一直想试呢度的开心果鸡蛋仔。舖头开1200，我同狗狗爸爸1215到达，当时冇其他顾客。喺店员介绍下，买咗夹心双重开心果鸡蛋仔，对方仲好主动问我哋试唔试下蛋卷，最后，我哋试晒3款口味 - 原味、抹茶同黑朱古力。夹心双重开心果鸡蛋仔：$42，无论系以街头小食定鸡蛋仔嚟讲，呢款特色鸡蛋仔都几贵，份量唔大，馅料亦唔多，至少冇平时睇介绍果种「爆浆」的澎湃效果，食到最尾亦冇开心果酱漏出嚟，馅料只刚好填满鸡蛋仔（有1、2粒冇沾到酱）。购买时，啱啱有人送货，话系开心果酱，所以，馅料用的开心果酱应该唔系自家制，呢点亦令我有少少失望。鸡蛋仔松脆，边位亦脆口，单睇冇掂到开心果酱果1-2粒鸡蛋仔，佢哋里面呈松糕状，所以，成粒鸡蛋仔可以话系外脆内软，质感好好。不过，个人觉得鸡蛋仔冇乜蛋香，而开心果酱亦冇乜调味，味道单薄、好寡。我好喜欢食唔同种类同品牌的100%坚果酱，食落觉得呢个鸡蛋仔的饀料几健康，用的应该系100%开心果制的坚果酱，只系所用的品牌的原材料唔够香，油份亦相较其他品牌的开心果酱少（本身开心果喺做酱过程中出油已唔算多），变相如果唔再特别加工，单单将开心果酱搽落鸡蛋仔度，就会令到成个组合好干。开心果酱果仁香一般，开心果味亦唔浓，食落又干身，味道单调，好易食厌。蛋卷：试齐3种口味，原味有蛋香，抹茶味清淡唔苦，唔钟意抹茶的人可能都会喜欢呢种淡淡的茶香，好适合作为茶点；黑朱古力浓味而唔「漏」，甜度调校到好适合而家的香港人。蛋卷非常松，味道清怡、冇负担，好好食！最后，我哋以中秋节优惠（95折）买咗4罐蛋卷。店员（店长？）非常友善、主动，会热心介绍同分享，仲问咗我哋觉得开心果鸡蛋仔味道如何，佢亦提到，如果想多啲甜味，可以喺落单时提出，咁佢哋会落番啲糖/炼奶，不过，我觉得咸食可能会吸引啲，如果加少少海盐/盐之花，应该可以带出坚果香。唔知有冇方法增加开心果馅的湿润、流动性，虽然我觉得饀唔多，但事实上，如果用同一款馅，再落得重手啲，一般顾客亦都未必食得晒/enjoy到，因为实在偏干啊~蛋卷好好食，可以一试，价钱唔平，原价：原味$178/罐（24条），抹茶味$188，考虑到系手工制加埋味道恰到好处，真系值得一试~~…查看更多
