魔法雞排 (已結業)

前排睇到某某雜誌介紹紅磡新開左呢間炸雞排，筆者以前曾經係紅磡返工，知道呢頭有好多又平又抵食嘅人隠世小店，雖然好多年都冇再係呢一邊返工，但係都好懷念以前放工之後係呢一頭掃街嘅日子，事隔多年無來過，今日路過決心就嚟呢間鋪頭試一試。曾經有一間叫做「我愛台妹炸雞排」嘅鋪頭喺紅磡風雲一時，老闆娘係正宗台妹，靚女學歷高，佢嘅炸雞排仲好好味價錢又抵，有一排我差唔多個個禮拜都去食，可惜佢嘅鋪頭已經執咗笠囉。佢炸雞排嘅味道都一直忘不了。呢一間新開嘅炸雞排店老闆同樣來自台灣，但係老板唔係女人而係男人哈哈。佢哋嘅炸雞扒選擇多，我今次揀咗五香+多力滋+甘梅。即叫即炸，等左十分鐘左右，可以拎啦！哇！好好味呀，不止比豪大大好味之外，仲比曾經係我的最愛「台妹雞排」更加正！雖然＄30 一塊貴左小小但係食落口完全不會油！而且老闆在無客嘅時候主動清洗收銀枱面，廚房設備等等，令我對佢哋鋪頭嘅衛生情況更加加添信心，絕對有heart !依家出邊嘅鋪頭大部份都係連鎖店，小舖頭生存空間低，希望佢哋呢間小舖頭生意長做長有，生意興隆！