肉餅哥小炒料理 (已結業)

荃灣區真係臥虎藏龍，區內有好多間食肆，即使係小店，質素大多數都不俗。最近工作比較彈性，成日周圍去，咁啱呢排就去荃灣區。男朋友本身都係荃灣區工作，順理成章有幾日放工都可以約埋一齊食飯。兩個人想食餐簡單晚飯，見到附近有一間肉餅哥係Openrice好多好評，仲有好多得意肉餅任君選擇。行到黎餐廳，無論店舖嘅裝修，又或者菜式選擇，都十分新潮。門面有一個大大肉餅排行榜。望一望餐牌，單單係肉餅，已經有三十幾款，可以揀煎或蒸，仲可以配搭各式飯麵。款式之多，連芫茜肉餅都有，總有一款合大家心意。難怪咁受歡迎，座無虛席。坐低後侍應馬上送上例湯。我揀左女生至愛 - 足三両花膠肉餅(煎)，配菜飯($99, 菜飯+$2)。男朋友揀左流心芝士肉餅(煎)，配米粉($69)。花膠肉餅，意想不到真係有多塊花膠鋪面。而且煮得入味，口感煙韌。記住要襯熱食，如果唔係本身充滿膠質嘅花膠同埋啲醬汁就會變得杰身漿口。肉餅煎得香脆，肥瘦比例適中。厚厚嘅肉餅食落啖啖肉，送飯一流。流心芝士肉餅。兩層肉餅之間夾住流心芝士，面層仲有一大塊芝士，輕易做到拉絲效果。呢個肉餅就相對較濃味，不過亦非常香脆可口。呢個新穎配搭，十分成功。