金鳳大餐廳 (新都城中心三期)

营业中

休息中

星期六去住係寶琳既朋友屋企玩，夜晚落去食飯，正當苦惱要食啲咩既時候，咁岩就望到一間叫做金鳳大餐廳既懷舊鋸扒餐廳，於是同朋友互望左一眼，睇黎英雄所見略同，襯仲未咁多人要排隊時即刻衝入去.快速地望一望餐牌後9秒9決定到想食咩餐.朋友叫左個牛柳餐加升級海皇焗酥皮湯！我就叫左個香煎雞扒餐加羅送湯！羅宋湯微辣，加上小小酸酸地，食落特別開胃！海皇酥皮湯皮脆湯暖，食落真係好有懷舊既感覺！今次叫左一個碟上一個鐵板上，試下唔同既體驗！雞扒份量夠大，切開後肉香撲鼻，食落嫩而不柴，真係忍唔住一舊接一舊係咁食！牛柳係本人至愛，貪佢夠嫩滑，五成熟既口感將牛柳既肉質發揮得淋漓盡致！好耐冇食過一間咁好食又有懷舊感覺既扒餐，推薦鍾意食扒既朋友仔試下👍🏻

懷舊港式扒房 莫過於金鳳啦🥰佢個鐵板餐簡直係我嘅童年回憶之一呀寶琳早排就開左間 今晚又同老媽子撐下枱腳 俾佢回味一下先🤪▫️招牌牛柳餐🥩 ($144)鐵板餐係今日嘅目標！套餐有餐包、西湯同埋野飲餐包好耐無食過啦夠熱 送埋個白湯好滿足出菜速度都好快 牛扒放低左之後 馬上有店員過黎淋汁👍 五成熟啱啱好肉質好腍 肉味夠 仲有好耐無食嘅波浪薯條🍟 真係好懷念🤩▫️香燒羊扒餐 ($174)好少食羊扒 份量都好大 有3隻羊味好濃😍 揀左蒜蓉汁好香呀 肉厚夠juicy👍 見到枱枱都炸炸聲 真係好有氣氛😍 佢另外仲有每月特選晚餐係幾吸引 目測係最多人嗌嘅餐😗 有沙律仲有甜品堅抵食👍

心思思又想再鋸扒, 睇咗好多間最後揀咗金鳳, 聽就聽得多, 今次第一次食🙊嗌咗美國安格斯肉眼同帶子西冷牛扒, 兩個餐都升級咗酥皮湯安格斯肉眼牛肉味重啲, 兩塊都好淋, 一上枱可以揀黑椒或蒜蓉汁, 我哋揀咗黑椒, 一落汁鐵板就滋滋炸炸, 好味道好正, 我見侍應落單個時枱枱都會問客人加唔加蒜 menu有寫加蒜更加好味🤔下次有機會再試下加蒜帶子西冷嗰個仲有雪糕同沙律, 好飽肚, 我覺得唔洗升級酥皮湯都ok, 除非你好鍾意酥皮湯酥皮湯上面個酥皮比較難拆嚟食 食到有啲「論盡」

又去新都城，今次去”金鳳大餐廳”。餐廳名好似茶記，其實係類似”花園餐廳”、”扒王之王”、”哥登堡”咁，以食港式扒為主。咁當然會有大量差唔多樣嘅set，而午餐set係明顯比較平的。舉例，今次叫的午餐set鐵板牛扒帶子，正常食要170多，但午餐只要148。帶子鮮嫩有彈性，牛扒就過熟(叫5成嚟到差唔多well done)，但肉質不錯，起碼不是用梳打粉”拿”到爛晒嘅牛肉，係真係似一塊平時買到嘅西冷。另一份叫咗main Menu上面嘅牛柳餐。牛柳無論肉質同味道都喺西冷之上，但就冇咗西冷嘅油脂感。而配以佢嘅黑椒汁，表現甚至好過佢嘅蒜蓉汁。餐包同餐湯就好Standard ，所有set都會包。最後要留意餐飲凍飲唔使加錢，所以都會盡量叫凍飲😅。

最近同屋企人去咗金鳳食晚餐，好耐無食呢種平民扒房，覺得抵食又惹味，好有驚喜！呢度主要都係套餐咁嗌，包扒、湯、餐包同飲品🥩 想講野食真係上得好快，超有效率！員工會喺客人面前倒醬汁，一倒就滋滋聲、勁香！我地嗌咗招牌牛柳餐($144)同貴族牛扒(美國牛肩肉)餐($218)，兩款都大份到好誇張😳牛柳有兩大件，肉質超腍！而牛肩肉係腍嘅同時有咬口，邊位焦脆，肉味比牛柳重🐮 建議大家加蒜蓉，會香上加香🤩 配菜有薯格同脆玉瓜～ 食完成個餐真係超飽🤣雖然係平民扒房，但呢度環境都好新淨好舒適，員工態度都唔錯，食完已經想encore🤣

今日想同屋企人据扒,上網搵資料見哩間店都多人好評,又見屋企附近就有,所以就去試下啦我地分別叫左3個扒餐~經典牛柳鐵板餐跟餐包 & 羅宋湯 & 薯條 & 飲品羅宋湯好飲牛柳肉淋既,但無咩肉味,肉質都唔知點形容~美國安格斯肉眼扒餐跟餐包 & 忌廉湯 & 薯格 & 飲品忌廉湯都OK美國安格斯肉眼扒本來叫佢碟上,但侍應寫漏左扒偏薄,肉質都無咩特別食晒成個餐都唔飽~每月特選晚餐跟餐包 & 加錢改酥皮湯 & 沙律 & 飲品 & 雪糕~海皇酥皮湯酥皮未焗起咁,湯同忌廉湯味道差唔多,係多左d沙鮮粒蟹籽雜果沙律味道正常既帶子西冷牛扒帶子同西冷牛扒都明顯食到比梳打粉醃過既味道,而d肉質我唔識點形容食到一半我地都放棄左意大利配方雪糕可以話係全餐最好食其實3個餐都唔平,但真係好唔值

今日想食牛扒，經過將軍澳金鳳就入去食。叫左個安格斯肉眼餐，姐姐問我碟上定鐵板上，我選左碟上七成熟。過左一陣來了個白湯，湯夠熱味到正正常常。在我差吾多飲完湯時，牛扒來到了。望一望，來左一塊薄薄既牛肉，同大xx夜晚扒餐D牛扒咁薄。吾理啦照食，因我通常外岀食野都吾會換，費事比人加料。食落更加吾對路，塊牛肉系凍架，少少暖都冇。應該系一早煎定放響道，甚至系蒸熟，因為都冇咩金黃色。從食落質感同外觀完全吾覺系一塊肉眼扒。食左一半左右，都系吾食了，埋單走人。比左錢之後同個部長反應，個部長好晦氣同我講話佢地肉眼扒系即煎既，一定吾會凍。跟住我話我錢都比左啦，屈你有咩用。佢先冇出聲。扒就肯定系整定，用鐵板上就吾覺有問題，偏偏我今日用碟上，個厨又on居，咁都吾翻煎一下。

👨🏻‍🍳金鳳大餐廳 (新都城中心三期) (將軍澳)📍將軍澳寶琳貿業路8號新都城中心三期地下G19-20號舖 「多年無食，味道依舊讓人懷念」 👍🏻🍽️招牌牛柳餐 $138鐵板套餐附有餐包餐湯 （揀左忌廉湯）牛柳3成熟，嫩、腍🤤（黑椒汁）配有薯菜，枱上有茄汁凍檸水 （茶餐廳既凍檸水🤤） 夜晚人氣滿滿，等左15分鐘左右，系吾錯既鐵板餐廳🤤 #金鳳大餐廳 #香港鐵板餐廳 #香港鐵板餐 #鐵板餐 #香港鐵板 #香港懷舊餐廳

🌟整體評分: 9/10🌟❤️味道：9/10🧡環境：8/10🩵服務：9/10💚性價比：9/10💗小朋友喜愛度：9/10經過寶琳，望到金鳳個大招牌醒起真係勁耐無食鐵板牛排啦！即刻跑入去啦！午市有個鐵板西冷牛扒加大頭蝦，配埋餐包，餐湯同飲品（凍飲仲要唔洗加錢！），只有$158🥩癲！小朋友第一次鋸鐵板牛排，所以未上餐已經教定佢點用餐紙應付彈到飛起既汁😆鐵板一上枱，開邊大頭蝦擺到龍蝦咁靚，淋上超正黑椒汁 / 蒜蓉汁，鐵板夠熱，真係咋咋聲，小朋友好興奮！大頭蝦新鮮爽口，牛排香口唔韌，墊底薯菜吸哂汁，最緊要記住加$2 加蒜蓉呀！正到飛起！

晚市勁多人等位，所以今日特登午市時間嚟中午都有鐵板扒食，而且午市扒餐仲有88折✌️先上餐湯和餐包，餐包香軟熱辣辣，擦上牛油超正，羅宋湯真材實料，配有椰菜、紅蘿蔔、青椒、洋蔥等，番茄味好濃郁，微辣😋T骨牛扒餐～塊扒超大，大過個鐵板，選了黑椒汁，香味四溢，肉質極為幼嫩，油脂分佈均勻，牛味相當濃厚，配菜有翠肉瓜和粗薯條👍天婦羅鱈魚塊配青咖喱汁（午市套餐）～天婦羅炸漿薄身，口感輕型，外脆內嫩，青咖喱香噴噴，辣得不一樣👍

今晚諗唔到食乜，經過金鳳見到唔使排隊就即刻入。呢間金鳳係新開，環境好好同埋好乾淨，坐得舒服。扒嘅種類好似比之前選擇更加多咗！《美國安格斯肉眼扒餐》$202套餐跟餐湯、飲品，仲有餐包！好鍾意佢哋嘅餐包，好軟熟好好味。忌廉湯味道都唔錯。今次肉眼扒揀咗黑椒汁，扒好juicy，筋同埋脂肪都唔算好多，煎得又淋，同埋黑椒汁真係好好味！仲有薯格添。《每月晚餐A》$178帶子西冷牛扒，同樣揀咗黑椒汁，個人比較鍾意西冷，因為嫩啲肉味冇咁重，好正。呢塊西冷好軟嫩。 總括嚟講，金鳳仍然係平民扒房嘅Number one，下次會再嚟幫襯。

舊同事搬咗去將軍澳，今日趁有時間去探下佢，之後一齊去食晚飯，佢屋企附近有間金鳳大餐廳，主打港式扒餐，出名大件夾抵食，餐廳地方整潔，座位舒適，招呼週到。扒餐附送餐湯、餐包和指定飲品，飲品亦可加錢升級特飲。餐湯有羅宋湯和忌廉湯選擇。餐廳最近推出加$25可以升級海皇焗酥皮湯，試過真係唔錯，酥皮香脆，奶白色的湯加埋海皇材料，味道更富層次。忌廉湯綿滑香濃、餐包軟熟，塗上牛油更美味。用熱辣辣嘅鐵板盛載上枱嘅扒餐，份量十足，店員把黑椒汁淋上後，立即發出滋滋聲並有煙冒升起，隨之而來就係香味撲鼻。（除咗黑椒汁，還有蒜蓉汁）鴛鴦扒餐：豬扒和雞扒都係厚切，大大塊幾乎蓋過整塊鐵板，肉質鮮嫩，沾滿黑椒汁超惹味！香煎雞扒餐：兩大塊雞扒煎得好香，啖啖肉好好味，配菜有薯條同脆肉瓜，吸收左黑椒汁味道更佳。餐飲凍奶茶：茶味濃郁、口感滑順。雪糕紅豆冰跟餐$18，紅豆林甜，奶味香濃，添加一球雲尼拿雪糕更甜美香滑。

今晚天氣濕濕凍凍，想食港式扒房鐵板燒，就嚟咗金鳳大餐廳嚟咗呢間餐廳咁多次都未食過羊，今晚終於叫咗香燒羊扒餐（七成熟）、香煎雞扒餐、吉列手指魚、配一個紅湯一個白湯、再加兩杯餐飲呢間餐廳百幾蚊一個羊扒餐，羊肉嘅份量極之慷慨，有四至五大塊，燒得惹味香口之餘又唔會過分油膩；至於燒雞扒一如既往嫩滑又酥脆，配埋粗薯條同翠玉瓜，令人胃口大開；吉列手指魚鮮味可口，一碟有五大條，令人有意外驚喜金鳳大餐廳定價平民化，食物份量充足，味道出色，值得推薦#金鳳大餐廳

將軍澳開咗間金鳳，終於搵到時間嚟試下，下午茶時間都有午餐同扒餐供應，我哋揀咗兩份下午茶餐，一份午餐。其中兩個餐有湯同餐包，湯比較重味精，包好軟熟。馳名一口西多士，夠厚，不過我覺得唔夠糖漿，有啲乾。鐵板薄西冷牛扒餐，呢個幾好呀，牛肉好嫩。車打芝士醬燴大蝦意粉，剩係好重芝士無其他味，真係食唔落，所以我剩係食咗幾啖同食晒蝦仁就無食。值得一讚嘅係見到咁嘅情況，餐廳會主動了解，有位職員見到完全無點食過，問係唔係食物有問題，我話唔係，係唔啱我口味，唔關你哋食物事。

🍽️🍲😋 金鳳大餐廳 廣東話食評 😋🍲🍽️📍 地點：將軍澳新都城中心，方便到爆啦！💡 氣氛：金鳳大餐廳嘅港式鐵板風格，令人感覺好親切同埋舒服。🍲 主菜：晚市套餐 🌃🍲點晚市套餐真係抵食！首先有紅/白餐湯，湯頭濃郁，令人暖心。再加埋餐包，鬆軟嘅口感真係令人愛不釋手。雜果沙律清新又開胃，有啲酸甜嘅味道。最重要嘅係西冷扒，火候掌握得好好岩岩5成熟，扒面金黃香脆，肉質嫩滑多汁。配埋蒜蓉醬汁，真係一絕！整個套餐份量夠飽，令人滿足！🌃🍲😋👌🍲 主菜：經典牛柳鐵板餐 🥩🍲如果你愛牛肉，一定要試下呢款經典牛柳鐵板餐！牛柳煎得剛剛好，肉質鮮嫩，每一口都係享受。鐵板底部嘅黑椒汁煮得濃郁，融入牛肉嘅味道，令牛肉更加美味！再配上蔬菜同薯條，真係食得好開心！🥩🍲😍🍹 嘢飲：凍檸茶少甜 🍋🍹我叫咗杯凍檸茶少甜，真係解渴又清新！檸檬味道香濃，加埋少少甜，茶底做得幾好。飲落去好涼爽，好適合喺呢個夏天飲！🍋🍹🌞金鳳大餐廳係將軍澳新都城中心嘅港式鐵板餐廳，提供抵食又美味嘅晚市套餐同埋經典牛柳鐵板餐。佢哋嘅菜式煮得得心應手，味道正宗，令人食得好滿足！加上凍檸茶少甜嘅嘢飲，真係一餐餐滿足！如果你鍾意港式鐵板菜，呢度絕對係你嘅首選