發記麵食 (已結業)

星期日的午餐來此解決, 點了個 A 餐, 大大碗麵加豆漿 ($19),點了雲吞麵, 雖說是「大大碗」, 但我就唔太覺,麵不錯, 沒梘水味, 只是太少, 三扒兩撥便吃完了。雲吞有 4 粒, 有大半隻蝦, 幾爽口, OK。豆漿如樓下所說, 個味好奇怪......

feb 05, 10,1個人速食,叫咗 : 1) 3拼河粉 (hk$26)-叫咗牛肚,雲吞同貢丸-湯底唔鹹,唔重味-先食牛肚,爽彈得很,牛味亦出,但就唔夠入味同太有嚼勁-之後是雲吞,size比小巧嘅嗰種雲吞大,裡面有免治肉同蝦粒,但就好爽口吓-最好的應該喺貢丸,因有種香氣,而且肉質爽中有彈-河粉正常-好大碗吓,差點吃不下,好抵食 2) 豆漿 (hk$3)-好抵飲,幾有豆味-甜度適中

發記曾經被某些網友介紹為抵食和好食的店舖，然而我和老公對此並不苟同‧星期日我們在中環逛街，並且特地到發記吃東西，我點了水餃麵和豆漿($19);而老公則點了雲吞米和豆漿($19)，吃完之後帶着不滿離去，因為整體差過坊間的$10 麵‧ 水餃麵： 水餃有四粒，內裏雖然有木耳，但是餡料沒有什麼味道，而麵的麵質只有咬口，都是沒有一點味道，湯底是味精水。雲吞米： 雲吞都是四粒，雖然蝦較爽，但是味道同樣地都是淡淡的，而米粉味道則普普通通‧豆漿： 認真唔掂，送來時已見到有少許冰片浮在豆漿上，老公覺得豆漿味道似是用奶粉溝稀而成，但是我卻覺得豆漿含有古怪膠味，我們飲了幾口便不敢飲了 ‧ 吃完後，我的肚子一直感到有點不適，但不算嚴重，心裡懷疑是那杯豆漿所致，個多小時後，我告訴給老公，這時老公才告訴我他亦有此情況出現，看來那杯豆漿真的很可疑‧無論結果如何，我們都不會再光顧此食店！

一個人o係中環搵食, 記得呢間食評都唔差, 就去試下~ 可能係lunch hour既關係, 全場爆滿, 我見有個闊落d既位置, 咪企係樹等一陣, 點知d呀姐係都嘗試要塞我去d坐都有困難既檯度, 我無理, 繼續等到有得坐。佢地就好唔高興, 黑起塊面眼厲厲咁!!叫左碗牛筋水餃米, 牛筋唔算淋, 淡而無味, 水餃除左體積大之外, 完全無味道可言~ 湯底味道亦欠奉~ 整體水平絕對只可以用一個字形容: 差!!!服務態度同食物質數都令人失望, 真係諗唔到再去既理由~ 從此o係中環搵食又小一個選擇~

10-9-2009忽然想食「非典型」的大粒雲吞, 見沾仔記太長龍, 嚟了同樣以大粒雲吞作招徠的呢間. 叫了「雙併」河粉 ($21), 跟凍豆漿一杯 (加 $3).先嚟豆漿, 夠凍, 甜度唔高, 但豆味麻麻, 質地又稀, 唔喜歡.河粉厚厚的, 米香欠奉, 不過都叫做滑身, 算啦.湯底幾清, 無 MSG 痕跡, 但味道淡出個鳥來; 唯有又落辣椒油, 但辣椒油又係一味辣, 唔香, 天呀 「雙併」就係雲吞 + 金錢肚... 雲吞無沾仔記的「乒乓」咁大粒, 但仍大如蝦餃, 蝦 vs 豬肉比例約 8:2, 蝦的鮮味夠突出, 食落爽口, 唔傳統但都幾好食; 牛肚腍得嚟有咬口, 但完全唔入味, 食落無味道的, 認真麻麻.環境迫夾, lunch hour 如常「打仗」一樣, 衛生亦一般, 食完快閃好了.放低 $24, 平平哋可以一試, 不過我諗我唔會再嚟了.

係中環區想找個平平地既午飯, 相信只有這些麵檔, 仍然能做到20元以下的一個午餐. 亦因為咁, 搭正一點, 係呢D麵檔, 無論大檔細檔, 永遠是人龍.是日因為要辦點私事, 搞好都成1點45分. 一個人蕩在中環, 胃子又呼叫我不要大魚大肉. (真的連茶餐廳既餐麵好似吃不下), 左找找右找找, 結果都係食碗雲吞麵, 近近地又唔駛行上行落. 剛剛好, 過了其Peak Hour, 食麵加3元有豆漿既餐復售, 豆漿, 冰凍的豆漿, 不過覺得是那些一桶桶交來的豆漿, 飲落沒有什麼特別. 雲吞麵方面, 雲吞夠大, 啖啖鮮蝦肉, 不過欠了香口. 食得雲吞多, 不一定是越大隻越好, 最重要係餡既味道. 雖然多蝦係好, 但這只是一篁令人覺得抵食既技巧. 其實小粒雲吞, 重芝麻及蝦子味, 這才是的喜愛的味道. 而麵, 當然是不夠爽口. 但都係不錯既.食碗麵可以好快, 15分鐘, 完成午餐. 回去多勞多不得.

明明帶左飯,,但一到LUNCH TIME諗食咩諗起發記D雲吞,,,就連自己帶左飯都忘記一空,,,=口=$16碗雲吞麵(外賣加$1蚊)雲吞大大粒,,有2隻鮮嫩彈牙既蝦加少少瘦肉雲吞皮軟硬適中,,有時都幾滑,,,幼麵就普通貨仔,,但加埋個湯就異常惹味,,,無咩鹼水味,,$16有咁既水準超值啦,,,外賣未煮既雲吞都係$26蚊一打,,抵食!唯一係覺得佢D生菜有少少菜泥味,,洗多一洗會好D,,,同埋攞到番公司出水出得幾緊要,,蠔油多一點才夠,,,加埋佢D辣椒油好正架,,,

之前路過見到幾平,上左黎OPEN RICE confirm左之後,食!!!單拼$13(小)16(大),雙拼先$21.水餃牛肚米線(腩汁)(最近食得太多雲吞了…..)水餃真係好多料,好!推薦!!!不過牛肚又普通左d,好彩有d腩汁安慰下.米線真係幾夾腩汁.貢丸牛腩河貢丸size幾適中,牛腩,雖然唔係話超級出色,但以呢個價錢,味道唔係話真係同D $27 單拼ge相差咁遠囉! 仲要份量多d tim!加左$3 有豆漿~都唔知幾過癮~$7有油菜,炸魚皮果d,下次會叫單拼之後order呢d!強烈推薦此店給中環上班的食友們~十分抵食~

中環有名氣嘅雲吞粉面都唔少,中午經過見到有位,所以入去試一試,order咗個兩餸面~雲吞拼魚肉,就覺得比起啲有名嘅面店"得"好多喎~不過就坐得唔喺太舒服........但總括而言,可以再嚟:

有一段長時間,冇同大家分享飲食上的見聞,呢幾個月嚟,發生的煩事實在太多,離開十年的工作環境真係唔容易,一星期的假期後,就要接受一個新挑戰水餃河--大大隻水餃,味道都唔錯3拼雲吞牛肚牛腩米--雲吞都係大大隻多蝦,牛腩及牛肚唔係強項,食唔食都得加錢可以轉大碗,方便做正餐

食粉麵都成日食，但又要大碗又好食ge就唔多。第二次黎，上次係朋友帶我黎食，今次我就帶左兩個朋友黎試。$21雙拚，要左個水餃牛腩米，湯底有腩汁味，水餃大粒，牛腩又林，而且又大碗，係中環黎講真係好抵架啦。兩個朋友都話好好食，下次一定會再黎幫襯!!!

佢地啲雲吞麵真係好正, 又平, 16元一大碗, 加油菜就要加7元, 豆漿2元杯, 响中環嚟講已經係好平架啦! 佢啲雲吞好多蝦, 好好味, 但啲麵就硬左少少咁囉, 做嘢太急啦, 加上佢地方唔大, 有時真係坐得唔係太舒服 ... 所以好多時都叫外賣, 啲麵返到公司就差唔到啦~佢啲墨魚丸都好好味架~

因為中環Page 1結業大減價,我打書釘打到1:45先去食lunch.貪快選擇左發記.一坐低就叫左牛腩墨魚丸粉,炸魚皮,油菜同豆漿,唔夠10秒阿姐已經放晒係我面前,勁!講番d牛腩牛筋,真係夠晒腍,腩汁很濃很香.墨魚丸反而冇以前咁好食,雖然好大粒,但係唔彈牙同好勁粉質,有d失望,因為以前食過係好爽口家!環境係污遭唔舒服家喇,但係咁多野食都係收你$36,勝在平又飽肚!家下乜都咁貴,仲想點?

想起之前係中環番暑期工, 有時得15分鐘tea time都會走過黎食碗雲吞水餃面一入到去就可以同個廚師講要咩要咩, 好家庭feel~d伙計真係幾nice~~成日走過黎同我傾下計講番d雲吞, 真係冇得頂唔知佢係入面加左d咩, d雲吞可以香成咁, 又大大粒, 真係食到上哂癮~~可惜彈牙程度就不及沾仔記喇...

忙到飛起，跟同事求求其的一餐午餐，想吃碗麵，三多滿座，麥歪亦然，而沾仔又當然的排到出路口，想起這裡也是選擇，沿石板街下來，果然有位。正值午市，店內當然風捲殘雲的，落單快，食得要快，埋單當然不要慢。要了一碗雲吞麵，上湯菜及熱咖啡。湯滿滿的，麵當然不會帶爽勁，是有點兒韌韌的，製作時間不能多，急就章的上檯，當然咬口就遜色，而麵本身的質數也是關鍵。不過15蚊一碗的麵碼，沒苛求的了；雲吞不是巨型裝的，但也結結實實的塞滿了蝦，喜歡吃蝦的，一定不會失望；難得的湯底有一點點的甜味，也是羅漢果嗎？湯通菜也是爽脆嫩綠，大大碗連湯的，只收6蚊，抵食；見熱咖啡只需加4蚊，又要了，可惜是開粉的，不好喝。埋單25蚊，已吃得飽飽，難怪其門如市。題外話：也想不到這裡也收最低消費的，盛惠5個大洋。真想不明，會有人可以在個環境，好意思齋坐不叫食物的嗎？