點心到 (廟街)

营业中

休息中

今晚同朋友出開佐敦，又唔想食咁熱氣嘅嘢，所以就諗住去食中式點心，於是就試咗呢一間，結果覺得好驚喜所以同大家分享吓～第一個想推介嘅係榴槤雪媚娘，價錢相宜但係超級足料一咬落去有大大啖嘅榴槤肉，好似食緊一舊榴槤，而且個皮夠薄同埋有彈性不過可能因為太受歡迎到咗六點幾就已經得返一個，最後唯有單買一個，如果想食就要早啲去啦。第二個係腸粉，呢個腸粉係裡面有炸金絲網，本來諗住係類似炸兩嘅感覺，不過驚喜嘅係原來裏面仲有蘿蔔絲，令到成個口感更加豐富蘿蔔絲同腸粉一樣都係軟糯既，而金絲網係脆嘅，成件事層次好豐富，而且腸粉亦都做得好滑，超好食。第三樣嘢係流心芋頭包，除咗有卡通可愛嘅造型，味道亦都相當唔錯，啱晒芋頭控而且呢一個點心喺其他餐廳係比較少見，所以值得一試。另外仲叫咗鳳爪同埋濃湯鮮竹卷，鮮蝦腐皮卷同埋兩隻蝦餃整體水準都非常之唔錯，好足料價錢亦都好相宜，環境都OK坐得舒服，絕對會再嚟幫襯，希望水準能夠保持。