景霖正宗四川麻辣米線 (已搬遷) 新店位置

相隔只有一日，又心郁郁想食米線。哈哈！今次得一個人食，所以索性外賣返公司慢慢歎，一來唔洗同人迫埋一張枱你眼望我眼咁食；二來自己響公司鐘意點食都得。我無論去親邊度食米線永遠都係叫同款，就係腐皮同竹笙，因為兩種料吸收咗啲湯味之後都好好味，但係今次我叫了炸醬、腐皮同酸菜。因為上次試咗炸醬簡直令我一試難忘，而唔叫竹笙係因為上次食果時份量唔多同大小不一，所以放棄了。今次試埋酸菜，但係我就覺得普通啦，唔係佢唔好食，而係本人好鐘意食酸嘢，呢度啲酸菜較甜所以唔係我鐘意果種，不過講起份量就真係勁多。可能上次冇太著重響個湯度，今次試清楚，真係好味，我叫少少辣，對我來說辣度剛好，好味。不過今次唔講味道喇，今次想講份量。一返到公司開咗碗米線，簡直令人感動。佢用車仔麵外賣果隻大碗裝住，個碗已經好大，一開發現頂晒閘，睇倒相就見，炸醬差不多舖滿整個碗面，下面再堆滿酸菜，我好不容易先夾倒米線出來，到我差唔多食晒啲米線時，已經９成飽，但係就發現仲有半碗未食，果半碗就係料囉，份量多到食極都食唔完，呢餐食得好滿足。本身食完之後諗，食到咁飽，一個星期都食咗兩次，都有一段時間可以唔食住，但係一打呢段食評，又心郁郁想再食，哈哈。