小皇府 (惠安苑) (已結業)

今晚約咗朋友去鰂魚涌嘅小皇府食飯，第一次去，喺門外見到餐廳地方闊落，光線充足，感覺非常舒服。我哋嗌左一個二人餐，有燒味拼盤，切雞同埋叉燒，兩個沙參玉竹燉湯。仲可以嗌多一個小菜，我哋試咗鹹魚雜菌雞煲，我覺得好好味，雞肉嫩滑，鹹魚味送飯特別開胃。我哋再加咗個晚市孖寶，有金蒜茄子蒸龍躉球，我哋都好鍾意呢一道龍躉，好入味。孖寶嘅另一道菜係艇王湯浸菜苗，係一個清淡健康嘅襯托。聽講小皇府嘅點心唔錯，所以我哋叫咗一籠帶子魔鬼魚餃。我每一道菜都好滿意，而且我好鍾意餐廳乾淨企理，服務態度又好。值得再去。