霖記糖水

营业中

休息中

巳幫趁左一段短時間，每次也是買兩碗椰汁芋容露，因為芋頭容和椰汁配合冇得輸！又不是太甜，有時再埋加湯圓，簡直是大愛；但每次買回家，十次有七次都有甩漏，芋頭容正常有兩件，但試過數次比得一件、試過比錯大紙杯些小的小碗仔、幾晱食完！又試過只係比淨椰露，即係芋容連小量西米都冇！每次去買都要同店家返影上次甩漏的問題，講到我都覺得自己好計較！有次就陪返件大芋容比我！食糖水都係開心事，但每次附款後也滿足唔到人客的願望，其實好想問店家，一個小小的糖水，比齊材料個客有幾難呢？？人客總不能每次外賣也題店家比齊餸我吧！莫非每次也要打開碗糖水，撈下齊唔齊材料才收貨嗎？我每次比齊錢，但就得唔到消費者合理的東西！今日又是如此😡決定唔再比機會，以後唔幫趁就唔會有失望。

以前叫木子的時候已經成日食，好多年之後改名了，菜單也改了，份量也大縮水。味道也沒有以前好吃了。服務態度算還可以，很懷念以前的大碗豆腐花！芋圓都算好食，有口感，其他糖水正正常常，抹茶雪糕茶味濃郁，仙草q彈，整體沒什麼大問題，但份量有啲細碗，無咩特別驚喜。

入去以為要嗌咗先坐低，咁比完錢見佢張單打外賣就禮貌地同佢講聲係堂食，點知個侍應姐姐態度好唔耐煩 。落單個陣我都有望緊坐邊，不過侍應姐姐冇問，我又冇講咁兩邊都有誤會都明嘅。點知嘢食到個陣個侍應姐姐仲要好串講「下次堂食可以坐低先」，其實你唔滿意咪落單個陣禮貌提多句囉，又唔洗送餐個陣又講多次，好影響食客心情送餐速度係快嘅 因為我落單個陣冇其他客等 同埋D嘢食未解凍 芒果冰嘅又冇咩味 仲話係招牌款式….試過一次就夠冇下次🤢希望油塘快D開新嘅糖水鋪啦

一兜裏面有小芋圓同大嘅包心芋圓！勁多粒唔孤寒！而且包心芋圓粒粒裏面都包住勁好食嘅心！好煙韌！！！！！粒粒咬落去都好煙韌好爽紫米配埋椰汁呢個配搭簡直係無敵勁香甜！紫米勁好咬！我自己另外再加咗椰果！簡直係好食到喊！然後老闆娘唔記得比芒果雪泥我！仲特登追出嚟搵我勁好人！包裝好乾淨好企理！用紙兜好加分唔似某記某記既膠兜好容易漏👍重點係佢唔貴食完滿足感100分哈哈哈哈哈哈哈真係好好好好食好食到喊好耐無食到咁好食既甜品

上星期日，在大本型食左晚飯，諗住食啲糖水，記得有間糖水店喺商場，叫左碗芝麻糊，係灰色嘅，最緊要係唔夠熱同唔夠濃味，同行友人，叫左腐竹糖水，一樣係唔夠熱，味道亦唔夠腐竹味。不過，廿幾蚊一碗，算吧啦，得過且過，嚟傾計，其實幾啱嘅，星期日晚飯時間後，仍然大把位置，大約只有3枱客，非常啱晚飯傾唔夠，但仲想傾，廿幾蚊，若果換個角度睇，用嚟買個位置坐下傾計，免費送個糖水，咁你會覺得抵啲。不過要唔計較侍應姐姐態度麻麻喎，呢樣唔話你知喇，自己感受下，如果你會嚟的話，始終百貨應百客，或者有些客人鍾意對人粗聲粗氣，態度不可一世嘅侍應呢…我係唔會同身邊朋友講，大本型有間難食糖水店架，回家當發左一場夢。

叫咗碗芒果豆腐花+芋圓地瓜圓🥭🥭佢俾份野我就話啲芒果未解凍😑要等一等再食😓我睇一睇系全部都未解凍🫤全部都系冰仲要凍到黐埋一齊😨唔知等幾耐先解凍完。芒果融咗之後淋哂，成陣雪味，又好冰，仲要有啲冰水，勁難食😰芒果汁系豆腐花個調味，又少唔好食，成碗野都好差😥如果佢一早同我講系未解凍😮‍💨咁我就換第二款😒但系佢而家系直接拎咗俾我，即系逼我要食呢碗🙄有冇搞錯。我黎食仲要等啲野食融哂🫠會唔會太過份，體驗好差，呢碗真系好唔掂

重要嘢要講三次‼️——真心唔抵食————真心唔抵食————真心唔抵食——一碗糖水$40，新年無論外賣堂食都要加一，新年都預咗要使多啲錢，咁無所謂啦我哋係外賣自取，一拎嗰吓心諗中伏，個兜仲細過茶餐廳裝餐湯個碗賣得$40一碗糖水，我完全expect唔到係咁細碗，芋圓成碗得2粒大6粒細，返到屋企食，幾啖就無，食空氣咁下次都係唔好貪方便係商場買嘥時間行去芳彩食好過嗌外賣鮮芋仙貴少少都抵好多嬲，點解可以有人話抵食

夜麻麻食完飯心思思想食下一輪就揀咗呢間甜品店，十點半都仲有堂食，即刻就order咗兩個糖水試下。店員比既QR code原來係點唔到餐，要去櫃檯直接點先得。楊枝甘露呢個楊枝甘露十分足料，好似將成半個碌柚肉放咗入去咁，芒果幾都有好多舊，入邊仲有黑白珍珠，白珍珠比黑珍珠更煙靭，好大碗好抵食，下次會繼續叫呢個榴連龍眼椰汁露呢個比起楊枝甘露就遜色好多，榴槤肉唔太多，西米好多，入面嘅椰奶好甜，如果大家係榴槤控就未必滿足到

最近屋企嘅糖水，💰💰好平，質素又幾高下🪧仙草特盛 💰36可以揀花奶或者黑糖入面有好多料：仙草，芋泥球，大西米，三色芋圓，紅豆，椰果粒芋圓好驚艷我，唔係間間糖水舖嘅芋圓都好食嘅，之前有食過啲軟淋淋，全部係粉嘅芋圓🫠尼間芋圓好QQ😋仙草都好滑😍🪧宇治牛乳芋圓 💰35有雪糕球同芋圓，加宇治牛乳牛乳有香甜嘅奶味雪糕球係抹茶味嘅，唔會因為雪太耐而難食到！雪糕球好濃嘅抹茶味，鍾意抹茶朋友嘅值得來一試🥳🥳

🎊大年初七，人日快樂🎊寄予美好的祝福❤️係新一年祝大家生活美滿🎉幸福❤️甜蜜💗食返個糖水🤗☺️甜甜蜜蜜先霖記糖水📍香港油塘高超道38號大本型1樓132號舖試左呢間糖水鋪～價錢合理cp值高🙆🏻‍♀️叫左兩款糖水，味道唔錯👍🏻黑糖薑汁湯圓$26 ⭐️⭐️⭐️⭐️/5黑糖薑汁湯好濃薑味，食完勁暖身🤣湯圓係芝麻餡料來👌🏻唔會太甜同薑汁湯好夾👌🏻香草紫米芋圓$38 ⭐️⭐️⭐️⭐️⭐️/5係自家製芋圓～煙煙韌韌，口感唔錯👍🏻芋圓有幾款❤️當中原來有包心芋圓🥺好正配上香草味雪糕🍦同香滑的紫米露甜度剛好，整體好滿意👍🏻

諗住新年流流嗌個外賣點知嗌五個就少咗兩個都算拉因為其實可以退返錢 但係條友串到叫我落嚟拎返 如果我落嚟拎 我嗌網上外賣平台黎做乜 仲要好串態度又差 你自己打上去同網上外賣平台講啦 唔關我事㗎 唔關你事咁一定唔關我事係我問題啦

仲記得好耐之前，油塘唔係好多嘢食，難得開咗一間食甜品嘅舖頭，自己都特別興奮啦❤️嗰陣時最鍾意就係叫芋圓同埋豆腐花黎食，不過因為工作忙咗，所以都少咗好多時間去食lu😂🙈-難得有一日早咗放工，於是外賣叫咗一碗宇治抹茶芋圓同埋心太軟返屋企食🤣🙈點知一拎到上手就俾佢嘅size，真係估唔到而家變到得返咁細碗，一個人食都會唔夠喉呀。不過好彩嘅係佢嘅味道冇變，依然唔錯，心太軟亦都成功整到流心嘅效果，如果分量大返少少就好了

油塘人口不少, 居民年齡層也闊, 而且新樓不斷起, 可惜除了芳彩和這家霖記外, 就沒有其他甜品或湯水店, 這蠻可惜的. 人流而言, 在油糖中心的芳彩人流較多; 但論環境乾淨和舒適而言, 身處於大本營內的霖記, 更能吸引到我.在說其甜品質素之前, 首先對於在人流和點的甜品數量不多時, 待應依然執錯單感到有點驚訝. 本身已經包裝好, 還以為回家能夠品嚐, 但打開包裝, 卻發現兩份甜品的提單編號是不一樣的. 店家收到投訴就立即退款, 在後續的處理手法上沒有什麼批評的地方, 但店員的警覺性真的要提高一點.說回其甜品, 它主打手工芋圓和湯丸, 湯丸皮薄餡大多, 合格水平, 但芋圓口感甚硬, 咬下去的Q彈感不足, 味道正常. 反而送錯的龍眼馬蹄爽的馬蹄口感爽實, 沒有在煲完之後糊化, 再加上龍眼的清甜, 比起宇治牛奶吸引. 三十多元的甜品, 用細紙杯包裝, 在份量方面偏小, 不夠物有所值就是.

食過好多次外賣，每次都keep到水準！水晶龍眼露個湯(?)底偏甜但好濃龍眼味，加上各樣煙韌配料剛剛好。本身料唔算太多，加個和風白玉就完美！豆腐紫米芋圓既豆腐雪芭幾香，紫米又香又軟糯，加埋椰汁好唔錯。芋圓蕃薯圓都有芋頭蕃薯味，雖然係外賣，但口感都煙韌有咬口。推薦！

難得來到油塘和家人吃完生日飯，特登找附近有沒有特色甜品，本身是芋圓控，一見這間有賣芋圓，二話不說就來試試餐牌選擇都頗多，適合三心兩意的我，最終點了豆腐紫米芋圓和冰鎮芒果仙草+芋圓，總數只是$77，好抵食！仙草不是太滑，介乎仙草與涼粉之間，芒果是雪冰了的口感，剛巧芒果有點酸，所以幾開胃，若不是另加了$10芋圓，其實整體有點寡和乏味，不夠豐富芋圓不錯，有咬口夠煙韌，值得試反而豆腐紫米芋圓超有驚喜！初頭以為是豆腐花，原來是豆腐花雪球，豆味香，不太甜，好好味！紫米露又香滑，甜度又是剛好，整體好滿意，加上芋圓中原來有包心芋圓，食得好滿足下次來油塘一定會再幫襯