星馬餐廳係香港真係成行成市，不過係唔係間間都值得一試，就真係見仁見智。作為麻甩佬，花巧、打卡通通都唔重要，最緊要好唔好食、抵唔抵俾。
話說同事高度讚賞呢間餐廳個爆漿多士，話邪惡到極點，久唔久都想去食。今日lunch 諗起，就過去會一會佢。
呢間地方都四正、坐得尚算舒服。有weekday lunch menu，盛惠＄88元包杯飲品，另加錢可配小食。
選擇有8款，全部近年都係招牌菜。近排天氣開始涼涼地，一於叫肉骨茶，同事揀多款，要板麫。
板麵都算係新加坡街頭小食，個湯好濃郁而且好多唔同配料。餐廳呢個都好唔錯，好足料，麵係粗身的但好滑，配料有魚乾仔、雞蛋、少少肉碎和雲耳，湯頭好清甜，如果可以加少少辣椒，味道應該更好！
搵勻食評都唔見有人講過肉骨茶，個心涼一截！只不過要信自己！肉骨茶原盅上，保溫做得好好，屬於新加坡的「白色」肉骨茶，即係唔重黑醬油、藥膳味或酒味都唔重，反而重胡椒味，比較淡味那種。
排骨仍然keep到肉腍嫩滑，唔會似煲湯豬咁，湯入面的白蘿蔔好甜，吸晒湯的精華！個感覺就好似飲緊胡椒豬肚湯咁，但比豬肚湯更清甜、有層次同更易入口。另外配埋油炸鬼，放入去吸晒湯，非筆墨可以形容。天氣再凍少少，一定會再encore。
差少少唔記得甜品，點會唔試試吐司，加38元有一份咖吔吐司，無爆漿咁heavy，但一樣有牛油同咖吔醬，烘脆咗的多士加埋入去…真係一流。
