喺香港搵一間以交通工具做主題嘅餐廳，都真係幾難搵，經朋友介紹下，終於搵到呢一間以747飛機做主題嘅餐廳，黎到門面，已經覺得幾得意，好有睇頭，呢個裝修，同附近嘅街道環境，形成強烈嘅對比
話明飛機做主題，室內環境就冇得馬虎，雖然座位唔多，但係入面嘅環境都算係比足心思，感覺好似去咗機場食嘢咁 ; 其實我身後仲有兩張卡座係以飛機艙內嘅環境去設計，當然包括將飛機椅，成個感覺都好正，今次未有機會坐到喺嗰度食嘢，下次一定要坐到
食物嘅選擇都幾多，主餐牌有一個，而面頭藍色嘅餐牌，就係餐廳做緊嘅優惠，餐廳慶祝開業一周年，最特別嘅就係依家以$338 ，就可以享有六隻生蠔及一支紅/白酒！作為生蠔控嘅我，冇理由唔叫返 Set 啦！
呢一個 $338 Set真係冇咩理由唔叫，今晚我同朋友都揀咗白酒，因為主要想配返生蠔，同埋食一陣既黑毛豬
呢支白酒嘅味道都唔錯，來自智利，入口舒服，帶有少許酸味，比較啖生易入口，唔嗆喉，同隻生蠔都幾夾
白酒生蠔，夠晒浪漫，Cheers !
今晚既生蠔嚟自法國，呢隻法國生蠔比較細隻，不過就夠晒鮮甜，海水味唔重，食落口都有 Creamy 嘅感覺，其實重點真係夠新鮮！
雖然真係比較細隻，但係喺放入口嘅嗰種滿足感，真係唔錯！都幾有驚喜
食完鮮甜嘅生蠔，跟住就嚟熱食啦，有燒西班牙黑毛豬鞍扒，呢個賣相好吸引，真係滿足咗個視覺先
大大件嘅西班牙黑毛豬鞍扒厚度十足，燒到金黃色既佢，香氣撲鼻，親埋下面嘅配菜，黃金薯角，番茄仔等等，確實非常吸引
豬鞍扒切開就感受到佢入面嘅 Juicy，肉質夠實在，香燒至金黃色的外層，入面仍然係雪白色嘅肉質，食落好有口感
味道唔夠嘅話，仲可以點旁邊附上嘅燒汁，味道更佳！因為佢塊扒都幾大塊，所以絕對夠兩個人食
最後，我哋另外都叫咗個小食，佢係墨西哥粟米片，賣相唔錯，另外仲有三個醬料味道俾你點，份量其實都幾多添 ; 不過，因為粟米片冇任何味道，所以如果唔加添任何醬汁，味道會比較單調
總結係，香港確實比較少呢一啲以特色主題做賣點嘅餐廳，其實佢哋對於食物嘅質素都有一定嘅要求，所以，都值得大家嘅支持
