蛇王倫 (已搬遷) 新店位置

呢排天氣都好凍，去千島湖行山之前入嚟呢度食嘢。附近都有好多蛇店，我就覺得呢間比較就腳。唔係佢啲蛇特別好食。個重點係個蛤蚧湯，可能佢落咗杞子同埋圓肉落去我覺得好清甜，飲完個身都好暖，有陣時自己覺得有啲寒咳，都會入嚟飲呢個湯，條氣就順番曬。講返個時間先，如果要轉大碗要加$30 ，如果以呢個個價錢嚟講嘅話食細碗一個套餐其實係有少少偏貴嘅，但都有三條蛇肉就接受到啦！鬼叫佢個蛤蚧湯真係好好味。因為要行山又未食晏同埋早餐，就叫左套餐食埋個糯米飯，但係個米就糠咗少少。

凍凍地梗係食蛇啦係元朗梗係食蛇王倫.. 始終平靚正比疫前貴咗少少，正常吖。蛇肉湯料仍然多龜湯仍然熱呼呼糯米飯仍然多臘腸又夠味盛惠$103，抵呀！ 我哋2人晚上吃，夠晒店仍然係細，枱仍然要搭，客仍然的多

難得天氣尚早, 去元朗食返個史五蛇羹, 呢間蛇王倫係千色對面架其中一條巷仔, 由細細個小學生比阿姨帶來食,到大左自己識黎搵食都有一段時間, 證明呢間野都有返小小歷史架。叫細碗店家都會畢到"氣頂"比你架, 即係滿到瀉甘濟。味道都好食架,KEEP到個水準, D蛇肉又好食, 可以自己加檸檬葉, 加左會甘甘地, 同蛇羹好夾架, 我就喜歡加多D既, 仲有南乳趣趣都係放係台面比你加落去既。

黎到元朗，識食既一定去呢間食蛇羹，裝修簡單樸素實在，長久以來都有一定街坊支持，每次都好多人幫襯。需然價錢算中中上，但品質實有一定保證，以呢個價錢一定值得，食完個身即刻暖哂，蛇羹蛇湯龜湯用料充足，每碗不論大細免賣，都裝到滿滿。蛇羹濃厚蛇香味濃，色澤偏深，睇到都好肚餓，食指大動，蛇肉條厚實爽滑夾大件，食落淡淡肉，口感似雞肉，另外有木耳絲，陳皮絲等等，好有元朗風味，最重要係有檸檬葉絲，薄脆，胡椒粉任落唔嬲每枱仲提供紙巾同品質好既酒精搓手液，非常照顧客人需要，細心體貼。龜湯同樣足料熱辣辣，色澤冇蛇湯咁深色，聞落好香，飲落有淡淡藥材味，對於唔中意藥材味既人都可以接受，非常滋補臘味糯米飯亦非常好味，但今次應該唔似生炒，可能賣哂，只能用蒸既，或者係補新飯時蒸耐左，痴埋一舊舊冇粒粒分明，但味道同樣有水準，今次咁啱冇到落花生，正合我意，平時有落蔥花同花生。店舖需然經常都坐滿客人，好忙碌，但老闆店員服務態度專業，非常親切友善，係1間非常值得支持及推介既良心小店老字號，祝生意興隆

好多年冇食蛇羹，今日涼涼地，去買碗蛇羹食，補一補身先五蛇羹（細碗）$45唔知係咪所有蛇羹嘅烹調方法都係一樣，我覺得個味道同我以前食過都係一樣，沒有變到蛇肉大大片仲有一定要加脆脆。試食過一間是沒有脆脆供應，只有青綠色嘅草

呢幾日天氣凍凍地，最適合食返個蛇羹同糯米飯暖暖身。之前經過呢間蛇王倫，見好多人排隊，今日心血來潮，決定過嚟買個外賣返屋企慢慢嘆！其實佢有3個餐選擇，但今次我哋淨係買咗蛇羮同糯米飯。返到屋企，一開蓋⋯個蛇羮好足料，大量嘅蛇肉，蛇肉口感煙韌帶爽，中藥味鮮明，加埋冬菇絲同木耳絲，增加咗個口感⋯鍾意濃味又有咬口嘅蛇羮嘅朋友真係一定要試！至於個糯米飯，我要咗個大嘅，原來好大兜，女仔一定食唔晒！糯米飯香氣十足，口感煙韌，配搭臘腸同臘肉，油香足夠，倍添滋味！食完成個人暖笠笠，好滿足，值得推介！

天寒地凍，最好更係整碗蛇羹食下喇！元朗蛇舖執下又一間，執下又一間，已經得返唔係好多間！今次幫襯呢間「蛇王倫」，唔講唔覺原來係元朗已經開左三十幾年，主打生蛇蛤蚧正金錢龜！而且標榜太史五蛇羹、五蛇湯、靚龜湯、蛤蚧湯全部都係用上乘既食材配製、仲有腊味糯米飯。去得蛇舖更係食蛇喇！太史五蛇羹名不虛傳，再加埋食蛇羹一定要食既脆脆，實在食到停唔到口！太史五蛇羹足料不在話下，如果唔鐘意食蛇，去「蛇王倫」食碗腊味糯米飯都係個唔錯既選擇！至於五蛇湯、靚龜湯、蛤蚧湯就未試過，同埋元朗好似無乜地方有得食，有興趣真係不妨去試下！

蛇王倫係元朗都開左好耐一直同屋企人食左好多年幾個套餐都好抵食而且樣樣野都好足料上餐速度又快員工都好友善🥰最中意就係食套餐B蛇羹 糯米飯 同埋龜湯👍🏻蛇羹好足料 而且無咩味精食完吾會好口渴配埋脆脆食就仲好味食完暖笠笠👍🏻糯米飯口感煙韌足料好味中意食臘味的話可以加錢要臘腸嗰啲調味啱啱好一個人都食到一大碗👍🏻龜湯最推介就係呢個龜湯每次來都一定會飲清熱解暑 如果怕蛇羹太補身叫埋黎飲就啱啦雖然睇落黑黑的但係清甜好味

冬天必食之一，食蛇一定入選，自問仲係入門級食客，唔敢一食就食蛇膽，而且好似唔係話食就有得食。今次去左元朗一間非常老字號，呢間啲蛇羹同糯米飯好出名！所以你睇典型ＡＢＣ餐都會有呢兩樣，蛤蚧湯同龜湯就睇各人愛好，可能我下次食會試老人家話，食蛇可以驅風去濕，又可以暖身益氣，今次叫左個Ａ餐，有蛇羹，有蛇湯又有糯米飯，台面會有脆脆附送，通常食蛇羹會撈來食，味道非常好，特別係糯米飯又香又野味，五蛇羹又保持水準！食蛇元朗一定搵蛇王倫！

元朗想食蛇羹第一時間諗起蛇王倫😎冬天勁多人食.. 等左一陣決定開張枱坐係街食啦！叫左兩碗蛇羹一個糯米飯⋯超正熱辣辣吾好睇碗蛇羹細細碗，真係超級足料!! 食之前一定要落勁多脆脆撈一撈.. 好食到吾識形容🤤🤤個糯米飯又係好好味🍚勁香口 花生🥜又脆卜卜 飯軟硬適中吾會太淋或太硬.. 蛇羹配糯米飯perfect match👍🏻👍🏻👍🏻總結*只有呢間先食到呢種味道～除左蛇王倫我係吾會再幫襯第二間食蛇架喇😌

又去元朗食蛇羹，今次去間老字號，門口有人排隊，食蛇羹確實係保暖妙法。雖然鋪頭唔算細但係好多人食，所以都要坐到逼逼澀澀，我地點咗一個大蛇羮+套餐A，兩者只相差＄10，但套餐D嘢食全部都係細碗份量，而且湯同糯米飯又無人好，所以衡量過後，要個大蛇羮就唔會浪費食物。蛇羹份量好足，蛇肉丶雞肉同豬肉都又多又大條，當然唔小得卜卜脆送蛇羹，呢間蛇鋪位於東菇亭附近，唔算難搵，價錢合理，套餐加＄25可以轉大蛇羹，由於都多人食，要等位，而且太忙，有時會上漏嘢，要叫多幾次先落到單或者齊嘢食，但為食好嘢，值得忍耐~溫馨提示下，蛇羹乃季節性食品，夏天係唔開嘅～

天氣開始轉涼，特意去找蛇羹吃，元朗蛇王倫是首選，雖然店很細，但這就是香港的傳統特色街鋪店。非冷氣商場產物。 點了蛇羹，40元，細碗蛇羹材料有雞絲，蛇絲，果皮，冬菇，十分豐富，加了胡椒粉薄脆，更加滋味，十分暖胃。如果比較大食的話，可點大碗，都只是65元。 另外，店鋪也有賣自己浸的蛇酒，也很受客人歡迎， 據說冬天飲用，行氣活血。而蛇羹的最佳朋友，應該沒有人不認為是臘味糯米飯，點了一個細的，23元，飯炒得不乾不濕，剛好，臘味也很香。雖然是細，但都覺很大。店舖雖然很細，但井井有條，滿滿人情味。由於我跟太太都不是很大食，兩碗蛇羹，一碗糯米飯 一起分享，已很足夠，共103元，大滿足，原來快樂是這樣簡單。

冬天除打邊爐會食多左外，蛇𡙡亦是我經常心思思想食的。 好似今日咁成二點半只食左個快餐店的早餐無食晏，天氣ㄡ寒冷，餓極於是去左元朗頗負盛名的蛇王倫食碗大蛇𡙡。這鐘數仲鬼死咁多人，小等了一會兒，揀這是貪佢堅料多，芡不太稠，味咸淡剛好，ㄡ無味精。 食左不會狂灌水解渴。足料味正的蛇𡙡，蛇肉超多，配上切成絲檸檬葉及脆口的南乳味薄脆來食，口感一流，層次豐富，食後ㄡ飽ㄡ暖身，好滿足。食過咁多次蛇𡙡及飵蛇湯，龜湯，今日興起分享時拍照才留意到它有蛤蚧湯，下次等我叫來試下味先。

運動後中午飯.. 今天想食蛇, 做搜到蛇王倫。常常行過這店,好吧, 就試試啦。環境是老式舖, 摺枱+無背摺椅。另有電視痊角落, 猶如粵語片的涼茶舖價錢寫在牆上, 非常懷舊想食五蛇羹(細$40) 臘味糯米飯(細$23)最後點了A餐$74: 蛇羹+蛇湯(打包)+糯米飯五蛇羹: 料十足啊, 比想像中多又滿入口又五蛇又瘦肉又雲耳絲…好正好滿足加埋任食檸檬葉&薄脆, 小時情懷返晒來(哈哈哈😆)臘味糯米飯: 碗雖細, 但又係滿滿實實的, 脆脆花生舖面, 臘味粒啖啖有, 都係個句..巧滿足啊 食左一半, 覺飽打包返家再嘆蛇湯: 雖然打包, 為左寫食評, 打開拍照, 嗅到很香…… 食一匙, 清清地卻充滿藥材味，個feel好補咁又食又拎，共銀$75 (外賣加$1元)大滿足啊再食再食

冬天需要補一下，而且咁啱去元朗，平常去開間蛇舖唔知搬咗去邊，兩公婆決定就近去食，起OpenRice search到有間蛇王倫就去啦。叫咗兩個餐，老公要蛇羹+蛇湯+糯米飯，佢話蛇羹唔夠要加大，加咗$20，而我就叫咗蛇羹+蛤蚧湯+糯米飯🍚。整體味道一流，起碼我食過三間，呢間係四種都好味。蛇羹，唔算滿瀉，即係料同羹係一半一半，有蛇肉但雞肉多啲，其他木耳，冬菇都好正常尺寸，而且足夠份量，味道係好好味，唔係好味的話，我通常會加半碗薄脆調下味道，但係呢個蛇羹我只係加咗好少，少到老公問我點解唔加，因為真係好食。糯米飯，我冬天必食之選，就算唔係出自蛇舖既我都會叫嚟食，呢間啲飯好黏，不過係唔算好多料，但係都食到臘腸肉，有時會有埋花生口感，臘腸肉仲係半肥瘦，夾起仲會見到有少少油吱出嚟，臘肉就唔係全肥肉，臘肉唔太喜歡俾咗老公食，佢都話呢間係唔錯，臘腸臘肉都唔硬，最重要係食完成碗飯喉嚨會唔會唔舒服，即係X喉（唔知嗰字點寫），之前食慣嗰幾間，食完嗰糯米飯都會唔舒服，一定要飲啲野先會好啲。呢間無呢種問題，下次都係要返呢間買嗰飯先。到湯喇，因為叫咗兩款，我只係飲嗰一種，蛤蚧湯，有杞子所以甜既，唔太有藥材味，味道唔錯