紅城冰室

营业中

休息中

呢間餐廳已經成為咗我喺中環區嘅最愛茶餐廳之選。 今日係我今個星期食緊第三次， 但係前兩日都唔記得咗寫食評。每次嚟都係嗌佢嘅常餐丁， 麻辣雞米線。因為我好鍾意食辣, 第一次食嘅時候就覺得唔夠辣, 之後我每次都會同落單嘅人講話要辣d辣d辣d。其實佢哋個米線就冇話大中小辣嘅，而非常抵錫嘅係佢哋嘅落單系統係真係可以撳幾次辣啲。 而最最最抵錫嘅係無論同佢哋講要辣d, 米爽啲定係凍奶茶少甜， 廚房真係會做到畀你， 唔係其他嗰啲落完單就算。（ 食咗啲雞先記得影相, 分量本身有好多㗎）湯底雖然唔係好辣但係麻辣香味十足！ 而且唔係好多辣油， 雖然味道香濃但係唔會覺得好油膩。雞肉分量勁多！ 同米線嘅份量有1：3。 雞肉鮮甜爽口。佢哋個多士係酥皮既， 新鮮出爐熱辣辣勁香脆！如果唔特別轉嘅話佢哋主要跟餐係炒蛋， 炒蛋有啲蔥，炒得香滑， 但係我覺得好濟， 成個餐會食唔曬， 所以我會轉煎蛋。 而家煎蛋係好正嘅流心蛋黃。 唔會好似其他餐廳咁一係就煎到全熟，一係就連蛋白都未熟。唯一唔好嘅地方係佢餐廳分開兩層下面嗰層 嘅冷氣真係好唔夠， 飲開熱飲嘅我夏天嚟到都要叫返杯凍飲。