花宵 (已結業)

朋友都喺銅鑼灣返工，約我食lunch，平時多數食西餐，今日佢揀咗呢間日本餐廳。永光中心的晚上成日要排長龍坐lift，但lunch time 冇呢個問題。座位舒適，坐得舒服。Set lunch先來嘅係茶碗蒸同埋沙律。好欣賞茶碗蒸入面真係有銀杏、帶子、蝦等材料，係用心嘅製作。因為中醫叫我唔好食生冷野，所以我叫咗鰻魚飯，香濃多汁，大大件嘅鰻魚，條邊煎到有啲香脆，好味。最估唔到係加咗芝麻原來有畫龍點睛嘅效果，加埋d蛋絲，睇落靚好多，有心思。朋友對佢碗吞拿魚飯都係好評，係一間可以再幫襯嘅食店。午市都幾滿座，又見到有好幾枱客同店員有傾有講，有熟客就證明係一間好餐廳。