Opa Mediterranean Bar and Bistro (已結業)

今日約咗朋友喺尖沙咀呢間Opa Mediterranean Bar and Bistro傾吓偈敘吓舊。原來呢度嘅Lunch Menu幾抵食。叫咗2個lunch set，Soup of the Day係蕃茄湯，店員會喺客人面前倒湯，蕃茄湯嘅味道比較酸，可以令人更加開胃。另外嘅地中海凱撒沙律配烤雞份量都唔少，上面仲灑上好多芝士碎，羅馬生菜爽口，烤雞都好嫩滑。另外有兩款頭盤，意式煙三文魚切片拌以沙律菜，不過煙三文魚就反客為主，味道就更加突出。另外嘅蕃茄紅莓意式烤麵包就相當有驚喜，烤多士上放上蕃茄粒、紅莓乾、芝士、香草等，再淋上黑醋汁，整體又香又脆。香煎紐西蘭西冷牛扒配濃牛肉燒汁嘅西冷牛扒都相當厚切，而且都有肉味。牛扒之下有蔬菜同薯蓉，薯蓉混入牛肉汁之後就更香更滑。另外嘅香草醬烤雞意粉帶有辣味，而烤雞更加係大大塊。最後甜品係西班牙油條，與其話係油條，不如話佢似港式嘅莎翁，外面沾有砂糖，旁邊就有朱古力醬同士多啤梨醬，配埋新鮮生果，味道唔錯。另外嘅香蕉麻糬都係一道特別嘅菜式，忌廉包住脆糖，上面再加入香蕉等生果，味道充滿特色，不過就相對較甜。