ITALIAN Corner Pasta & More

营业中

休息中

早排周圍都見到推介呢間係food court嘅新開手工意粉之前誇張到要攞籌 而家就唔使啦夜晚6點半去到 唔算好多人不過人手實在唔夠 所以幫2-3個人落單跟住就會即煮 搞掂先再落單所以都會慢慢積左條龍出嚟$88套餐包前菜、意粉同甜品 叫左2個sets前菜 🥗1️⃣ 小牛肉配吞拿魚醬有3塊 幾tender 同個醬幾夾個醬似蛋黃醬+呑拿魚 都ok2️⃣ 炸魷魚圈炸得幾脆 配他他醬 正常👌🏼意粉 🍝1️⃣ 博洛尼亞牛肉寛扁意麵都幾多 同埋好粗 都幾有口感不過唔夠掛汁 但肉醬係幾好食嘅唔會話佢好精緻 但對得出價錢2️⃣ 煙三文魚奶油捲捲麵姐係Fusilli 好creamy 夠味呢個配搭又幾好 另外有d三文魚粒似煎三文魚粒多過煙三文魚 但好食嘅😎甜品🍮1️⃣ Tiramisu都幾重咖啡味 幾好食 不過太細個🤪2️⃣ Chocolate Panna Cotta勁重朱古力味加勁甜嘅醬個面一定要配下面嘅布丁 夾埋就balance番布丁幾香奶味 唔係咁甜會好d整體覺得係有少少吹棒左不過以food court同呢個價錢我覺得呢個水準係可接受嘅👌🏼

呢間店新開後，午飯時間都一直有行多人排隊，今日路過居然發現冇人排，那便一於試試它的手工意粉😬我點了三道菜的餐前菜：小牛肉配吞拿魚醬意粉：煙三文魚奶油寬扁意粉甜品：提拉米蘇。（如大家不喜歡甜品的話，可轉為飲品）先講前菜部份，小牛肉有點嚡口，但配埋肉上的吞拿魚醬一起食，整體不差。意粉方面，味道普通。值得讚的是起碼醬汁不會過咸，亦能掛意粉，如店子的賣點是「手工」意粉，意粉便有點遜色，它像是少了蛋香和口感方面少了點彈性，顯不出手工意粉的特色。提拉米蘇有咖啡味，但又欠了點酒味，作為餐後小小甜品，都算不錯。$88 ，有前菜、意粉、甜品或飲品，整體味道不過不失，份量亦足夠，算合格有餘。

終於食到最近喺網上好紅嘅平價手工意粉。呢一間店舖係正宗意大利人開，午市套餐唔使$100就可以食到意粉甜品同埋咖啡，環境係喺food court裏面，唔係高級餐廳嘅環境，但係食物質素絕對有高級餐廳嘅質素，覺得喺佐敦中心區域搵到一個咁抵食嘅地方實在好難得。意粉類型可以自己揀，可以配上嘅汁醬亦都很多選擇，甜品超出色，細細碟一個人食啱啱好。大家可以嚟試吓。精靈味道評分 🧚‍♀️🧚‍♀️🧚‍♀️🧚‍♀️🧚‍♀️精靈環境評分 ⭐️⭐️⭐️⭐️⭐️精靈抵食指數 🧚‍♀️🧚‍♀️🧚‍♀️🧚‍♀️🧚‍♀️精靈服務評分 ⭐️⭐️⭐️⭐️⭐️精靈總體評分 🧚‍♀️🧚‍♀️🧚‍♀️🧚‍♀️🧚‍♀️

早排睇啲social media吹捧就一定要嚟試試，之前第一次去先知要分時段排隊攞籌，而當時下一輪籌要隔好長時間，結果要敗走。今次去到就無咗上次嘅攞籌情況，無特別諗嘅情況下我揀咗三文魚奶油意粉（寬扁意麵）&小牛肉配吞拿魚醬&橙汁，等咗大約10分鐘左右就已經有得食。前菜嘅小牛肉配吞拿魚醬無特別擺盤，我覺得味道可以嘅，肉質正正常常。我比較期待個餐重點-意粉，我選擇嘅係三文魚奶油意粉，揀咗寬扁意麵，食咗頭一啖就心諗：「唔通正宗意粉係咁嘅質感？」，個質感實而有少少粉粉哋，又唔算係未熟，但食到痴晒牙咁，而三文魚就正正常常，醬汁方面味道就唔錯嘅。結論係無下次

每日4輪派籌時間，分別為11：30, 12：50, 5：30 及6：50，每個時段派15張籌，每人最多可領2張，每張限買一份意粉。派籌後再排另一條落單隊，每個落單隊限15個籌，即11：30 拿籌後，可於11：40下單。該時段分別順序煮15個意粉，煮好後已差不多12：15 ，就開始第二輪的12：20落單共15個。 有系統化並有秩序地運作，只是食嘅人就可能等得比較耐而已。廚師每次煮2份，叫了三文魚白汁意粉，手工意粉彈牙，質地唔錯，但配汁就未有驚為天人，中規中矩。 $88有前菜- 蕃茄麵包，甜品tiramisu， +$10有飲品，算好抵食又對得起價錢有餘。 另外，千層面比較淋，著重白汁底，少了蕃茄醬汁，認為有更好選擇。 整體不用排隊可以回頭, 多謝提供平靚正選擇。

呢間又係討論度幾高嘅手工意粉，喺佐敦恆豐個food court，11:30嚟到啱啱派第一轉籌，唔洗100蚊就有一個餐，有前菜主菜甜品同飲品，無論份量同味道都十分ok！揀咗bolognese sauce同salsiccia pasta，呢兩款我自己都想煮好耐，上星期整咗個beef ragu 都3,4個鐘，bolognese sauce閒閒哋都2,3個鐘味道先夠好。所以佢賣呢個價錢呢個味道我真係好驚喜！希望下次試到佢哋嘅gnocchi，同其他款意粉呀😆

等左半個鐘先拎到我個意粉計埋排隊落單前前後後就1個鐘同埋應該係因為已經去到最尾個幾個籌，所以手工意粉嘅選擇已經唔多醬全部都有，但麵就得返3號可以揀 avg 10分鐘出1－2個意粉明點解得咁少籌講返個粉Portion 就一定唔算多佢嘅意粉質感都係好食嘅，意粉本身一啲都唔鹹，第一啖差啲以為中伏成碟冇味但正正因為我揀左個豬頰肉（其實就係carbonara)，佢係煎到好香口同埋本身啲個肉就好重味所以夾埋啲意粉食個調味就變得岩岩好，如果呢個就係廚師追求嘅balance我都覺得幾impress! 唯一就真係等得太耐令到我享受唔到呢個美味一刻同埋走先發現原來有set，抵好多

佐敦恆豐中心地庫food court，最近開咗間 即叫即煮手工意粉的小店。Italian Corner 🍝昨晚，因籌已派完，未有機會試。今日lunch就同同事一齊去試吓。小店舖前有2位廚師負責落單、收錢、煮意粉🍝。佢哋有all day set menu，只需$88🍽️，就有小食🐟🧀、主菜意粉🍝、甜品/飲品（也可以加$10，甜品、飲品都要）。我點咗：-小食🉐：布拉塔芝士布魯斯凱塔 配鯷魚和檸檬🧀🐟🍋🍞 鹹香小魚加小多士，好惹味😋意粉🉐：羅勒核桃帕瑪森青醬鮮意粉（威尼斯粗麵）🌿🍝 我好鍾意佢哋加了幾粒松子仁，好香脆，令味道再提升。甜品🉐：Tiramisu 😍 好味道！我加$10要飲品：Pineapple juice🍍🥤👍🏽另外，可以單點其他款式意粉、小食、甜品，有機會晚餐可以試。⚠️小店一分時段派籌，限量供應鮮意粉🍝。而且，是即叫即煮，需要等候一些時間。#可以encore

今次選擇羅勒醬手工意粉，選擇咗扁意粉 （Linguine), 味道不錯，亦非常適合素食者。意粉有韌度，掛汁，放在面前已聞到🌱羅勒香味👍$15 加左一杯橙汁，當然不是鮮榨果種。

我係佐敦返工，一向會去恆豐Foodcourt 食lunch，見到佢有幾檔野唔同咗，唯一一樣特別就係多咗外國人面孔，話係手工意大利麵。咁我就叫咗個98蚊嘅 set 試試，有頭盤有甜品有飲品，試咗個冷盤，佢意式小牛肉加吞拿魚醬，味道偏重，但係我覺得幾好食 7/10下面有幾款意麵任你配搭，嗌咗個手工扁意粉，口感都唔錯。我俾7.5/10最尾試埋佢個Tiramisu ，個cream口感幾實淨，但好甜，咖啡酒浸味就少咗啲，我會話5/10100蚊食到呢set意大利手工麵，都算唔錯。佢其他意粉都唔算貴，單點都係五十幾去到六十零蚊左右。

近排搬左去附近，見到大食代入面開左間新店，以手工意粉為噱頭，去到重要見到2個外國人係度工作，整叫整做意大利麵，咁就當然要試試啦！見到餐牌都多野食嘅，有餐點及有 a la carte，咁我睇睇下就點左個白酒蛤蜊醬意粉啦！而店員都建議我點1號果款威尼斯粗麵，於是就睇佢講啦！大約等左15分鐘就有啦！出到黎，個賣相都幾好，隻碟都算好靚，蜆肉非常肥美，首先試啖意大利麵先，掛汁非常之香白酒味道麵質口感不錯，蜆肉份量非常多，但係有少少韌，味道唔算係咸，我相信主要係想帶出白酒同埋香草嘅味道，最後我成碟清晒了，唔錯唔錯。

好食過有Ｄ我係義大利食. 可以揀義大利粉。我揀左義大利扁麵。蜆同麵係新鮮既。個汁係好簡單既白酒蒜橄欖油加入好多羅勒葉但係好香。好味。You can choose the pasta you like. I chose linguine. The vongole was delicious with fresh clams, white wine, garlic and olive oil with lots of fresh basil leaves. Could be more al dente for me but this suits the taste of HK ppl. Le linguine alle vongole sono deliziose.