影片
以上资料只供参考，请与餐厅确认详情
适逢圣诞假期专程到元朗食【和菊】，未去先兴奋，见好多好评，就拣左佢。笔者早年于香港、日本、英国都到访过不同铁板烧餐厅，总括而言，【和菊】虽于食物上表现平平，服务态度尚可，但自家制梅酒为利餐加分，比个ok喇。 图为店内环境，当日全埸有约莫十位共四台客人，但只有一名师傅煮食🥺令笔者同友人大感惊讶，也可能因为当天是红日吧。预约订坐成功后，餐厅和预先联络客人询问当日想点嘅餐，笔者同友人就选择左。到访前一日中午，餐厅致电笔者表示套餐中嘅白贝好多沙，故此为我地转其他食材，唯所提出食材并没有合适，因此负责人说用餐当日再比我地选择当日食材。当日入坐后，负责人表示锅烧法国黑鳕鱼已没有采用锅烧，略为失望，而餐厅也未能让笔者选择替代白贝的食材，因负责人表示厨帅昨日已用特别方法处理白贝。食物方面：是日前菜为沙律，用粟米蕃茄沙律菜拌沙律酱组成，平平无奇，粟米清甜但有点出水， 未够新鲜。 第二道菜为清酒煮白贝，由第二位厨师于厨房烹饪，未知制作过程。汤底𣎴错，鲜味重，可惜白贝有沙。向负责人反映，他竟然说：「已经话左比你地知有沙，天然野系咁，叫左你地转第二个餐。」笔者感到非常错愕，确保每项食材质素是餐厅的责任吧。因白贝有沙，笔者只吃了一个白贝便没有再吃。还在为餐厅负责人的话感到错愕同时，厨师立即为笔者临时更换为煮蚝。蚝味道鲜味饱满，充满海水味，一赞👍 第三道菜是该店招牌菜，烟熏帆立贝，师傅先煎香帆立贝两边，及后用胎菊加糖烟熏。帆立贝充满菊花的温和香气，入口清新，配上菊花海藻啫喱同食用级鲜花，不错，美中不足是帆立贝过熟，有点韧。第四道菜是南瓜忌廉汁黑鳕鱼，也是笔者全餐最喜欢的，师傅先把鱼鳞煎脆，再慢煎鳕鱼肉，鱼肉入口鲜嫩，油脂充分锁系鱼肉中，好食！南瓜汁过甜🥺第五道菜系黑毛猪同A4和牛，笔者同友人各点一款试。黑毛猪肉味唔太出但拌以金山寺味噌食会增添风味。友人嘅A4和牛选了五成熟，但友人表示都系有点过熟，幸好肉味同油脂分布平均，都算不错。和菊自家浸梅酒好饮，68蚊一杯，可以一试！❤炒饭平平，冇乜特别，值得一提系，白饭鱼苗系餐厅亲自制作👍味噌汤唔太咸，入口容易👍/抹茶红豆雪糕，味道还好，可惜冰渣比较多，不太软滑🥲
继续阅读
假日去行街食饭如果想去远D, 多数都会拣元朗, 可能因为系旧区吧, 食肆选择多D, 亦都比较多唔同种类既店舖可以行逛下。今次拣左食铁板烧, 我好少会拣去帮衬食铁板烧, 如果想食热气野会prefer打边炉, 再者, 有厨师席前料理的铁板烧并不便宜, 就算午市都要起码$500一个人, 但如果我想食好D就几乎一定系拣食西餐, 坐得舒服D, 食物摆盘又靓D。今次因为上两星期纪念日已经去左食铜锣湾既Roganic(感觉麻麻), 所以今日决定转下口味同揾左呢间定价比其他铁板烧店相宜的铁板烧和菊。餐厅面积都几细, 无限时, 同一时间只SERVE两组客人, 当天LUNCH就只有我地两个同另外一组都系两个总共四个客人。虽然后面有间房, 但我见放满文件, 有客人WALK-IN都话已经满座。一个午餐时间只做4个客人既生意, 又无得好似其他餐厅咁做埋外卖, 维持收支平衡不容易吧。我地都点左和菊极尚午餐。 是日前菜 - 各式新鲜蔬果加沙律酱, 尤其爱吃香甜的青苹果同粟米🌽。季节强肴 - 用菊花烟熏带子, 厨师👨🍳话可以撕开一瓣瓣的菊花来配带子食。烟熏过后的带子, 入口带有淡淡的菊花清香(跟香港人经常会饮既菊花茶味道有几分类似)。觉得厨师可以落多少少盐同埋个人觉得唔使烧得咁熟。最后仲有一杯菊花啫喱收尾, 味道同样天然清新。鲍鱼配海苔汁 - 鲍鱼煮得爽脆弹牙, 喜欢厨师加入左味鲜浓郁的三文鱼子以丰富口感。 法国鹅肝配意大利黑醋汁 - 鹅肝厚身肥美, 新鲜无臊味, 烧得外脆内软, 不错。但爱吃鹅肝既我就有点妒忌老公𠮶块明显大块过我(无影到老公𠮶份鹅肝), 餐厅应该要留意呢点, 食材要平均分配同埋多士可以再煎脆少少。美国顶级牛肉薄烧伴温室野菜 - 唔韧有肉味, 最加分既系餐厅使用日本盐昆布作调味, 用烟韧的盐昆布代替盐, 食法新鲜又能带出牛肉的鲜味, 不错。蟹肉炒饭 - 厨师话姜米烧饭转左做蟹肉炒饭, 唔食姜既我表示非常lucky。蟹肉炒饭表现正常。最后的味噌汤, 渍物同甜品质素不错, 天然顺口的味道, 尤其绿茶雪糕, 将大粒有咬口既红豆加入茶味甘醇的绿茶雪糕里面, 为入口即溶的雪糕带来多一个层次口感, 好味。对铁板烧和菊最大的感受是餐厅严谨把关每一种食材, 由头盘到甜品, 保证每一道菜色, 客人都可以品尝到最新鲜无添加的味道。 不过唔知大家有无发现, 呢篇食评，每一道菜，我基本上都只对佢哋嘅食材作出评论，因为，佢地既调味酱汁真系没有为客人带来什么记忆点。建议餐厅调较一下酱汁的使用份量, 新鲜的食材也要有适当的调味作配合以将食物的优点发挥到最大。
继续阅读
光顾了午餐。除了一些瑕疵，价钱与食物质量尚成正比，真心不难食，但又唔系好特出。今天很多铁板烧店都在提供差不多价位和内容的午餐，可惜和菊暂时未能在一众同侪中脱颖而出。佢嘅优势系处于元朗住宅区后巷，班街坊若唔想长途跋涉出市区食铁板烧嘅话，可以选择呢度（但同区都仲有两三间差唔多的铁板烧小店)；相反如果你住喺市区就唔使专登入嚟食了。先讲食物，除了以下几样，其他野是不错的：烟熏带子❤️❤️❤️🤍🤍这儿的招牌菜。带子稍为煎香就放在左上角的煲仔度烟熏，可惜食唔到烟熏的味道，打开煲盖嘅时间亦无一团烟来增加视觉上嘅效果，但煲仔入面嘅温度已经令到件带子变得又老又干。图中是食用菊花，老实讲整咗两片菊花瓣同埋带子一齐食唔觉得有乜特别，另外果杯系菊花味嘅啫喱，系咪同带子一齐食定食完一样到一样，冇人同我哋讲。煎鹅干❤️❤️🤍🤍🤍摆盘几靓，用呢只碟颜色都很漂亮。同带子刚好相反，上碟嘅时候鹅干个心唔够热。炒龙虾球❤️❤️❤️🤍🤍海胆汁正，配鱼子酱及三文鱼籽亦出色，讃！但系龙虾偏干，唔够juicy。问题系每人有半只龙虾的，点样要切开来炒？切开来炒容易干，唔够原汁原味，仲有当时师傅系炒紧六人份的龙虾，捞堆嚟炒再上返六个人嘅碟，数量应该是一样的，但难免一碟旧旧大，一碟旧旧细。当然切开来炒比较入味，但新鲜龙虾的鲜味如果被浓厚的酱汁掩盖了就反而是喧宾夺主了。美国牛薄切❤️❤️❤️🤍🤍冇乜问题的，间间都系咁做，但系就有啲地方煎到外面香口入面仲系嫩嫩地嘅，有啲店就系拿捏唔到。但系佢嘅盐渍昆布(右边起第二堆)味道咸咸酸酸配上牛肉不错，赞。白饭鱼仔炒饭 ❤️❤️🤍🤍🤍今时今日好似系人都知炒饭最紧要就系粒粒分明，和菊师傅梗知，佢仲要200%完成，即系点？咪干到飞起啰！我见住佢炒本来好吸引的，但系当佢越炒越兴起我就心谂赖嘢了，因为佢唔系剩系炒俾我地，所以又唔好意思叫佢停手唔好炒。唉！我一食就正如我所料咁干，放低成碗冇食心谂侍应又好厨师又好都会问下我有乜问题啩，事实证明我谂多咗，佢只系嗱嗱声同我执枱😅😅。讲开服务，佢所有嘢都有deliver到的，但就系唔够贴心，好似呢度嘅食物咁，就系争少少。又讲下位师傅。其实你去食sushi又好，teppanyaki又好，坐喺bar位你想遇到一位口水多过茶定系沉默寡言的师傅呢？我谂呢样野十分见仁见智，但系有一点肯定嘅系，坐喺吧位的客人都不会与同行人大谈私人野的，因为距离师傅和其他客人太近。咁如果师傅又冇乜声气，人客又唔自己倾计，加上食成个几两个钟，都咪话唔闷。如果师傅能够边做边讲下啲食材、产地、烹饪技巧，甚至乎一些工作上的笑料，和客人打成一片，咁就最好了。系啦，坐左成个几钟，食物呀服务呀差少少，加埋个粒嗲都冇嘅师傅都冇乜问题，最难顶系乜？大热天时唔多够冷气呀！好自然望下天花板的两部冷气机，唔望由自可，一望差啲笑左出嚟：一旧旧尘痴住喺冷气度，唔惊跌旧麈落嚟加𩠌咩 😂😂😂？心中暗叫好彩冇被安排坐在冷气底，但亦担心其他两组客人😅😅😅。真心建议大厨可以分少少炒饭的时间和心机在开店之前抹下冷气机－搞搞最基本的卫生。
继续阅读
元朗愈来愈多日本料理，想食熟海鲜，始终要揾返铁板烧，今次试下呢间，平时经过都睇唔到嘅板前料理。店子小小，连包箱只有十多个座位，常满座，walk-in 一定无位，要预早订座。职员态度十分主动，会为客人设想，提出适当建议，令人感觉亲切舒服。今次我们一行三人，豪一点，要了两个二人餐。HK$1,280是和牛极尚二人午餐，有宫崎 A4 和牛或伊比利亚黑豚。另一个好抵食的是HK$880龙虾二人午餐，伊势海老配秘制海胆忌廉汁，龙虾头也不浪费会用来煮味噌汤，特别鲜甜。两个餐都有北海道特大帆立贝、白饭鱼苗姜米烧饭、沙律、红豆绿茶雪糕等，多道菜色。另外还影了隔离枱叫的HK$368鲍鱼鹅肝极尚一人餐，还有HK$298车海老大虾一人餐，非常丰富。师傅手势相当纯熟，铁板烧功架表演，边吃边看边闻，全方位4D享受。食物用料上乘，龙虾与鲍鱼都是活煮的，影片中可以看到还在动，非常新鲜。见到自家浸制的梅酒，也试了一杯，味道清甜，容易入口，配午餐海鲜一流。整体用餐经验感觉良好，以 Omakase 一半的价钱，享受到板前海鲜料理即席表演，性价比十分高！
继续阅读
我去过好多地方，试过好多唔同日本铁板烧，铜锣湾、天后、中环、湾仔、尖沙咀同埋包括埋日本，咁其实每一间铁板烧都有各自嘅特色嘅、有唔同嘅味道。但系我偏偏喜好和菊。大厨Kenny 同Gary调节味道更好选取食材、调味汁嘅调教，样样都恰到好处。摆盘亦都非常精美，好少试过食一餐饭，每一个菜都各有特色，都值得称赞。甚至你可以同佢倾有乜嘢你唔想食，想转其他亦都可以。不过，一个晚餐，你起码要预计两个小时先会完成，所以建议大家6:30pm ，甚至6:00pm就要开始啦。佢哋唔系成日开嘅，所以要预约，唔系咁容易约。当然，午餐会比晚餐较为经济，性价比亦都非常高。咁琴晚我就试咗佢个晚餐，相比喺市区食，呢个价钱一定食唔到，我亦都帮衬咗佢差唔多五至六次啦，水准上亦都非常稳定，我先而家写呢篇食评。好多谢佢哋呢个团队包括Kenny, Gary, Benco同洗碗姐姐。继续加油啊，感谢你哋。
继续阅读