熊貓薈

营业中

休息中

未入過去這間餐廳。內在環境好似置身在竹林。我點咗個越式扎肉湯米線及黑芝麻熊貓包。總價$175。個扎肉湯米線彈牙爽口。好重越式風味。個黑芝麻熊貓包好味。微温，入口美味。黑芝麻帶點小甜。成間餐廳造型好似竹林。令食客感到自己置身係熊貓館中。個人誠意推介。

去得海洋公園萬豪酒店Staycation,緊係去埋海洋公園玩，我哋有季票，又入去行一個圈。自助早餐食得好飽。午餐去熊貓薈叫兩個餐，一家人食就得。熊貓薈係園內唯一室內有冷氣，而又無加一收費嘅餐廳，因為佢算係園內嘅快餐店。環境算大，座位都多，又夠光猛，店員清潔得好快。無骨海南雞髀飯配老火靚湯及中國茶個餐份量算多，海南雞夠滑嫩，加埋食海南雞既三寶醬食，好夾，但黃油雞飯唔夠香，不過飯質都算粒粒分明。台式牛肉湯米線個餐份量算多，爽滑彈牙，牛肉夠淋，但唔夠入味，不過不失！

一家大細去海洋公園，玩咗一陣，想坐低唞吓，順便提早食晏，免得人多。入咗呢間熊貓薈，叫兒童餐、叉燒飯跟肉燥時蔬、紅燒川味牛腩飯、新豬肉餅飯、白灼時蔬、四川口水雞翼、黑芝麻熊貓包，等等。咁多樣食物中，叉燒同口水雞翼比較好味；紅燒川味牛腩都好香，又夠腍；白灼菜心正常。兩個兒童餐都俾少咗布甸，味道OK，小朋友都食晒。熊貓包個樣爛面，有點恐怖，好少麻蓉，似食饅頭。新豬肉餅太腍，冇咩味。值得一讚係場地夠大，座位唔太迫，職員收拾得快，算幾乾淨。如果坐近窗口，望出去園內風景都好靚。

去過咁多次海洋公園都冇食過依間餐廳，機緣巧合下去咗熊貓餐廳食飯🧐 雖然佢係熊貓主題餐廳，但係個裝修冇乜熊貓元素😂 只係喺熊貓館隔離🐼-去主題樂園食飯都係為求填飽個肚，食物質素不過不失就可以🤭佢全部飯都用個竹葉造型嘅器皿裝住都幾得意😎-我叫咗個最唔會伏嘅川味牛腩飯，有辣椒做調味，差極有限🥸點知真係淨係食到辣同埋好油😂但係牛腩有好多件，飯都大大碗，都叫做到不過不失🤔不過下次嚟唔會再食🙌🏻

今天一家三口去了海洋公園遊玩，玩十二I威威天地後，我們來了附近的熊貓薈吃午餐。暫時在數個海洋公園的餐廳吃都發現每個餐廳的食物款式都比較少，但大家當然可以選擇不同的餐廳吃不同特式的食物。熊貓薈有川菜，也有台式食品，食物都用竹子造型的餐具盛載，別具心思。🥢迷你臺南肉燥蛋飯🍚雖然說是迷你，但無論是肉燥還是飯的分量都相當多。豬肉汁經伴炒後香氣釋出，配上香菇，口感豐富，送飯一流！🥢黑芝麻熊貓包🥯本人對中式包不算太喜愛，而熊貓🐼的造型成功吸引孩子，孩子點名要求要吃這個包。我本身沒有品嚐它的味道，但孩子一口氣吃了兩個，可見味道不太差😆。

海洋公園內有多間餐廳，記得上次去熊貓薈，味道唔錯，所以就再去一次。環境照舊係整潔，枱與與之間都分得開，疫情下食得安心。到食物方面，叫二2個燒味飯，1個兒童餐，外加一個熊貓包包。 呢度要先比錢買飛，再攞食物。賣相可以。但食落，真係意想不到，全部野都係唔熱既。飯硬又唔熱，最慘係個熊貓包包，芝麻餡，誰知識又係凍既。反而個兒童餐係最好食。 雖然黎得主題樂園係預咗唔平又唔會好2高質，但都估唔到會係咁。 不推介。可試其他餐廳。

海洋公園：熊貓薈 (黃竹坑)又到星期五～ 返工有無返到黑眼圈出晒黎好似🐼咁？介紹番海洋公園熊貓薈餐廳有一款可愛的熊貓🐼造型中式包，一「籠」3個，餡料是黑芝麻～ 賣相可愛，用仿竹葉🎋🎋造型器皿盛載🐼👍🏻 味道正常，不過可以蒸得再熱一點😋😋地址： 黃竹坑海洋公園海濱樂園亞洲動物天地

原來海洋公園全年證有四間餐廳既有主菜 有買一送一優惠 其中一間是熊貓薈🐼 但兒童餐就不包本身$140一個餐 對主題公園來說 價錢算係咁 但現在買一送一$140食2個餐 即刻覺得好扺😂我地選左2個燒味雙拼餐 第一個是叉燒併雞 第二個是燒鴨併油雞 個餐包飯 包個菜 但就無野飲 叉燒雖然有點黑 但味道唔錯 甜甜地 但燒鴨同雞就一般般 我地今日12:43左右到 早15分鐘已在 The GULU 取票 去到仲有3張票 但都等左20分鐘先可以入座 不過星期日其實周圍都多人 自己買票 自己取餐 但如果價錢差不多 可能都是選灣景餐廳 開心點 因為起碼有海景睇😬

主題樂園出名餐廳嘅食物會比較貴 而質素平平 所以通常都出去食 或者食咗先入去但由於揀咗入住酒店 當然想玩完 方方便便食埋番去休息。本身其實好surprised 因為熊貓薈本身要有join 會員先有折 加上平時要打電話訂位係咩都無嘅情況下入到去 覺得好負碌好開心 好快就入座添 （因為近聖誕幾日 以為實喺好full）點知入到去啲野食選擇好少 樣樣野啲質素都麻麻地 無咩令人讚歎或深刻嘅地方叫就叫做自助餐 但無刺身無壽司嘅自助晚餐 覺得有啲辜負咗個價錢⋯呢啲都算 佢哋啲職員大部份都nice 嘅 但因為我拎完一轉野食 個staff 黎問我哋口唔口渴 要唔要野食 講咗幾種果汁 好喇 揀咗 飲飲吓 我發現佢張枱有張卡 有行超細嘅字話野飲另外收費 一枝50 蚊 嘩 個staff 無提過 個陣我哋都飲緊再check 番張單 再發現呢extra 嘅 100蚊 又唔係特別好飲 我寧願番酒店叫野飲⋯

前排去海洋公園，因為太肚餓所以想先食野再去玩，就近入場方便既熊貓薈食野，嗌左個精選套餐試一試，旅遊地點價錢少不免會貴少少，不過份量好足，唔係得個少少😚壹南肉燥蛋飯配果汁及芒果啫喱好味道😋😋😋肉燥飯不過不失，份量就非常足夠，食得夠飽可以有力氣係公園裡面玩🤗不過估唔到飲品係果汁，有啲喜出望外，係啲新鮮果汁，完全係好refreshing😋🌟個啫喱就係啲即食包裝個種，有啲化學味，成個餐係旅遊區黎講有主菜，飲品同甜品都算係咁👻

萬聖節的海洋公園有好多限定美食，中午睇完驚嚇血獄節目，當然要食返一萌爆的Line Frends主題美食中和一下嚇破膽的弱小心靈，呢個便當好啱小朋友食，已經色彩繽紛，有營養又健康。大人食都夠晒飽～BROWN & FRIENDS 開心哈囉喂便當 $228呢個價錢係主題樂園食限定套餐我覺唔算太貴。整個便當最特別的是盛滿蔬菜的小南瓜，配上酸酸甜甜的菠蘿咕嚕海鮮，及可愛度爆燈的 SALLY 造型芒果慕絲！而我覺得最有驚喜係個咕嚕海鮮，個咕嚕汁酸味剛剛好，海鮮又有蝦，帶子，青口，每樣兩大粒，加返個炒飯，唔洗15分鐘食清光～但杯野飲就麻麻地，佢話係芒果汁加橙啫哩，但飲落勁淡，又唔似芒果味，啫哩係大菜糕質地，加埋一齊感覺不良好...

今日去海洋公園玩，入去無耐就夠鐘要帶小朋友食飯，今日仲要落好大雨。見到好多間餐廳都係係室外。最後我地見哩間少人所以就入左去食，帶小朋右出去食飯好麻煩，因為佢地要食粥，唔係食餐廳野。加上哩間有bb椅又地方夠大，唔怕小朋友整跌人地東西。我地行哂成間樂園覺得我地選的無錯。講番d野食，味道都唔錯。只係偏貴，但都算坐得舒服。d飯望好似好多，但其實得好少，因為d竹桶厚。其實繼續行，樂園係有其他餐廳比哩間平易，如果想坐得舒服就最好係哩間。食完個餐，仲可以免費攞一個雪糕食。

估唔到有日會係海狗公園餐廳食嘢，平時都係坐岀邊是但買d熱狗，炸雞，薯條算，事關幾個朋友扮青春，買咗annual pass, 拎到買一送一下午茶，無論點都用埋佢啦🤪🤪！是日下午茶係燒味米線，附送果汁and 雪糕！味道就一定唔高期待啦，不過都要話雖則普通，但都超過預期，係above average 嘅！同埋份量好大，當午餐都夠飽，仲要服務幾好，唔知係咪無咩人幫襯🤣，竟然可叫雞胸鴨胸，食完都幾滿足！不過講番轉頭，咁嘅價錢一個燒味米線，如果唔係有買一送一，好難幫襯得落！

去得本地樂園都預左食野不菲，不過想要食飽都唔易嫁熊貓薈嘅餐可謂份量十足～味道唔錯～兒童餐簡直豐富差在未送埋波波，味道真係唔差的～不過甜點就麻麻，芒果布甸好假，餅乾太甜，但樣子可愛～但小朋友食得開心，照食可也燒味套餐要一讚因為叉燒係梅頭，雞係雞肶黎天賜嘅機會都比我遇到，所以點都要寫返篇食評讚嘆下不過同樣杯朱古力好太好味，睇黎甜品方面真係唔太適合我～跟餐重有杯haagen dazs送樣貌協會比熊貓包吸引左不過如果佢唔係芝麻饀係蓮蓉饀就好啦～

喺熊貓館隔離呢間熊貓薈快餐係食中菜嘅🐼 盛載飯餸嘅碗碟都係竹型好搞笑🤣🤣🤣紅燒川味牛腩配絲苗飯 $165配芒果布甸甜品成個套餐份量充足，飽到飛起😂😂😂喺主題公園嚟計，價錢都話還可以接受。 燒味單拼套餐 -- 單拼 $150 (只限叉燒/切雞) / 雙拼 $160 (可以選擇燒鴨/切雞/叉燒)送haagen dazs雪糕 (雲呢拿或朱古力味)原本睇menu燒鴨冇得買單拼， 不過唔知係咪因為叉燒賣曬，所以佢都照畀我嗌燒鴨🙈同樣份量好多，係平時出面食燒味飯嘅兩倍 !! 仲配埋油菜同雪糕 ，算唔錯啦👍👍