板前壽司 (已結業)

試過旺角家樂果間, 服務及食物都屬極差, 所以食一次以後都唔會返轉頭, 試食尖沙咀呢間係因為友人介紹呢間好過亞士厘道間一壽司, 本人覺得一壽司幾好, 所以就一試。試後覺得冇失望亦冇驚喜, 依舊覺得一壽司服務及味道better, 唔知係咪先入為主。呢度唯一比到我既驚喜就係個鵝肝壽司($25), 佢整果時香氣四溢令人流晒口水, 味道唔錯, 但記住唔好將鵝肝同飯分開食, 要混飯一齊食, 因為食既係佢鵝肝既香味而唔係好似平時咁食鵝肝既溶化感, 所以分開唔混飯食你一定會失望, 分開就只會係一舊香d腍d既膶, 但混飯食就可以抵銷左果種唔夠溶化既感覺但又有鵝肝既香味, 呢個係我唯一推介既。仲有一個都要一提, 就係若叫板前特卷($25)就唔好要海膽及三文魚壽司, 因為板前特卷其實係呢兩樣野既混合體, 食唔到咁多野但又想食多d款式既人都不妨可以叫下呢個。但呢度有樣唔好, 我坐bar table但係冇迴轉壽司要畫紙order既, 有師傅嚮我面前整壽司, 但係d師傅整好之後會遞埋黎等你自己做傳菜囉, 我唔係咁鍾意, 要我serve自己仲要加10%。