。至於主角: 炸脾，真係好香，垂涎三尺。呢種味道，就係細細個去操完游泳，餓到爆，聞到小食部傳來既炸脾味~~~ 今次加咗辣粉，好後悔! 明明話少少，份量仍然… 唔緊要，辣粉原來只灑一面。雖然，隻脾有竹籤吉住，不過仍然好貼心配埋個膠手套比你用。雞脾好香入味，仲有肉汁鎖住，但辣粉超越辣，岩岩仲要去完“唯一雲南米線”，而家反而比三多辣粉辣到仲要辣粉彈咗入眼，哇! 媽呀~~~ 個咀已經辣爆，隻眼仲要辣埋一份，好彩我出街有帶濕紙巾。頂，激辣! 隻眼醃咗10分鐘先無咁辣無標眼水，但個咀唇就… 含住粒冰都唔掂。辣到無心機再食…好後悔加辣，好後悔嗌爆檸。講真，睇得出門面裝修、餐牌設計、自創囗味，無疑想迎合年青人市場，不過我就中意還原基本步。。。凍檸茶、原味炸脾! 呢種至係香港風味!建議: 既然有手套提供，不妨提供埋濕紙巾，因為個隻脾札住個手套，搞到個手套有油又濕。