影片
今次十月之星嘅生日宴选择嚟呢间私房菜搞，事缘母亲大人之前嚟过觉得几得，今次我哋就一于嚟试一试佢。可能因为佢最近先搬嚟嘅关系，去到楼下竟然喺水牌上揾唔到餐厅嘅名字，好在有看更喺度可以问到几楼。上到去一开门就见到一个好简洁嘅招牌“５Ｒ”挂喺墙度，按铃之后就入到呢间好有住家feel嘅餐厅。里面有三数张枱，布置简单得嚟畀人好舒服嘅感觉。仲记得好耐之前食过另一间所谓私房菜，上到去十几围枱好似茶餐厅咁，同呢度真系冇得比。今晚只系得我哋一枱（即系包场），入席后老板娘过嚟同大家打咗个招呼，然后就介绍今晚嘅menu。点咗菜冇几耐就开始有头盘食。先上嘅系面包。每人有两片：一片系普通面包，另一片系墨鱼汁面包。面包上伴有番茄同芝士，口感一流。跟住嘅系法国青口——个忌廉汁十分好味，青口亦好新鲜；只系size唔算太大所以有少少唔够喉嘅感觉。然后就系沙律——有别于一般西餐沙律嘅系佢加入咗菠萝同煎芝士，畀人好新鲜嘅感觉（当然亦系好好味）。Main dish 之一系剑鱼。我借咗一口嚟试觉得几好味；老板一号就觉得咸咗少少。Main dish 之二系烧春鸡。我试咗只脾，简直惊为天人——外脆内嫩，有少少后悔冇拣呢个。好在我拣嘅黑豚肉亦都系上乘之作——香口得嚟肉质鲜嫩，冇得弹。最后当然唔少得甜品——冰冻嘅雪糕配以暖暖嘅酒煮车厘子，令人有一种好感动嘅感觉。最后仲有一个特别订制（不过要另加三百蚊）嘅朱古力蛋糕，碟边写上Happy Birthday，为呢餐生日饭画上完美嘅句号。
继续阅读