吞POT 雞煲火鍋.住家菜 (譽發廣場) (已結業)

因為疫情關係已經好耐冇食過雞煲，今日約左朋友出旺角行完街黎呢一間食飯。入到間餐廳，發現佢有一邊都係落地大玻璃，因為佢位於22樓，如果坐到窗邊位，一邊食雞煲一邊欣賞夜景都幾寫意。一坐低，服務員已經準備好兜熱水比我地洗餐具同自選邊爐醬料，而且態度慇懃，服務100分！雞煲選擇都幾多由於我地唔太食得辣，所以叫左個bb 辣既重慶麻辣雞煲試試。半隻雞2個人食岩岩好，雞肉算嫩，小小辣亦有麻香，味道不錯。不過食食下會愈來愈辣，如果挑戰中/大辣既朋友就要留意返喇。於是我地叫左枝啤酒，熱辣辣雞煲配凍冰冰啤酒，一個字：爽！食完雞煲就叫埋配料加湯打邊爐，見佢餐牌有啲自家製手打丸，餃同滑，就叫左個蟹子墨魚滑試試。個份量都算多，入口彈牙亦好重墨魚味，唔錯。最後加多個稻庭烏冬，烏冬掛埋個雞煲汁，飽肚又滿足！呢間無論食物，環境，服務都唔錯，有機會可以再黎。