misocool (已結業)

中午點半去食，成個場—半人都唔夠，有兩人枱有四人枱空出，都一定要我坐豬肉大枱。80元食豬扒九州拉麵，吉烈豬扒出油無味，裡面仲生生地。食兩啖已不想食。服務與味道都差，唔怪得知附近間間坐滿，佢仲有咁多位。一句到尾！冇下次。

心血來潮很想吃三文魚籽及海膽，路經「Miso Cool」，來一客，各賣$35大元一件。始終是新鮮包製，紫菜脆卜卜，速吃的話味道是合附預期。另要一碗「極上䐁王拉麵」$76，半熟卵全熟，肉太肥，不熱的。難道我做了 Mr. Cool ?!

來到misocool不是吃壽司刺身,而是吃甜品叫了抹茶紅豆冰和三款甜品。 抺茶紅豆冰連雪糕, 很香的抹茶味,三個甜品中最喜歡牛奶布丁,濃濃的牛奶味, 芒果布丁就普普通通,

次次經過都心思思想食 今日終於入左去啦一個人安排坐大台 因為揀左食咩 一坐低就嗌左個茶漬飯然後就係無盡等待……見係星港六lunch time人都唔少d 侍應都勁忙 就冇特別追單啦點知等左45分 都完全冇聲氣 睇左隔離兩位顧客坐低 食完 埋單 都仲未有野到！終於追單 個侍應聽到我等左45分鐘都呆左！佢幫我去追單 又再返黎問我其實係嗌左咩 即係一開始就冇落到單啦？如果唔係一睇電腦就知！好啦 食飽 嗌埋單等左10分鐘……冇反應！！坐我對面個位顧客嗌完一分鐘都唔使 已經埋到單咁我唯有再嗌啦 又5分鐘…睇住我右邊既顧客又係嗌完一分鐘已經埋緊單！真心燥！直接沖左埋收銀個位大嗌我要埋單 就即刻出左張單俾我埋我食個飯都係15分鐘 但白等既時間就要60分鐘！係我特別樣衰定間野服務有問題？？野食又唔係特別好食 真係冇下次啦！

見成日經過未試過今次就同男朋友入去試下，點知係個伏，三文魚腩可以煎到硬到塊薯片甘，蝦頭意大利粉個兩隻蝦一咬落口係霉到cream狀，菇片係可以炒到黑晒，問個侍應生拎辣椒仔佢話無，我男朋友行埋去一拎就拎到。都算啦，最好笑係找錢，我地俾$230找返9蚊，佢拎返過黎話找返錢個陣一打開，係$230，收都未收就話找錢，我唔明廚房同樓面係咪全部都係第一次出黎做野。

星期五既晚上同朋友一齊黎食晚飯，2個人叫左個豚角煮沾麵，2個三文魚手卷，同埋2件壽司。三文魚手卷D紫菜唔夠脆，但總算新鮮。壽司完全唔抵食，非常失望。沾麵係我既至愛，唔知點解覺得呢樣食物好特別，加埋隻溫泉蛋簡直係天堂呀，可惜豚肉肥左少少同埋比較少，得2片，如果俾多幾片就好啦。

今日同朋友黎到尖沙咀K11,行完一輪街之後,開始有D口喝,又唔想去附近D餐廳飲咖啡喎,行行下見到MISOCOOL,朋友決定坐低飲杯野,就陪一陪佢啦平日下午都有好多人,可能因為暑假關係,都等左一陣先入到去我飲左杯芒果爆珠特飲,芒果好清新呀,爆珠D汁都幾甜,唔錯之後食左個原味Yogurt,原味就無生果味咁特別,但係幾滑,酸酸甜甜,幾好味WO加埋都係$70左右,都幾抵

朝早同阿仔去完玩，12點幾去搭地鐵，順便搵下有冇野岩食先再返屋企。趕住返屋企拎啲野再出門口。地鐵站內見到呢間之前係荃灣食過，又夠哂近（快啲食完快啲走），記得有個唔知咩魚飯，我同阿仔都好鐘意食，唔知呢間有冇呢？（原來係冇）去到唔駛等位，坐低就叫左杯抹茶紅豆冰，因為我未食早餐，好肚餓呀！阿仔又鍾意食拉麵，我唔駛旨意食架啦…抹茶味既雪糕唔錯，阿仔竟然唔食！只愛紅豆，同我爭！(>﹏<)拉麵個湯好好飲！拉麵都唔錯呀！阿仔幾乎成碗麵食哂（預左），但啲雞就少食，我覺得一般啦！勉強食哂…唔好浪費食物丫嘛…平時一個餐有飯或麵，加一杯必定飲唔哂既野飲就夠我兩個食，今日決定叫多樣小食：紫薯餅，真係怕唔夠食呀…都ok呀！唔算好油，紫薯又有益，不過冇薯餅咁好食，所以阿仔都係俾我強迫下食左兩啖！點知咁食法太太太飽啦！下次都係照舊算了！（一個飯/麵就算）食食下已經愈來愈多人，有人等緊位添。岩啦！我地1點多啲啲已經離開。下次打算黎試乳酪

男友想食拉麵，我想食日本野，見食依度吾駛排隊，就食依間~~~ 我要左三文魚蛋包飯~~ 男友要豚肉拉麵~三文魚好薄~~ 燒太耐好乾好硬 😢但在係個蛋包飯又幾好食 😆豚肉拉麵d豚肉都吾錯嫁，賣相普通少少啦

上個星期六放假同個朋友去左尖沙咀SHOPPING行街,行街前要食lunch先, 要搵間可以傾計同埋舒服環境既餐廳跟著行開K11廣場,見到呢間misocool食拉面,出奇地星期六唔太多人所以很快可以安排入座,位子有卡位選擇，都非常舒適。餐牌的選擇挺多，有拉麵，冷麵，飯，壽司等等,同一般日式餐廳一樣啦~這一次選擇了,我就叫了個牛肉拉麵,牛肉份量都幾多,佈滿整個碗,湯底應該都無落味精再另外叫左杯特飲,幾好飲,唔會太甜,ok整體黎講,係個位子都幾舒服坐同埋可以坐好耐都唔會被趕走,,餐廳職員都好nice價錢都合理食物質素都唔錯,下次會再黎

尖沙咀是是購物天堂，也是食店的集中地。今次介紹的是K11商場地庫的Misocool拉麵店。一望過去，整間店的感覺十分闊落。由於是下午的關係，人比較少，很快可以入座。位子有卡位選擇，非常舒適。餐牌的選擇挺多，有拉麵，冷麵，飯，壽司等等。這一次選擇了推介的極上五層豚角煮九洲拉麵。豬肉的肉質嫩滑，可惜份量少了點，只有兩片。拉麵口感一般，沒有想像中的彈牙。湯底是值得一讚的，因為食完整碗拉麵並沒有感到口乾，所以應該沒有加很重的味精。

見到misocool 用北海道低脂乳酪做賣點就叫左個茫果綿花糖乳酪食，但驚喜唔大。儘管係乳酪，北海道嘅乳酪應該係重奶味，但呢款同平時食開嘅乳酪無分別，感覺好似俾佢個名呃左咁 。不過呢度嘅茫果都幾鮮甜，一啲都唔酸。呢度價錢係偏貴，普通杯同大杯都係得一款topping，我呢杯係普通杯嘅size，要28蚊，大杯的話要35蚊，每加一款topping 要5蚊，好似我呢啲細食之餘又想食多款配料嘅女仔梗係普通杯啦，橫店都係加錢，不過食過一次之後都唔會再幫襯架啦。

7.30pm在附近上課，隨意來了Misocool吃過快飯~韓式辣泡菜豚肉啜啜麵  湯底泛著紅紅油光，感覺下了不少辣油，的確辣度十足，但肯定不是來自泡菜的辣，因泡菜只是輕微酸辣，而且不似是放在湯中煮過；豚肉肥瘦比例尚可，份量適中，但只是一般灼豚肉片，沒有特別；伴料還有不少木耳絲，夠爽口，溏心蛋蛋黃生熟度剛好，呈半流質，但未夠入味；啜啜麵即蒟蒻麵，爽滑彈牙，蒟蒻應有的特質，吃這個低卡高纖的麵條夠飽肚之餘熱量又低，怕肥人士好選擇~整體沒有驚喜，食品質素一般，即使位處尖咀大型商場內，以這種檔次的食物和進餐環境，定價略嫌過高~ 如非就腳，絕不會再來~

見佢有位，同門口個餐牌都幾吸引咁，比佢呃左入黎。叫左三文魚腩壽師，煙鴨胸壽師，焗蠔，龍蝦湯大蝦烏冬，海鮮鍋配牛肉飯，芒果沙冰，熱清酒叫左三樣野係賣晒既，象拔蚌壽師，赤貝壽師，鹽燒三文魚餃食物我唔會逐樣評論，因為基本上所以食物一樣，好難食現在係評論佢上食物既次序首先第一樣黎竟然係烏冬第二樣係壽師第三樣焗蠔第四樣係沙冰喺我食完哂頭三樣食物張枱都比佢清晒，正當我忍唔住想取消個熱清酒既時候，支野終於黎。最後個鍋配飯都上埋。埋單3百幾蚊講完，唔會再幫襯

因團體去幫襯.叫左:鮮檸柑桔蜜,日式豚肉卷,帆立貝叉燒極濃蕃茄湯拉麵,柚子沙律,天婦羅廣島蠔極上濃湯拉麵鮮檸柑桔蜜:太甜.日式豚肉卷:豚肉好硬又乾飯又爛.帆立貝叉燒極濃蕃茄湯拉麵:帆立貝彈牙,叉燒好淋肉鹹香野味,蕃茄夠味酸香好味,糖心蛋好細隻做得唔好食,拉麵麵質唔糊,可惜太厚粉同唔滑.柚子沙律:柚子味重沙律都幾新鮮,味道唔錯.天婦羅廣島蠔極上濃湯拉麵:天婦羅好油炸粉好硬好難食,廣島蠔唔新鮮炸到好濕,湯底太淡,拉麵一般.整體:唔會再去囉,又貴又難食.