当日下午，女友forward一个blog比我睇，讲到一间座落喺西九龙中心嘅小食店。文章系咁形容：「在此我得强调，小店卖的不是甚么惊世美食，纯日式家庭风，胜在口味正宗。」有啲吸引，再睇埋落去：「纯鄙人猜测，多半是小夫妻在港想搞些小生意，被无良之士「昆」去这个「地茂」商场；异乡人在港生活不易为，纯粹是希望能帮他们一把，在这小部落格宣传一下。」系咪真系咁折堕？又值唔值得支持吓呢？呢一大堆疑团，推动到我同女友要去「会一会佢」。去嘅时候已经系下昼四五点，女友未食晏，特别肚饿。揾咗几揾，终于揾到呢档唔起眼嘅小店。但系原先间「浪漫满屋」呢？好似都系个位㖞，女友都未食过就已经执咗，有啲可惜。坐底咗之后望入去，见到只有一个男人踎喺地下整紧嘢，相信佢就系「事头」，而「事头婆」就唔喺度。我哋望咗几望个中日夹杂嘅餐牌，就决定点一份牛肉乌冬餐（我食）同一份吉列猪扒乌冬，另外blogger极力推介嘅十蚊三件炸鸡，觉得唔够喉，所以叫廿蚊四件嘅南蛮炸鸡。堆到柜枱，「事头」就以唔咸唔淡嘅广东话帮我落单同覆核一次我嘅落单，系feel到日本人嘅认真一面。比咗个牌仔我哋，讲明要等廿分钟，我哋一路倾住偈一路望住佢整，其间听到又切又拍又炸咁，乜声都有，一个期待会出啲咩比我哋食嘅心态就浮咗上面。答案揭盅一半。冇人会谂到喺呢啲地踎商场会食到啲港式包装，日式风味嘅日本菜啰。只系佢个嘅绿茶包，暂时未见过香港有，知道会有啲卧虎藏龙feel。另一半呢？炸鸡未炸，比住一半我哋食先，所以一路食一路听到斩嘢声咁油镬声。先嚟个牛肉乌冬，牛肉其实唔太大特别，吉野家实好食过佢，但家庭式煮法，佢都算易咬得开，而且又有少少牛肉味。重点落咗喺碗汤度，系啲鲜甜汤底，落咗几粒冬菇吊吓味咁，𠮶种鲜甜到好似饮面豉汤咁嘅味道，而唔系清到水鬼尿或者咸到落味精咁。唔系个发泡胶兜，真系唔觉自己喺food court食紧乌冬。再讲，出面街加十几蚊比咗「半熟蛋」，真系一半烚熟同一半生，好呃秤；而呢只蛋真系外面熟里面生，笃穿佢做蛋花汤咁饮，一啲都唔欺场，而且饮汤𠮶阵重多咗一重食蛋花嘅口感出嚟，都系卖$35连嘢饮，你话有冇搞错！吉列猪扒乌冬系女友点嘅。猪扒同乌冬分开载，猪扒下低用洋葱垫底，睇落对办。咬落去实系不得了，外脆内软，而且唔系炸到干晒水，依然好Juicy好松化，而唔系实的的好似咬极都咬唔开咁。外面沾咗层蛋，食落食有埋蛋香。呢件猪扒喺箱根食，￥1000；喺丼丼屋食堂食，$50走唔甩；喺呢度食，廿几卅蚊咋，重要大家同level咁计㖞。我开始明白个blogger点解会话店主比人「昆」咗嚟呢度。但反而觉得佢哋小本生意，资金唔多，呢度租金又平，作为佢哋嘅「试金石」就啱啱好。只系欠缺宣传，实在要靠口碑推广。等炸鸡其间观察，唔多人帮衬呢档，尤其系深水埗多以老街坊打趸为主。我哋之后，有对后生情侣买咗份炸鸡，同埋有个日本家庭应该同店主好熟落，推住BB车都要去同店主吹水。唔系有呢档，西九龙中心真系揾个日本人行街都冇。呢份南蛮炸鸡作结尾可以话系为成件事画上一个完美嘅句号。廿蚊，苛求啲咩？即炸，鸡蛋酱，炸到咁Juicy，脆卜卜，鸡肉又够嫰，又够香，味道啱啱好咁鲜甜味，好味到一人食晒四件都得。己经系非笔墨所形容，要亲自去食先知！我哋有谂过南蛮炸鸡好味，要唔要试埋普通炸鸡，不过小吃多滋味，最后都冇咁做。而且得「事头」一个做，一等又廿分钟就免啦，所以留返下次先食。呢间小店，炸嘢做得特别出色，相信凭住口碑，可以创出一返新景象，冲出food court。…查看更多
