潮龍園

营业中

休息中

今日去咗間同事介紹食粉麵嘅餐廳，同🤴🏻試試先！😙😙～～～牛丸+墨丸幼麵～～～牛丸同墨丸各三粒，牛丸好有彈性咬開亦好多汁水，好耐未試過咁有牛味嘅牛丸啊😁😁，而墨丸要咬多幾口個墨魚味先至出嚟，味道都唔錯！～～～牛筋牛腩米粉～～～🤴🏻覺得米粉唔夠爽，湯味淡，不過牛腩好食，牛筋就一般！🤨🤨～～～香脆炸帶骨魚皮～～～店員極力推薦，上枱係已經用袋包好，第一口會覺得非常之硬，新鮮冇餿味，會另外上碗湯俾我哋浸淋先嚟食，我同🤴🏻都鍾意浸腍咗先食！😙😙～～～腐乳通菜～～～通菜新鮮，可惜腐乳唔夠味！😐😐🤴🏻話第日再帶我去第二間仲好食嘅！😆😆

#chuchu食在荃灣📍 潮龍園又去食糧尾恩物！平靚正！流水式客人，姐姐真係未停過手，仲要好多外賣單！💡 門口位都有生雲吞水餃魚蛋嗰啲賣，凍冰冰可以買翻屋企打邊爐！—————————————————————❣️牛肚粗 $34牛什係呢度嘅名物，🐷媽見到隔離姨姨食就話要一樣！牛肚有金錢肚同草肚，好嫩容易咬，啖啖都有牛香！湯底仲會有腩汁！.❣️韮菜餃炸醬麵 $30+$8炸醬麵，撈下撈下，個汁唔會太咸，有啲肉絲！有碗湯跟，有兩粒韮菜餃都放係到，個皮都幾滑，韮菜餡都幾多！個湯底有好香嘅胡椒味，可以暖下胃！.❣️生菜 $12一碟菜先$12真係抵到爛！不過嗰日冇通菜，應該唔當做！有生菜、菜心、芥蘭，🐷就唔鐘意食蠔油，所以轉左腩汁！.❣️飲品 +$8凍熱飲品一律+8蚊！.💬 因為小店撘枱就一定架喇，不過唔洗擔心都會有翻塊夾版嘅！—————————————————————不專業評分👅好味指數: 7/10 💰性價比: 9/10👍🏻推薦: 8/10 —————————————————————🏡地址: 潮龍園 (荃灣)荃灣荃灣街市街47號地舖👉🏻太子元朗藍田都有分店！🕑營業時間: 07:00-01:00

潮龍園上次喺元朗食完潮龍園，經開荃灣突然牛腩引發作，知道荃灣都有一間分店，就一於入去食！呢間荃灣分店都一樣門口有一級，輪椅人士如果想入去食就要自備斜板，店員阿姐好好人，幫我勸其他食呀調去其他座位，騰空方便位置畀我坐，阿姐好掂！1.崩沙牛腩幼麵$50+凍咖啡$6（9/10）上次去元朗分店食唔到崩沙牛腩，今次誓死要食返，崩沙腩非常入味，牛味香濃，肉質又軟淋，食牛當然要食崩沙腩，今次成碗入面都有成六舊崩沙腩，幼麵好食，腩汁湯底唔鹹，真係好正！凍咖啡：奶味偏多，咖啡偏酸少少！2.爽滑牛丸幼麵$34+凍檸茶$6（9.5/10）呢個爽滑牛丸幼麵入面有四粒好彈牙好有牛味嘅牛丸，，幼麵好食，腩汁湯底唔鹹，真係好正！凍檸茶：呢杯凍檸茶入面有4片檸檬，唔會好甜，好飲！3.炸魚皮$15（7/10）唔知係唔係影相影得耐，炸魚皮無咁脆，淋咗少少，無咁好食！2人總共價錢$111個人口味總評分：8.5/10地址：荃灣荃灣街市街47號地舖Please follow me🙆‍♂️ @wheelchaireatinhongkong 如果鍾意我嘅分享，麻煩請follow我，仲有記得Like同Share！🙏🏻🙇🏻‍♂️#潮龍園

我今日去荃灣辦事，順道約同好友一同去位於荃灣街市街47號地舖的潮龍園食馳名的潮汕粉麵。潮龍園是用傳統茶餐廳的裝修佈局，有卡座和方檯的設備，可算坐得舒服。我點左個五香牛雜河粉$34，好友點左個崩沙牛腩幼麵$50，餐飲係熱咖啡$14。五香牛雜有牛肚、牛蒡、牛腸等，牛雜炆得軟腍入味，好味又好食，河粉軟糯好食。崩沙牛腩煮得好入味，牛味香濃及有咬囗，幼麵爽口好食。熱咖啡香濃好飲。整體黎講係有水準的牛腩美食。

又到糧尾，唔想頹食兩餸飯，我一定嚟呢間～粉麵都係30令蚊，我哋仲點多碟菜、小食同埋嘢飲，承惠唔使100蚊！！！五香牛雜湯粉 $34牛雜每樣兩件，好有牛味，湯都濃郁，河粉好大兜，淨食呢碗我都夠晒飽！鮮蝦餃麵 $30餃好大隻，皮好薄，除左有鮮蝦，仲有木耳，都幾爽脆，都係30蚊，抵食！酥炸魚皮 $15估唔到炸魚皮成座山咁多，炸得酥脆之餘，又唔油膩腐魚通菜 隨餐+$12通菜都幾新鮮爽口，仲要腐乳畀得幾足，平時冇乜食菜，呢餐有菜真係加分最後，嚟返杯凍檸菜少甜（隨餐+$8），野食咁豐富，都唔使一舊水，真係糧尾恩物呀！

服務員態度真的是超級惡劣, 慢了點餐就會催促你, 還沒吃完剛放下筷子聊天, 回頭食物已經被收了, 問一聲吃完未也不行嗎？想翻枱多賺點錢是很正常, 但是客人來吃東西不是要包括受氣的吧

因為屋企仲有啲野細執…所以同爸爸黎食個快早餐再去五金街買料🤡食物崩沙腩河呢個真係必食推介！佢炆到啲牛腩好冧🥳好香嘅牛肉味！啲腩汁勁入味🎊河粉好滑～又軟熟！牛筋米原本諗住嗌牛坑腩試，落單個姨姨話其實一樣位，不如試吓其他，我哋就嗌咗牛筋試～條條牛筋都好大碌！🤡好冧好似啫喱咁辣椒油呢個一定係靈魂黎🤫因為我加咗2滴，唔會好辣，但香勁多！熱朱古力今日得10度，食牛加熱朱古力即刻暖咗好多佢呢個嘅熱朱古力好濃，好香朱古力味🤩完全唔使加糖其他呢度好多人等位，所以上餐都好快！呢度好多都應該係街坊食開，佢哋點餐、傾偈、講笑個種感覺，同茶樓好似，好舊式人情味嘅感覺

自從有一次經過荃灣亂入食過魚蛋河，之後要食粉面就諗起呢間啦！最鍾意呢度嘅魚蛋河加腩汁，係又大粒又有魚味嘅魚蛋🤫😂，就算清湯都OK架。呢度嘅牛腩（特別想講吓，好林好嫩，係一啲牛腩麻麻哋好食嘅部位佢哋都整得幾好，唔會實的的），鮮牛肉，豬肉丸，雲吞都係重料，性價比幾高的。

來香港食港式地道粉麵，一定要來潮龍園，抵食好味又夠飽肚，絕對係香港人飯堂首選。潮龍園係香港地道粉麵店，分店都有好多間，今次咁岩係荃灣簡單食一餐，水準保證一定要來潮龍園。鍾意食牛肉既，一定要食佢既柱侯牛腩麵🍜，一碗幼麵，麵的口感煙韌，柱侯牛腩色澤夠飽滿，肉質肥瘦均勻，見到都流曬口水。湯同麵係分開上，唔洗怕索水，牛腩真係好夠味，滿足到口感及味蕾，真心好好食，另外跟餐點左杯凍飲，埋單都唔洗$50， 超抵晚餐。

喺荃灣街市附近🛒，有好多唔同嘅嘢食，今次我哋就揀咗嚟食粉麵🍜。呢度價錢真係好抵食💰，一人一碗已經食得夠飽💕，都只係三四十蚊。.🌱靚韭菜餃河($30)呢個價錢真係超級親民💰，而且佢啲韭菜餃都好足料、脹卜卜😍。一咬落去滿滿嘅韭菜香味👅，裏面韭菜嘅比例好多，好滿足。而且河粉湯底仲有蔥同埋炸蒜🧄，唔使落辣椒油已經好香口💕。.🐮五香牛雜河($34)腩汁湯底好濃郁🥘，仲食到有啲花生嘅香味🥜。牛雜嘅口感都好好，有啲軟香有咬口🤤，有啲爽口入味🤩，呢個價錢都試勻晒唔同嘅牛腩部位✌🏻，住附近嘅朋友值得試下。

今日一點去食午餐唔知想食咩，經過荃灣見到一間粉麵店好多人等位，咁應該好味，就排隊，一個人好快就有位。雖然座位有啲迫，不過食物水準不錯。四寶麵配凍檸茶四寶麵有招牌魚蛋，爽口👍🏻有魚皮鮫， 一般墨魚丸同貢丸，真心，好味，彈牙最重要係個湯底有胡椒同蒜香味值得再去食多次。見隔離枱牛雜麵，對面位 崩沙腩麵全部都好吸引，下次一定要試晒佢特別之處係有客人叫蝦棗麵，我都未食過，下次都要試埋，整體來講食物質素係好嘅，只係座位太迫，下次唔好食飯時間去，早啲或者晏啲去，唔使等位又唔使迫人。😊

崩沙腩麵 ($48) + 牛筋米 ($33) + 腐乳通菜 ($12/叫粉麵加配價) + 凍檸檬茶 ($8/叫粉麵加配價) ★－:+:－:+:－:+:－:+:－:+:－:+:－:+:－:+:－★​之前嚟過一次，今晚路過再食😀先講地點佢係方便嘅，喺正巴士總站前，其次收凌晨一點，夜歸元朗友醫肚有着落💙上次叫崩沙腩但賣哂改食牛腩，今晚有崩沙腩，梗叫啦！普通牛腩$33，崩沙腩$48，一分錢一分貨永遠定律嚟，貴$15蚊嘅差別係崩沙腩牛味濃好多，腩中帶筋，筋肉軟腍，入口冇渣，幾好；五香味適中，食完一個鐘都唔洗追水飲，講份量$48亦交足貨😀朋友碗牛筋米正常發揮，冇特別好特別差；通菜爽冇渣，腐乳落得大方，OK的👌🏻

🔸 五香牛雜河   $34荃灣街市街有間好出名嘅潮汕小店，有正宗潮州手打牛丸同埋 鮮甜蝦棗蝦棗賣，所以特登走入去荃灣打算外賣返做餸，買完 想到潮州美食就肚餓，入去食碗下午茶粉麵。食一大碗美味嘅牛雜河都 只係三十幾蚊，抵食夾大件😚  牛雜樣樣畀齊，做得香口惹味又唔會好咸。味道：7/10性價比：7/10🔸 崩沙牛腩河   $48崩沙牛腩係牛肉中比較肥嘅腩肉部位，呢間潮州舖將啲崩沙腩炆得好淋，而且好有牛腩味好肥美，唔會為咗食牛腩就咬得好辛苦，而且啲牛腩本身已經醃得有味唔使再填蘸啲乜嘢都已經幾好食。河粉就係正宗潮州河粉，幼幼哋厚厚哋，好滑好爽口，可惜就沒有提供魚露蘸，不過亦都可以填蘸呢度啲辣椒油，都幾勁辣。味道：7/10性價比：7/10

荃灣潮龍園喺荃灣街市隔離，位置方便， 夜晚八點幾去到都好多人喺入面食 。我哋叫咗崩沙牛腩48蚊同 柱侯牛腩34蚊，想睇下有咩分別，另外仲叫咗份腐乳通菜同嘢飲。腐乳通菜先到，原來係通菜苗黎，細細棵好新鮮，而且份量好足，腐乳又好食。👍🏻崩沙牛腩麵d牛十分軟熟，牛味十足，肥瘦適中，再加埋腩汁真係超級好食！而個麵質好有彈性，好食！柱侯牛腩河就比較有咬口，都好有牛味，而個河粉的份量都十分多，食完超飽！滿足！飲品叫左豆漿同檸檬茶，豆漿係枝裝的，而檸檬茶大大杯，好飲👍🏻

荃灣係高密度人口嘅地區, 租唔會太平, 但竟然比我搵到間$30-$40就食到嘅潮州米粉店, 仲要好好味又大份, 感動! 崩沙牛腩米食牛腩米最緊要食過滿足感, 而崩沙牛腩係普通牛腩嘅進階版, 平時喺銅鑼灣灣仔食嘅話都要$70-80, 份量都係偏小, 呢間舖有成6舊大大份, 入口即溶好好味. 蔥花夠香湯底濃爽滑牛筋米牛筋好林, 好有骨膠原感, 湯底蔥花配搭一樣, 都值得推介