影片
有日问同事深水埗边度可以买到粢饭做早餐，同事就推介咗呢间金豪粢饭豆浆店。今日终于心血来潮过到嚟买几件粢饭返公司同同事开心share。呢间粢饭豆浆专门店系一间旧式老舖，主要系售卖中式早餐，开朝八晚八，星期日休息，好彩时间都啱晒我呢个上班族过嚟帮衬。柜内放咗唔同嘅小食，其中当然包括咗我最想买到嘅粢饭。最后就买齐晒四款粢饭返公司。每件粢饭都非常饱满而且扎实，见到都想即刻试。首先当然系试咗个原味先，里面有油炸鬼、榨菜丝同肉松，攞到返公司仍然热辣辣，香喷喷，味道正宗。另一私心推介就系紫米粢饭，馅料其实同原味系一样，而佢就用紫米代替糯米，淡淡都充满咗紫米香，呢个粢饭味道与别不同又好好食。另外亦都有红米粢饭，不过红米相对地就唔及紫米嘅咁芳香。最后就系素肉松粢饭，始终系素肉松，味道就比较清淡啲，属于健康之选。其实呢间金豪仲有其他中式早餐可供选择，而且又好近我返工，所以我会多啲过嚟买个丰富嘅早餐，为辛劳嘅一天打打气！
继续阅读