妹記海鮮

营业中

休息中

今晚同屋企人慶祝生日，佢朋友介紹去鯉魚門食，話仲抵過去西貢食海鮮喎！本身都驚中伏，話晒鯉魚門唔知會唔會俾人劏，但佢朋友話食過好多次，啲嘢大碟又好食，既然佢咁講，就不妨試一次啦。好耐未去過鯉魚門，由油塘地鐵站行落去，其實10分鐘就到。我哋直接去到妹記海鮮揀海鮮，之後老闆娘就搵人帶我哋去到龍騰海鮮酒家。先嚟豉油王煎蝦，啲蝦又肥又大隻，脆口又彈牙，真心要讚吓。姪仔本身唔鍾意食海鮮，都食咗七八隻。之後就上咗龍蝦米粉底，本身菜單係上湯焗龍蝦伊麵底，但係事頭婆話煎米粉底仲香口。好彩一上菜就影低張相，好快碟龍蝦就已經掃晒，個米粉吸晒龍蝦嘅精華真係好入味，要特別推介🤟🏻🤟🏻再嚟蒸鮑魚。未影得切相就俾人夾晒😓再有大班兩味、炒蟶子同蒜蓉粉絲蒸元貝。 碟碟都好有鑊氣，十分野味😋最後埋單每人5百幾，其實真係抵食過好多西餐同西貢。今次落嚟鯉魚門食海鮮徹底令我對鯉魚門改觀，下轉到我生日一定會嗌埋啲friends儲夠一圍落嚟食。