滿記甜品 (已結業)

o係九龍灣食完晚飯就想食甜品，茶木太多人排隊喇，所以就過左隔離滿記。呢間滿記應該係新開既，裝修都特別新潮大氣。楊枝甘露涼粉上檯時覺得有D出奇，楊枝甘露唔係一早煲好既，反而係將唔同材料 (芒果、西柚、西米) 連同椰汁芒果汁就咁加入碗到，要自己撈埋先食得，不過又無影響到味道。西米都好有咬口，西柚唔太酸，不過份量就少左D。黑芝麻奶樂其實就係o係奶凍上面加啲芝麻糊，奶凍雖然唔夠滑，不過奶味十足，芝麻糊亦非常香濃，兩樣野加埋雖然視覺上呃唔到like，不過味道合格有餘啦~