輝煌樓海鮮酒家 (已結業)

行過油麻地，見到這間酒樓樓下貼住任飲任食2.5小時108蚊，心諗都ok，一行五人上去試下，地方普通，枱同枱都算有空間，睇下嘢食先，一般大路嘢，肥牛，丸類，蔬菜，魚類都有……肥牛無味……貢丸，牛丸普通…… 鯇魚片 ，鯇魚腩最新鮮，好味……鮮蝦都幾大隻，仼食……青口就普通d……飲品方面，有Ice啤酒,罐裝茶類，康師傅……其他汽水(可樂，雪碧，橙汁)就要收十蚊一罐……湯底有豬骨湯，沙爹湯 幾款，味道普通，純粹想食飽既可以試下。p.s.千萬不要去酒樓洗手間

十月十四日-我老豆係依家酒樓擺大壽，擺了四圍，間野好有問題，問題如下：1)服務態度很差，我一去到，老人家同我講好凍，咁我叫個部長關細少少，佢態度勁差話"你想點呀，一時話開大啲，一時又話關細啲",我話咁依家老人家凍吖嘛",佢死死地氣攞搖控話開到二十度2)我老豆擺大壽，個職員個電話鈴聲居然係＂梁山伯與祝英台＂，想點呀3)個職員係我地面前係咁鬧個下屬，鬧係冇問題，但唔應該係我地面前鬧，喜慶日子囉4)我個套餐有＂一打＂壽包，佢居然比八個我地，我地同佢講，佢係第二籠"用手"拎四個比我地囉，點食呀，仲要啲包唔熱囉，有啲仲未蒸添囉5）我個套餐有生果包埋，佢可以同我講冇生果囉，大佬，一早book 左，你唔係應該預留比我地嘅咩6)糖水，好明顯唔夠紅豆沙，溝大量水比我地，變左紅豆水，有一枱冇添，變左蕃薯糖水擺大壽擺到咁，好唔開心囉，一肚氣，野食唔好味都算，服務點可以咁架，五千幾蚊一圍，咁嘅質素，唔會再黎食囉

昨晚去打邊爐！食物差隨意擺張大台到！野飲選擇少！話明2.5小時時間！但收銀提早埋單！埋左後還有餘有半小時！去羅野飲！比個收銀系到喝！已埋單唔可以再羅野飲！對於常打邊爐的我系非常不滿！亦建議大家不要去這地方食野！還有一提洗手間好髒………

茶介全免，13：30 開始大，中，小一律$15.80 特24.80，頂$27.8休閒孖寶A$21.80, 歡樂孖寶B$26.80偶然的機會發掘了這間街坊酒樓, 中午上來大部份茶客是上年紀的阿哥阿姊, 服務是半先助式, 自己揀位座低,等阿姊得閒會來招呼, 完全自由搭枱制, 如果去慣現代酒樓的新一代可能有點唔習慣, 是日週末跑馬日一大枱似乎經常來的哥哥全是一至兩個的散客坐埋一枱論馬,騎師,馬房, 有人叫盅飯有人叫一/兩個點心邊芝嘆茶邊評馬, 對他們(馬迷)來說未嘗唔係一件樂事,留意到有好多一班人來的都會叫一個點心拼盤, 拼盤內款式算多又唔會只有包包,另外還有 休閒孖寶A$21.80, 歡樂孖寶B$26.80, 任選湯粉麵孖寶$33 湯粉麵除咗最經典嘅燒味之外還有雪菜肉絲/ 炸菜肉絲/ 蠔皇北菇等, 配任選點心一款推介點心： 菜苗餃---餃皮係薄如蟬翼般的全透明狀, 內餡全看得見, 這應該是馬啼粉的比例做成這效果吧, 其他的都是一般水準,不過價位是無話可說的抵食,只要抱平常心去享受必定會有意外收穫!

13:10入座,13:15,期間追過兩次單,職員話落咗單,好多枱都耐過我地,直至13:50,一碟點心都未到!由於lunch time 夠鐘要返工,叫職員取消全張單,職員竟然話5分鐘前落咗單,真係離哂譜等候過程附近其他客走咗20-25分鐘,但冇人執枱,寫紙落單冇筆,舉手叫侍應冇人應,要自己周圍搵筆囉!全場得十幾張枱有客都可以咁混亂,樓面得兩三個,傳菜得一個食過兩次都ok,上菜快,但今次服務好差!以後唔會再幫襯

今日難得放假，自己一個去飲早茶套餐好抵, $35一個生滾粥加一個點心，叫左生滾魚腩粥, 個魚腩比較多骨, 一邊食一邊吐，好麻煩, 不過都幾鮮甜，粥都煮到好軟綿。煎蝦米腸好好食，煎得好香，两邊少少脆, 依家好少腸粉可以煎得咁香。另外加左個馬拉糕，都好鬆軟，味道岩岩好，唔會太甜。不過估唔到佢啲份量咁大! 食到勁飽，打包左半個馬拉糕。另外佢點餐係用水筆寫係膠板度，可以重用，感覺好環保，抵讚。埋單$6x, 星期一至五去的，略嫌小貴，不過品質ok

第一次幫襯這間酒樓，因為家人住在附近所以想試一試。初頭見冇乜人有點擔心。點了一個全包宴，星期日價錢是$2388，這個全包宴亦有半席，如平日價錢更便宜。全包宴內有很多食物，當中有個大虎蝦伊麵，大蝦十分大隻，且有很多隻，放滿成個碟，鹽燒鲍魚亦特別而且十分大隻，蒸沙巴魚亦頗不俗，不會過熟，其他餸菜亦不錯。每碟份量十足，味道很好，十分抵吃。雖然服務一般，但值得下次再來。這酒樓標榜沒有味精，唔知是否真但吃完不覺口渴。

係，無錯，一個月嚟兩次，適逢有親友遠道而來香港，我同屋企人決定再去。假日可以唔駛book都有位嘅，不過睇黎無得咁博法，開始多人。好鍾意佢用呢啲圖案，好特別（其實算係乾淨）主角出場，呢個套餐真係好抵食，有片皮鴨揀，上次人太少食唔到，今次食到啦！佢個皮好脆，燒得好好。可惜嘅係麵皮唔夠熱同細塊，痴埋左，唔係好包到。下面嘅蝦片個個都讚，話夠好味。又係佢，佢係龍蝦伊麵，算係多肉，整得好味。沙嗲金菇肥牛粉絲煲，well，說好的煲，我地個個都呆左。味道咸左啲，水太多同埋結，呢個可以唔叫。客家豆腐呢個可以叫，之前返大陸食飯都有叫過，其實係ok，佢中間有舊肉，容易整又叫清清地，豆腐有煎過下，所以都係可口。係個汁都係多咗啲。另外兩道我地叫咗一斤蝦，不過新鮮白灼蝦無哂，變左得豉油王炒蝦，味道都ok。呢度嘅態度都係麻麻地，唔好要求太大，可能自己嚟仲快。繼續有免費糖水，有紅豆沙同蕃薯揀。

去過3次了， 茶樓菜式，味道水準越來越高，次次驚喜新菜式！最喜歡吃咋蝦球，片皮鴨和客家豆腐！輝煌樓係我去過性價比最高，真才實料的酒樓！老闆時常招呼客人、價格都非常優惠，可以食到甘好質量同埋健康的晚飯，香港地簡直不可以相信。

係油麻地搵美食從來都係挑戰，又要就屋企人食中式，又要好味夠抵，真心難。今次係openrice搵到呢間酒樓，印象中應該轉左手，好少行呢邊。呢間酒樓都多人，可惜係無𨋢，老人家要辛苦小小，行一層樓梯。價錢真心令人心心眼，唔貴，晚市套餐都係488，仲要5個餸！份量仲要係多㗎喎！魚香茄子煲，正常，煮得夠淋，屋企人話唔錯。（因為我本人麻麻茄子嘅質感，只能靠屋企人評語）菠蘿生炒骨，炒得好啱，連啲汁都結得剛剛好！而且啲肉無hea你，都有肉地。海生蝦，睇相完全係話俾你知咩叫超值，味道不錯，蝦係中蝦size。主打到啦，上湯龍蝦伊麵，龍蝦無慳俾你，肉係多，係無交剪有趣左啲，而且我地係驚訝伊麵係多，起碼每人有三大柱！南瓜香芋排骨煲，唔係講笑，大讚佢個芋頭，煮得好淋，好好味，最快夾走哂。整體都係好味，唔咸，咁都係600元內搞掂，百零元，平到喊！咁樣都有湯水送，正！滿足！

朋友聚舊難得地大家都想食中菜，第一次來輝煌樓有意外驚喜呢!本來見任食火鍋168都想試下，不過見全場滿座都是叫小菜，應該小菜較有質素保證吧!有2-8人SET不過我地散叫，每人揀一個菜，片皮鴨好搶手!最後一隻鴨比隔離檯叫左，好吸引，唯有下次再試!八寶冬瓜盅好清甜好足料，有蝦、蟹肉、草菇、蓮子、瘦肉、勝瓜、夜香花一盅足夠5人份量了，傳菜阿姐幫手"筆"埋裹面的冬瓜肉，份量十足啊! 椒鹽多春魚好味!好惹味又唔會太乾!焗芝士斑塊斑塊嫩滑，芝士汁好濃!客家釀豆腐難怪多街坊幫襯，足料冇味精，要比個LIKE

週末晚上與 與家人在油麻地想找一間中菜館食晚飯， 在油麻地差館附近見到有一間輝煌樓海鮮酒家， 招牌與其名一樣非常輝煌 ， 一入菜館看見裝修也非常輝煌 ， 還有新束束還有80吋大電視，感覺金碧輝煌 ， 我們 一行五人坐下來叫， 簡單地點了一個四人餐， 加88蚊張例湯轉為冬瓜盅， 再點了 3 碟小菜，初時話唔怕唔夠 食， 但離開是個人都肚滿腸肥，送的甜品還要打包帶走。八寶海皇冬瓜盅湯味道清甜而香，用料足，火候足，而份量亦大，五個人平均每人兩大碗有多。冬瓜又大外觀也很靚。第二道菜系清蒸沙巴仔， 簡單一條清蒸嘅 沙巴，魚肉非常嫩滑，蒸魚時間控制得非常好 ， 而我最愛魚汁撈飯，非常美味。第三道菜是美極焗海生蝦，焗煮的海蝦很香口，有海鮮的鮮味且有質感，色香味具全。第四道菜是京都上肉排，用洋蔥及糖醋炒出啖啖肉的甜酸肉排，甜酸味適中， 非常好味。第五道菜是海味粉絲雜菜煲，海味用料十足，鋪滿乾瑤柱及冬菇絲， 清湯雜菜加粉絲， 頗有清新嘅感覺。當大家都吃得飽飽時，身穿鮮豔的老闆 吩咐樓面給我們送上 甜品紅豆沙及生果盤。這晚很滿足!

今天晚上我們一家老幼來到了位於油麻地果欄附近這家本年3月才開業的酒家吃晚飯。單單看酒家的裝橫和餐具已經知道老闆的用心。地方寬敞，光猛舒服。 印有公雞圖案的餐具， 非常別緻。我們一家五口點了一個價值468元的套餐。 套餐內容非常豐富，有湯，有魚，還可以自己選擇三個合口味的小菜。八寶海皇冬瓜盅: 冬瓜盅的份量足夠我們每人飲至3-4碗。用料也非常講究，加入了蟹肉、瘦肥、磨菇等。湯頭清甜， 屬消暑佳品。推!美極海生蝦: 大隻新鮮海蝦泡油炸至爽脆， 外脆內嫩。可連蝦殼進食， 不需要擔心剝蝦殼時會弄污雙手。再加入了以美極鮮露秘製而成的醬汁， 非常惹味。清蒸沙巴仔: 沙巴仔大小適中，魚身肉厚，沒有太多魚骨。魚肉嫩，味道鮮。推!海味粉絲雜菜煲: 大量的粉絲蔬菜上，鋪滿了、冬菇乾瑤柱、蝦乾等海味。 蔬菜的清甜味道加上海味的鹹香味， 味道非常討好。飯後甜品有紅豆沙、生果盤和水晶包，都是由酒家送出。而且是由酒家老闆親自送到每枱，倍加親切。這間酒家雖然才剛開業數個月， 已座無虛席。 原因非常明顯， 中菜在烹調的時候沒有加入味精，屬健康之選，另加上一流的服務。絕對值得再來。另付部分餐牌供大家參考。

一家人經常外出吃飯，街外飯味精重，吃到我們也怕怕，於是媽聽朋友說，提議到輝煌樓試試。這家餐廳不難找，在油麻地港鐵站，走數分鐘便能從遠處看到大大的招牌。本來也沒什麼期望的，甫進酒家，燈火通明，擺設、餐具典雅，盡見心思。而且員工態度有善，服務殷勤，滿有親切感。我們一行五人，叫了一個四人餐。八寶海皇冬瓜盅加價錢把老火湯換作八寶海王冬瓜盅，冬瓜盅絕對讚，一飲下去，全無味精，非常清甜，而且很足料，大大隻鮮蝦、瘦肉、冬菇等，全都有。我們 吃完一碗，又添一碗，完全不能停下來。媽媽特別欣賞這個沒有味精的冬瓜盅。清蒸沙巴仔然後來了清蒸沙巴仔，沙巴仔的尺寸的確有點小，但是非常鮮味，魚肉結實嫩滑，不像別的酒樓蒸魚般滑潺潺，魚味欠奉。我們也是於數分鐘內把於清光。與其要吃大大，但淡而無味的魚，倒不如一條小小，但魚味十足的沙巴仔。美極焗海生蝦生蝦大大隻，爽甜鮮味。京都上肉排甜甜酸酸，非常開胃，份量十足。海味粉絲雜菜煲海味足料，也是吃得出全無味精，吃後感到非常舒適。紅豆沙、生果、水晶包最後，老闆曾生還來到跟我們談天，送上紅豆沙、生果、水晶包，非常親切。但是我們已經非常飽，水晶包唯有打包啦﹗是次晚飯，確實令我喜出望外

公雞餐具好靚!開餐前食d酸酸微微既小食特別開胃!飲勝!見周圍好多客人枱面都有一盅冬瓜盅,賣相夠睇頭叫左一盅試,好足料,清清甜甜!BB乳鴿細細隻,肉質特別嫩滑,乳鴿皮脆卜卜好香口!蒸沙巴仔,啖啖肉又滑,海魚真係永遠好食過淡水魚!竹籠蒸海蝦,新鮮鮮甜爽彈,蝦如果夠新鮮其實用最簡單清蒸既方法最原汁原味!甜食水晶包!蓮子紅豆沙,做到起沙,依稀帶點果皮香!糖水做得出色,特別係蕃薯糖水!薑味好重,好香!依到晚市除左小菜重有任食火鍋!價錢重幾抵食!酒樓出積分換產品依d活動真係第一次見,好有創意同實際,見到換領既野都係生活中常用品!一舉兩得!依家輝煌樓員工上下服務好親切細心,見到連老闆都親力親為落手落腳,重會同客人傾下計,依種感覺令人食得好開心好舒服!真係要比個讚!!