新樂茶餐廳

营业中

休息中

一間充滿人情味既懷舊茶餐廳，食物又有水準，真係好值得黎食。今次帶幾個朋友再黎食，食物水準仍舊無變，真係好正。今次同朋友黎食雞扒蔥油撈丁　—　雞扒又滑，撈丁又大份，朋友都大讚蔥油好香，麵身煮得岩岩好，又爽又滑。不過，個蔥油真係香到無得輸，香到無得頂。　叫左個咖哩豬扒飯，福建炒飯，同埋蕃茄雞翼福字麵。因為太好味，食哂先記起唔見得影相　＞＜咖哩豬扒飯：　咖哩又濃，撈飯一流，豬扒又淋又有肉汁。福建炒飯：飯炒得有鑊氣，飯又香，配料又新鮮，汁又唔會太稀。正！蕃茄雞翼福字麵：蕃茄湯底又香，雞翼好味，福字麵唔係周圍都有，童年的回憶同味道。如果唔係太飽，一定會叫炸雞脾，呢到既炸脾係生炸，外脆內爆汁。配埋港式薯條真係無得輸。老闆娘認得我，送左中湯俾我地飲。中湯真係無味精，好正！呢到果種人情味而家真係買少見少啦。老闆娘仲介紹我下次食椒鹽豬扒飯，佢話超正，好多人都會特別叫黎食。雖然呢間茶餐廳係比較上偏貴，但係你會ｆｅｅｌ到佢用料唔係用ｃｈｅａｐ野。同埋真係無味精！　唔會食完好口渴。佢既格局真係好愈來愈少有，令我記起以前會同屋企人一齊去茶餐廳食野，加上，老闆娘又好人，呢種感覺係其他連鎖式既餐廳唔會俾到。