肥媽小食店 (已結業)

自從肥媽小食店改左名做“9砌” 專賣即點即造嘅漢堡之後，Miss O' 第一次幫襯，只能夠講.....真係好好好食呀！🥰Miss O' 叫左個豬肉漢堡，點左燒烤醬，個包脹卜卜好軟熟，加埋$3多隻蛋真係絕配😍下次等Miss O' 又試下其他配料先，大家記得去幫襯下👍🏻P.S.: 依間小店入面有部機可以抽Yell Card架！

本來想去買腸粉但冇曬，哥哥仔推介新品， 厚切午餐肉流心漢堡 。 流心蛋堅正， 午餐肉煎得好香， 漢堡包皮超鬆軟又多芝麻！ 本來是買來做下午茶，點知飽到夜晚嗰餐都唔使食。 廿蚊簡直超值！ Sorry 食完先醒起唔記得影相

去朋友屋企行過呢間舖頭，見到好多文宣都行咗入去食嘢。嗰陣本身想買下午茶餐，叫咗燒賣蛋同杯嘢飲，但店主話分開買會平啲，原本係應該$29，最後淨係收咗$25。如果佢唔講其實我唔知但佢好心提醒我覺得好開心，良心小店！食物方面燒賣嘅話同渣哥嗰啲有啲似，魚蛋方面佢好特別，佢有五隻味嘅魚蛋可以買，最後尾我就叫店主每樣比一粒我試吓，個人覺得青咖喱係最好食嘅。🤤🤤🤤如果唔係已經食飽咗，會想試埋佢個雞髀同吞拿魚沙律牛角包，見到有人買超大個但係好平！

買左芝士火腿牛角包同吞拿魚沙律牛角包。2個都好好食，size唔算細。我個人比較鐘意芝士火腿牛角包，可能因為有焗返熱過所以牛油味好出好香，配上芝士火腿，嗰種咸香係好經典嘅味道。吞拿魚沙律就係另一種享受，如果鐘意有超多餡的滿足感，呢個就非常之合適。下午茶食下係一種很好的享受。

強中自有強中手，由黃埔慢慢經過土瓜灣途中，離遠看到一間超級深黃的小食店，被它所吸引而行入去，沒想到店內係比所有我看過的店更多文宣和海報，老闆只有１位男生，默默在付出，包括落單、煮食、收錢、包裝等等，最有趣是牆上貼滿手畫的文宣餐牌，都是各種各樣便宜到核爆的小食，早前已經吃過下午茶，所以只能夠再點一些較為簡單的小食。因此，我就選擇左牛丸和龍蝦丸，但老闆竟然再多送４粒小腸仔沒有收貴，我實在不好意思在跟老闆交談中我感受到他的熱情，他一定是一位深愛香港手足的好老闆，真的非常感謝他為香港人付出，希望各位手足落力懲罰這間土瓜灣的小黃店，讓它永遠存在，謝謝。土瓜灣黃店ＮＯ. 1當之無愧!我發誓下次會再來大力懲罰食正餐!

唔想食飯想食啲小食 經過見到間小食舖叫咗個咖喱燒賣魚蛋撈烏冬 點知一打開碗見到啲烏冬無乜色水同埋好油都覺得奶奶哋嘢 我以為啲咖哩醬沉咗底撈吓個底點知成碗都係油 🤮 係勁多油仲要完全一啲咖哩味都無 真係好過份 （但係因為實在太肚餓所以都啃咗）唔明點解可以整到咁難食 真係無下次 打著黃店嘅旗號賣啲咁嘅質素俾人食 呢啲撈烏冬其實都已經無乜技巧可言 主要都係食個醬汁都可以整到咁hea你好意思嗎 ？希望店主你可以反省吓改善食物質素（燒賣正常 ，魚蛋有幾粒好似浸咗好耐好深色）

話說呢日去咗紅磡拎糕，行去搭車必經土瓜灣，本身食咗個tea嘅我仲有空間就土瓜灣覓食，見到呢間肥媽小食店，心諗：小食！啱哂！咁就係門口睇吓個menu，細細間舖嘅選擇都唔少喎！本來想食個印尼撈就算，點知見到有得撈丁，$33撈丁有兩個餸仲包冷熱飲品，呢口價其實算抵食，因為見住佢拎個出前一丁，又冷熱飲品同價，平時凍飲至少加兩蚊，嗌咗個咖哩撈丁拼炒蛋同波波腸，咖哩撈丁味道幾好，波波腸都係正路嘢，但個炒蛋真係正，佢係仲滑嘟嘟未完全熟哂嗰隻，鍾意食炒蛋嘅我最鍾意呢隻質地，食完呢碗撈丁就好滿足咁搭車歸家！呢口價同呢個質素對我嚟講都係可以翻啅，當然前題都係順路，但去開嗰頭又真係可以諗諗！

今日放工唔太餓，就諗住係紅磡附近掃吓街，行到去土瓜灣經過依間小店，傳嚟陣陣嘅香味，就忍唔住要試吓啦。首先店鋪雖小，但選擇好多，而且價格又平。我就叫咗個撈公仔麵套餐，有咖哩汁同滷水汁揀，估唔到咖哩汁仲有青咖哩、紅咖哩同秘製咖哩揀，咁當然要試吓秘製咖哩啦！出外食撈麵最怕食到煮過時嘅軟麵，但依間煮得啱啱好有咬口，而且秘製咖哩汁味道較柔和，食起上嚟冇咁大負擔，令人食個不停。另外套餐包嘅凍熱飲同價，有即沖嘅阿華田及檸茶等等，我點咗凍檸茶，職員仲親切地問需唔需要幫我哋督埋檸檬好貼心啊。下次一定要再嚟試吓個滷水雞脾同紅咖哩撈麵