頭啖湯

营业中

休息中

好耐冇同朋友打邊爐啦，聽朋友講天后有間火鍋湯底好好飲，於是今日就嚟到天后覓食啦。餐廳有4款特式火鍋，想飲清湯嘅我就叫咗滋潤椰子雞煲，湯底除咗雞外仲加入大蔥、木耳、蟲草花同菌類，難怪咁清甜！同朋友飲咗幾碗先捨得落其他火鍋料。另外雞件份量都好多下，可見餐廳完全唔吝嗇。配料方面，我地2個女仔總共叫咗5樣，分別係細美國安格斯雪花牛肉、桂花蚌珊瑚蚌雙併、墨魚滑、韭菜餃同埋芋絲。其中最鍾意嘅就係美國安格斯雪花牛肉！牛肉脂肪比例均衡，牛味十足，放入鍋中涮個10秒，入口即融！同朋友都好後悔冇叫到大碟，因為太好味我地之後要再追加咗一碟。然後就係桂花蚌珊瑚蚌雙併，只可以講十分新鮮！爽口彈牙仲鮮味十足，建議大家滾5-8秒就可以食。墨魚滑以竹筒呈上，放入鍋待浮起即可享用，同樣十分彈牙！韭菜餃不知是否自家包製，但內餡嘅韭菜份量好多，味道也不錯。