龍城冰室

营业中

休息中

龍城冰室有好幾間分店，旺角呢間好似係新開嘅，係旺角開工就同同事一齊試一試！我地今次嗌左酸菜魚配飯同海鮮湯鮮蝦球湯飯😋❀ 酸菜魚配飯因為係6點前嗌，係下午茶時段，會平d！酸菜魚味道正宗！唔會好辣，酸度適中，入面仲有萵筍、蘿蔔！魚好滑！湯配飯真系一流🤤❀ 海鮮湯鮮蝦球湯飯入面有五隻大蝦，不過都係冰鮮蝦，無蝦味，口感同平時食蝦餃入面嘅蝦一樣，湯頭我覺得一般般，因為入面有雜菌，所以菇味太重，導致海鮮味唔突出，有d失望！

咁岩要出旺角做野，咁就喺附近睇吓有咩早餐食，貪就腳就揀咗龍城，因為落車嗰個位就係💕冇特別睇個餐牌，見到有沙嗲牛就叫左，點知原來嚟到，係跟埋個芝士火腿牛角包🤩🤩即刻覺得有啲開心，咁多嘢食😆沙嗲牛就正正常常，反而個包有驚喜多啲，整體成個餐好抵食🤤

今日打風，近近地搵左間茶記黎試。朋友話龍城冰室好近旺角地鐵站。點知一出唔洗擔遮就已經係龍城冰室果門口，唔洗淋雨，又唔洗點等位，突然覺得好幸福。 午餐都有A至E可以揀，每日唔同，仲要包埋中/西湯，同埋一杯野飲。今日我就嗌左A餐食菠蘿生炒骨，先黎既系湯，我就揀左中湯，中湯系無味精的老火湯。其後黎既係主菜，餸同飯係分開，果白飯好大份，最後我只食到一半，而生炒骨酸甜酸甜超級開胃，仲要每舊肉都好大粒，好抵食。

之前食过呢度嘅嘢觉得唔错，所以下午茶又想嚟返呢度食。點咗個炸脾薯條，下午茶餐炸比薯條都要$48，隻雞髀好細，薯條就一個匙羹咁多，睇落已經覺得唔夠飽，但係個雞髀好咸，而且係底部有啲紅色嘅肉好難切得開，唔好話食啦，切都切唔開！啲薯條又硬又少，一啲都唔脆，俾乞兒食都唔止咁少啦，以後都唔會再去呢間嘢，簡直係搵笨嘅！我睇見隔離嗰啲龍城炒米更加恐怖，好似冇炒過一樣，啲米粉仲係白色㗎！我真係好懷疑呢間舖頭係咪識煮嘢食㗎！依家香港嘅飲食文化真係好奇怪，唔識煮嘢食嘅都開餐廳😳，一個咁普通嘅炸比薯條你都做到咁難食，求其搵間茶餐廳都好食過你啦，仲要$48！

中午叫左招牌酸菜魚配白飯，咖喱吉列豬扒飯，凍奶茶走甜，凍檸茶走甜。先講最好食個樣咖喱吉列豬扒飯好唔好食就見仁見智，如果你鍾意食澳門葡汁雞扒飯，呢個咖喱就岩你，甜甜甜甜，唔辣既。凍奶茶走甜Um, 未融雪已經稀到好似融左雪甘凍檸茶走甜茶膽唔得，唔好味招牌酸菜魚配白飯伏中之伏，係近排食過嘅酸菜魚最差嘅一個，個湯唔酸唔麻唔辣（ps 我平時食三哥係食10小辣），落左兩包辣椒油，都係唔辣，餸入面除左蘿白係同個湯一齊煮 所以有dd 酸味之外，其它全部都係擺上去既，所以連酸味都冇，包括唔知咩魚，萵筍片，辣椒，黃色花瓣，同埋我地以為係酸菜既大量雪菜🤣。認真 成盆野得個蘿白食得下，d 魚有泥味🤮，加個麵底可以做雪菜麵😏。招牌酸菜魚，真係唔知點樣做招牌菜😎以上4樣，無一樣得😛早知食個茶餐好過最後講吓環境同服務，岩岩新開張，乾淨整潔，坐得ok 舒服；中午時段等左10分鐘已到，入得好快，但d 侍應全部都好似好趕時間咁，落單都要講得好快😂唔好意思 我轉數無甘快，枱個櫃桶d 餐具吉左9成，應該好好生意，搞到枱枱都問佢攞餐具，最後想走時，佢就黎添餐具，我男朋友當住佢面離開張枱，佢都重唔醒水繼續打開個櫃桶添餐具，甘我點

經過入去食個飯，唔算好多人，唔洗等位，岩岩過左18:00，食唔到下午茶，叫左兩個晚餐，叫完野食，等左幾分鐘個飯就到，都算幾有效率，個雞幾好食，辣辣地幾惹味，個芝士焗蘑菇牛柳粒飯，飯係炒底，但飯太多汁，好鹹，所以食唔哂，不過d牛柳幾好食

開鋪一段時間，今日試下黎食早餐睇吓餐牌先好多選擇呀！！！叫左早餐B沙嗲牛肉公仔麵🍜芝士火腿牛角包🥐3.6牛乳炒蛋拼腸仔加杯凍檸茶成個餐最值得推介係個芝士火腿牛角包🥐真係好好食😋😋😋😋😋

性價比：⭐️⭐️⭐️⭐️回頭率：⭐️⭐️⭐️滿分為10⭐️望住巴士嘅Apps知道仲有5分鐘就有車，屋企人又打嚟叫我買埋麵包先返去，俾佢做午餐，咁啱見到旺角新城呢一間龍城茶餐廳有麵包嘅櫃。$8 一個菠蘿包，如果要菠蘿油嘅話就係$11，價錢正正常常，而家嘅麵包都係差唔多價錢拎上手菠蘿包係微暖，但因為唔係即時食，所以都冇太大關係。拎到返屋企，屋企人冇用焗爐就咁再食，菠蘿皮香脆，唔算太甜，麵包都唔係空氣包。下次可以試吓堂食佢哋嘅包類或者茶餐

食開觀塘果間龍城， 見旺角新開過嚟試下， 結果果大失所望， 價錢貴過觀塘同一分店 成四份一， 一個雙拼面下午茶， 觀塘賣$38, 旺角要$48, 仲要炸雞脾d肉都未熟就出比人， 真係要好好檢討下

今早去買2個外賣早餐，一入到門口紅色頭髮女收銀員大叫等陣。然後，隔離夾包阿姨行過嚟幫手落單。可能呀姨中文程度差，未能理解同時叫2個特早a餐。呀姨態度唔耐煩，喝狗式要求我每個餐點。到最後呀姨表示唔識落單，由第三位職員落單。等咗30分鐘，然後取餐，發現食物出錯。唔介意受氣同等得耐可以試。

叫黑椒豬扒可以變做蒜汁雞扒 落錯單仲要唔認 d女員工態度勁差味道啲嘢食太鹹 龍城炒米超鹹 如果身體有事或者有腎病嘅人要小心另外食完坐一陣已經比壓力你 明明出面唔係排晒隊 服務麻麻

今日約咗個朋友去食個下午茶，咁佢經過龍城冰室，就買咗個👉🏻黑松露雞批比我食👅，佢話佢之前食過好正，所以專登買一個比我試，咁我就梗係要試吓啦。嗱老實講，我作為一個麵包精，所以就成日周圍去啲麵包舖買嘢食，試得多就會有一啲食野方式分享比大家，好似食雞批咁，我通常就先將佢係中間切開一半，點解呢？因為首先可以睇到佢份量足唔足，二來可以知道佢個批身嘅鬆化程度，呢個係我個人小分享啦😉講返個雞批先，佢個批身係唔濕，乾身而且鬆化，唔會好似平時食果啲雞批咁，因為個雞餡啲白汁黏住個批，食落口一pat pat嘅感覺，所以批身值得一讚。雞餡夠足料，而且真係食到黑松露味，唔係果啲落左少少，連味到食唔到果啲，睇得出同食得出，無欺騙食客㗎🤣仲要講下佢地嘅雞批係用咗煙肉，唔係用火腿，所以食落去勁香，而且同黑松露都幾夾，鍾意食雞批嘅朋友真係要試吓，值得推介同回購👍

經過好多次，趁今日有少少時間今次終於入去試吓⋯因為勁多人，又唔夠人手，等咗好耐都冇人幫我落單⋯唔係好肚餓，諗住飲杯嘢咋⋯叫咗個菠蘿油+檸茶茶底唔係好夠濃，叫佢少冰都係好多冰😅不過菠蘿油有驚喜🤤除咗個外型脹卜卜又大大隻之外，個皮唔會硬骨骨，仲唔似麵包舖度買嗰啲咁甜👍🏻👍🏻👍🏻試咗佢個菠蘿包之後，買多半打啱啱出爐嘅蛋撻外賣😋😋😋***見到隔籬枱叫咗個酸菜魚，賣相都唔錯，下次都會去試吓

上次食過QQ包好味😋今日經開當然又想買多次。今次再試 雪山义燒包 & 凍奶茶 $10+$18。奶茶 茶味都可以，如果再濃點更好，奶適中所以令到口感幾厚身，以入樽新鮮奶茶來講，$18奶茶價錢都抵飲，又可以留明天先飲。麵包 依然軟熟但表面上的雪山偏薄所以口感差啲，入面嘅义燒都幾好食。但比上次買的麵包就比較普通，今次買平日夜晚少款啲希望再試其他。仲未有時間自己沖奶茶，唯有出外買但沖包裝或罐裝不好飲太甜，所以成日都望出面嘅奶茶成品。

朋友介紹嘅一間茶餐廳🍴佢話香辣魷魚公仔麵必試🍜今日出開旺角 見佢新開就試試佢😆•招牌秘製香辣魷魚公仔麵🍜$60配火腿奄列多士•雖然一開始有少少想食沙嗲牛肉麵🥹但最後都揀咗佢 依加好似好少搵到有水魷配公仔麵佢少少香辣都幾惹味啲魷魚係好食😋又夠爽☺️但個辣汁同個湯底有少少唔夾🥲•結論係 試過就好了下次都係揀翻沙嗲牛肉麵😂