塚田農場 (已結業)

喺APM辦完年貨，行到攰攰哋，見到有間新開嘅餐廳，又有下午茶set，於是入去試吓！見到間餐廳有美人鍋，飯，仲有甜品，每一個餐都配有自助沙律吧同埋飲品吧😎好似幾抵食因為我哋兩個人，如果嗌兩個下午茶嘅飯set，再加甜品set，就好似唔係好抵，因為好似嘥咗一個飲品同埋沙律嘅半自助咁。於是我哋叫咗個美人框飯御膳，$158包兩款框飯，一款小食同埋一款前菜另外加一個湯。我哋揀咗三文魚框飯同埋蒲燒鰻魚框飯，至於小食就加咗$20試鹿兒島豚里肌肉。飯底係糯米飯，雖然細細碗，但都好飽！三文魚經過炙熱，個油香味更加突出，而蒲燒鰻魚個燒汁同鰻魚配合得好好！小食方面，加$20試豚里肌肉真係一個好好嘅選擇，臀肉燒到七成熟，肉香味好重😋呢一個set兩個人食都夠！之後我哋仲要做一個抹茶餡蜜芭菲，抹茶味嘅雪糕好濃郁，其他配料都好有綠茶味，完全唔會太甜或者有苦澀味，呢個下午茶嘅甜品set都配有沙律吧同埋飲品吧。飲品嘅選擇非常之多，有熱同凍飲。