📍紅磡民泰街29號德民大廈地下F4號舖
以下係一篇長文，如果覺得眼花又有興趣睇結論就飛到最尾啦。
最後一次幫襯已經係3-4年前嘅事，自從上年啟動左認真模式食拉麵之後，我一直都冇返轉頭，原因好簡單，因為以前試過雞白同背脂醬油，都覺得唔啱口味，所以就算呢一年幾食左150碗以上嘅拉麵都好，都冇諗過再去。
不過咁，唔少麵友都對呢間店推崇備至，過左咁多年都仲咁受人愛戴，我就開始諗，當時我覺得唔啱食，係我未夠識食，定間店當時一時失手，定佢一路以來口味有進化所以迎合到大部分人口味呢？
自從開左太子店之後，我就一直都係幫襯佢，始終都係近一步，我又鍾情佢嘅出品。今日咁啱有兩個鐘自由時間，又諗起紅磡店，就試返佢啦。泡系雞白湯我就真心麻麻地，最怕d泡嘅口感，虛虛的，又冇味，所以既然冇食咁多年了，就先試返背脂醬油拉麵 🍜啦。
未講食評前，先講吓我今日响店內觀察到嘅無聊事 (係，所以篇文真心長)。
我對呢間店嘅營運有少少意見，有好有壞。
好嘅，唔知由幾時開始 (裝修後？)，食客要响門口揀好食乜並比埋錢先入座。咁樣可以幫店家慳返時間處理落單收錢，食客食完就拍拍羅友走人，我覺得咁非常好。
未夠好嘅係，我一直認為邊個先 order 就應該要先食，咁諗係咪好理所當然呢？今日我11:50am到排第4， 可以頭輪入閘。因為每個人要先 order 比好錢先入得，所以肯定係先排嘅先 order。我咁啱8卦到夾左响個架嘅飛仔 (見下圖)，由左至右排，左邊係最早 order 的。由於頭輪一共有 5 個人點左雞白湯，分別係第 1, 3, 5, 6 同 7 個客，但基於店家一次過只能煮 4 個麵，所以只能同時間上4碗。重點來了，有趣嘅係，店家竟然先上比第 3, 5, 6 同 7 個客，而第 1 個客就未有得食。雖然真心唔太關我事，而第一個客都冇特別表示不悅 (表面上)，不過都想講講，營運流程係有呢個問題存在。
講返關我事嘅問題，咁，因為我排第4， 但我唔係點雞白湯。店家應該為左節省時間，一炮過煮4個雞白，我嘅麵就第二輪先有。我理解咁做都無可厚非，始終咁多人排隊，煮得快上得快比起順序係緊要d，所以只係小問題。
入正題，講返碗麵 😂
香味 (3.5/5)
香味唔算撲鼻而來，主要都係聞到醬油嘅香味為主，其次係面頭嘅白蔥。
湯 (3.5/5)
可能因為有豬背脂嘅關係，湯底相當的油潤，亦好順喉。背脂，醬油同雞骨湯產生嘅效果都算好。醬油味道都醇厚，不過鹹度同甜度都偏高，對我來講係鹹左d。整體係幾討好，可惜湯嘅溫度唔夠熱，背脂嘅香味未完全發揮得夠好，呢下扣左唔少分。
麵條 (4/5)
中細直、全粒粉造嘅麵，中至低加水率，質感較為扎實，麵味都夠香，幾啱口味。
配料 (3.5/5)
好嘅係豬叉燒同溏心蛋，高質。未夠好嘅係雞叉燒，雖然質地夠軟，但雞味可以話接近冇。白蔥同紫洋蔥碎正常發揮。
整體來講，口味偏濃偏鹹，所以食到中後段會膩，見到有沙甸魚乾醋，加左少少，解膩效果都唔錯。其實成碗麵係幾好食，最大致命傷係唔夠熱，令豬背脂香味未能夠充分發揮，另外就係雞叉燒真係差，其他範疇全數中上水平啦。比起3年前食，確實整體質素係比我記憶中好左，我決定下一次食會試鰹魚🐟拉麵。
順帶一提，唔肯定係咪裝修後嘅產物，店入面多左條捲曲嘅膠光管，唔知响各麵友眼中佢嘅藝術成分有幾高呢？🤣(見下圖)
