影片
以上资料只供参考，请与餐厅确认详情
相关文章
已经差唔多试哂香港拉面既我，无论鸡汤、猪骨汤、酱油汤、盐味汤都钟意，未去到旅行时都可以系香港揾到接近日本味道既拉面，今次介绍既系算系香港第二主流既鸡白汤拉面，呢家唔再系猪骨汤盛行，开始有好多过江龙、甚至系本地既鸡白汤拉面店。面屋武系一间来自日本东京新桥既过江龙拉面店，香港店系2019年开业，系日本国内拥有12间店，海外亦都有10间分店，店舖主打浓厚鸡白汤拉面，香港分店仲有限定既蔬菜拉面同低糖质蒟蒻面，食素既朋友都可以食到美味健康既拉面。呢度既鸡白汤底都系系日本入口，同鸡肉丸同鸡髀肉叉烧一样，所以可以食到原汁原味品日式风味同啖啖鸡肉鲜味。面屋武一仲有提供迷你鳗鱼丼、章鱼烧、煎饺子等小食选择，尖沙咀系一个唔错既选择。每次我食过江龙拉面都会睇下日本本店既评价，日本最多人用、参考价值高既就系TABELOG，高过3.5分既餐厅已经系好好食，4分可能系日本最好食或者系米芝莲级数，所以当我睇到呢间拉面有3.72分，而且系同区第三名，就非常期待。香港分店系尖沙咀棉登径，系K11附近，近地铁站，所以好方便去到。店铺唔算大，疲情前去人流都有，近排去人流就无。店舖装修好有日式居酒屋风格。一个人去个时店员唔会比四人位你坐，只可以坐两人位，大枱留比多人，虽然当时舖内一个人都无。拉面既餐牌得一张，以鸡白汤底为主既有四款浓口味选择，分别系酱油丶盐味丶味噌同辣味噌，另外系比较清既鸡汤有酱油同盐味，可以跟套餐有炸鸡、啤酒，除左可以加配料，呢度有香港限定既低糖质蒟蒻面。另外一张MENU有唔同既日式前菜、串烧、炸物、饭类，另一页系唔同既饮品，好似麦茶、梳打、汽水、啤酒、日本酒。-1️⃣ 浓厚酱油拉面 💰88（👅: 8/10）特制配菜 +💰30呢个浓厚酱油拉面系佢地既人气招牌拉面，试到招牌既鸡白汤加上酱油，拉面份量唔算多，配料有葱、洋葱、紫菜、一粒小肉丸同两片鸡肉叉烧，如果加溏心蛋要加$12，如果加特制配菜会多一块紫菜、鸡肉叉烧、两粒免治鸡肉丸同溏心蛋。汤底用酱油同鸡汤混合而成，当中既鸡汤系用浓度达10度既新鲜鸡只熬制13个钟，再加上鸡骨、洋葱、蒜头、昆布等材料系日本熬煮成，再直运到港，保证原汁原味，汤头呈奶白色，饮落够浓厚，入口顺滑，质地唔系浓稠个种，鸡味鲜甜，同时间渗出淡淡酱油香醇味，酱油味唔会盖过鸡汤既鲜味，层次丰富，整体味道偏咸小小，不过可接受。至于面系选用日本小麦制成嘅直面，系类似九州既白细直面，即系大家系一兰食到个种，都系我最钟意既面质，虽然面条够幼，不过唔会煮到过腍，咬落爽口有弹性，软硬适中，挂汤能力正常，配合呢种偏重味少少嘅鸡汤就啱晒。鸡肉丸同鸡肉叉烧都系日本直送，鸡肉丸咬落肉质较松散，同猪肉丸既质感唔同，会食到淡淡既鸡味。而鸡肉叉烧有两块，系以鸡腿肉制成既低温炆煮叉烧，食落唔算鞋，幼软不过未算好嫩滑，食到阵阵鸡味，食落冇雪藏味，叉烧味道同拉面本身几夹。溏心蛋应该系最出色既配料，食落酱油味好香，够入味，中间蛋黄生熟程度岩岩，够流心。整体拉面份量唔算大，大食既人会食唔饱。-🌟食物质数黎讲算唔错，未到好惊喜既鸡白汤，但香港可以食到鸡白汤加酱油呢个配搭，确实得呢度先有。服务就正常，不过就唔可以好随心坐边就坐边。汤既质地无泓一个种浓稠，唔系鸟华亭好多鸡油个种，都唔系好CREAMY打成泡既座银/金鹤，都唔系FUSION既NOJO，系好正路既鸡白汤酱油汤，鸡味唔系最重不过如果钟意酱油既你可以一试，食落未算感受到Tabelog3.72分既好食程度，但算系我会ENCORE既拉面店，系我既总香港拉面榜TOP10。以下系我斋轮味道方面，香港嘅鸡白汤排名:1. 泓一拉面2. 鸟华亭3. 座银/金鹤4. 麺屋武一5. NOJO6. 立体派-👅味道: 8/10🍴环境: 7/10💰消费: $118 (服务费: 10%)
继续阅读
大伏，叫左碗东京酱油拉面碗野计埋加一，接近一旧水🥲难食，味咸，份量极少五啖左右就食完男仔一定唔够饱冇野饮包，得水都可以体谅间铺细，d位太逼都可体谅但难食，Staff态度又有问题🤨食一兰好过
继续阅读
平日lunch time 高峰时间餐厅都无客, 果然真系中伏。酱油拉面($75 另加一）份量比一般铺头细，女仔都不太够食，男人应该食完要另外3点3食tea先够。拉面味道吾系一般，而系非常难食，咸到似吞盐水，每一啖都要饮水先食得，都几夸张。估唔到尖沙咀装修日式既拉面店会咁差。仲要加一，呢个价钱附近任何一间餐厅质素都好佢成条街啦。非常不建议。建议见到要倒头走。服务方面，其实无服务可言，一般茶餐厅啊姐姐服务，无特别。
继续阅读
拉面控又带我食拉面🍜🍜唔系第一次食白鸡汤，但系第一次来面屋武一。呢度以鸡白汤底为主，有四款浓厚口味俾你拣：分别系酱油丶盐味丶味噌同埋辣味噌。为咗要试真D个🐔白汤，又唔希望太咸太重口味，所以点了酱油。爱辣的当然点了辣味噌🌶 另外见到有个combo, 有炸🐔 + 芥辣八爪鱼，包两杯冲绳🍺。我因为唔饮啤酒所以转了Highball 🍻个面份量不算多，配料只有葱，洋葱，紫菜，一粒小肉丸和两片鸡肉，溏心蛋要另加$12. 拉面条系我钟意果种，幼身有咬口的😃 汤底滑滑有鸡味而且不咸，有惊喜😁👍🏻辣果边就竟然食到出晒汗，话一大匙唐辛粉真系够辣。不过就把鸡味全盖过了😢 想专心叹个鸡白汤的要考虑下。Beer Combo $108 系包冲绳啤Orion 其实等于送份炸鸡件和八爪鱼俾你伴酒，都几好食😋 炸鸡个炸粉唔系硬身的，所以感觉无咁热气。棉登径依家好似变咗条日本街，好多日本食店。下次又有藉口再来了🤓
继续阅读
之前来开附近都会食一兰，今日想食拉面又肚饿，一于行去另一头揾下有边间唔使等位。虽然去到都要等一张枱，但都算好快。舖头唔大，但每张枱之间至少唔会太迫。讲食物先，拉面都算几抵，八十几蚊份量都足够。面质够晒爽口，叉烧啱啱好半肥瘦，溏心蛋一咬就流晒出来，正柚子梳打饮落几fresh，又唔会太甜，都好好饮啊﹗朋友要左咖喱薯饼，食落咖喱味好重，不过我嫌太淋，都系钟意一般薯饼多d整体来讲，拉面不错，喺尖咀绝对抵食，唔想喺一兰等位都可以过来试下仲有好多唔同来自日本的樽装饮品，见到靓靓包装特别想试p.s.员工态度都好好，过程中有询问我哋想唔想转台，方便畀后面3人入座，当问到转位𠮶度会唔会对正风位，佢都好老实答有一边会吹住，仲话唔紧要，留返原位都冇问题，令我哋感觉都好好。
继续阅读