呢日午饭时间，为咗避开午市高峰期，所以拖到13:40先去揾食，沿路嚟到呢一间，抱著唔好就一次，好就嚟多次嘅心态入去试食。服务员第一时间畀咗杯水，算系有心，拎啲餐牌嚟睇，结论都系客饭划算啲，是日由于系星期五，见到个餐牌上有个：一刀两断叉烧饭，对于喜欢好奇嘅我，自然唔使谂，但点知一叫餐时，侍应大叔即刻话B餐同D餐（即系叉烧饭）都无，由于我唔食得太辣，亦唔太喜欢油麦菜，于是只好叫F餐马拉盏牛松炒饭，配热奶茶。呢个餐包埋个中汤，虽然每日都唔同款，但主要食材都系一样：唐排，即是猪骨。个汤起我落完order之后即刻送到，高效率。但奇怪嘅系个汤渣唔系唐排，而似系鸭下巴嘅嘢（无影到相），即系话个汤会加埋啲下栏嘢落去，令啖汤更鲜甜。接著当然系奶茶（漏影相），杯茶有茶味，唔会过浓，但香味唔够，而且只提供包装沙糖，而无啡糖，呢啲方面就失色咗啲。个饭相信系即炒嘅关系，所以姗姗来迟，导致我食食下先记得影相，起等候个饭嚟嘅时间，我见到佢哋除咗提供包装白沙糖外，仲有辣椒油及包装辣椒酱，于是又试下搞搞新意思，将辣椒酱放入炒饭度，睇吓有咩效果，所以会见到个炒饭带些少红色，就系咁解。至于味道方面，马拉盏即系虾酱，正常嚟计，应该闻到祲虾酱香味，可惜我闻唔到，虽则食落有啲虾酱味，但味道唔浓，个牛松亦完全唔似系松，即系话切或搅得唔够碎，仍见到丁方一小片，庆幸炒得算系干身，配上菜心粒及辣椒酱，味道算系及格多啲啲啦！$56有汤有饮品有饭，呢个价钱相比连锁快餐店，绝对系抵。期待下次可以同个叉烧饭一刀两断，希望到时会有惊喜，而唔系只系平平无奇嘅叉烧饭。…查看更多
