痴心小麵 (已結業)

今日放假，悠悠閒閒自己一個人去銅鑼灣行街，行到攰就想食番個下午茶，在金百利商場眾多的食肆中，揀左呢間位於8/F的痴心小麵。睇menu覺得樣樣都好吸引，又想食雞煲，又想食麵，但得一個人又點嗌咁多野... 納悶之際比我見到一款「一人份雞煲撈麵」，覺得直情係為我而設，即點！「一人份雞煲撈麵」$62上桌嘅時候係冚住蓋的，一打開頓時香氣撲鼻。雞煲的調味係佢嘅靈魂，而呢個煲用料好足，味道香濃，又辣又麻，啲麵索左雞煲的汁，零舍滋味！「雪花牙籤雞」$32個碟好靚！用牙籤吉住一粒粒炸雞塊，表面淋上了泰式辣醬，雞肉肉質嫩滑，不錯。「黑牛」（可樂+朱古力雪糕，$28）我咁大個人都係第一次飲黑牛，因為平時去嘅餐廳都無供應，其實冇乜機會試到。原來朱古力同可樂都夾得到，有趣：D最後本來想點個「皇室奶茶布甸」的，但店員話今日冇，只得「桂花曲奇奶凍」，都唔錯。