其實之前都黎過一次，覺得啲嘢都好有品質，今次再去，又睇下老友點發板。去到餐廳，侍應好快咁安排左個坐位俾我哋，好好彩，今次可以坐卡位。一坐低，即刻睇下個餐牌有啲咩食，有見到羊腩煲，不過老友應該係唔食羊嘅，所以冇叫到。因為係諗住share，所以我同老友都一人揀啲咁。
落單比較容易，因為枱邊已經有個鐘仔俾客人可以隨時襟叫人嚟take order。而餐廳嘅裝修都好ok同偏向中式風，同其他普通茶餐廳好唔同。
叫完嘢食唔駛五分鐘，啲嘢食都陸續黎啦！ 先黎嘅係欖油炒椰菜，同黑松露菜心，叫兩個菜係因為我同老友都係無飯家庭成員，平時少食菜，所以見到餐廳有菜叫都唔會走寶，先講個黑松露菜心，清甜同濃味兩種口味嘅結合，我本身都鍾意食黑松露，覺得用黎送麵好正，原來咁樣食都有另一番風味，而老友點嘅椰菜亦都好好味，佢係半西方人，佢話用欖油炒菜出面較少食到，所以一定要試試咁話。
之後上嘅有黃金炒蛋配多士，咸蛋加炒蛋，真係冇得彈，可惜冇叫白飯，至於多士，厚身，外脆內軟，用黎代替白飯送炒蛋食，一個字，掂!
濃味控嘅朋友除咗可以試吓黃金炒蛋之外，亦都可以試試依一個黑松露什菌伊麵，冇錯又係黑松露，哈！依種味係我至愛，成碟餸用左豉油汁炒，什菌同伊麵都吸哂松露同豉油嘅精華，我個人覺得比龍蝦伊麵更正，值得一試！
唔夠皮嘅話，可以好似我咁叫多個西班牙咖啡沙冰，超重咖啡味，爽! 而我老友就話好飽啦，所以佢叫左個玫瑰花茶俾自己，消吓滯咁話喎！
