海幸壽司 (已結業)

勝利道一向都係小弟放午飯考慮嘅地點之一，原因係貪佢就腳得嚟又多選擇，所以，特意趁開學前嘅最後一日再去拜會。各位去到日式餐龐食飯個陣，都應該離唔開嗌魚生丼、卷物、拉麵等等，但其實定食都係一個唔錯嘅選擇，而小弟對呢間日式餐廳嘅豬軟骨定食可謂情有獨鍾，原因就係佢嘅豬軟骨火侯十足，燜得超軟腍Q滑。查實小弟每次到訪日式餐廳都會一嚐該店嘅豬軟骨定食，但都唔難發現有唔少餐廳嘅豬軟骨都未燜至軟身，有時仲會見到乳白色嘅軟骨部位，而食緊個陣仲會不斷發出咯咯聲，有時真係會擔心太用力會整傷牙。但係，喺呢間餐廳食豬軟骨定食就大可以放心啦，佢嘅豬軟骨軟腍Q滑得嚟，帶有少少辛辣，好適合鍾意食豬軟骨但牙齒狀況又不太理想嘅食家享用。佢嘅豬軟骨嘅醬汁用嚟送白飯亦係一個唔錯嘅選擇！成個餐除左一客豬軟骨、一碗白飯之外，仲會附送埋一客茶碗蒸同味增湯（個人認為茶碗蒸略嫌遜色，蒸得過老，蛋身略為硬身），合共盛惠約港幣60元。