潮隆泰 (已結業)

依間魚蛋皇食過幾次....雖然環境一般, 裝修是普通茶記的裝修...也坐得比較迫,其他食物普通...但牛腩整得相當有水準...而且招呼有禮！等候時間合理,唔會話等好耐！今日中午叫了個牛腩河同腐乳通菜！牛腩肥瘦適中，入味又唔韌，份量唔少，起碼有六七舊！牛筋軟淋，入口即溶！其實夾起嗰陣時已經感覺到好淋。湯底加了腩汁，有濃郁鮮甜的牛味~~河粉吸收了腩汁超好味呀！食完意猶未盡！腐乳通菜啲通菜夠翠綠同新鮮、咬落爽口！腐乳醬份量又啱啱好！

其實每朝返工經過呢間鋪果陣, 都聞到好香. 心成日想入去試下, 終於今日Lunch time走嚟試~~都好多選擇,最後要了牛筋河同油菜...牛筋河，炆得入味，又有膠質柱候牛腩醬夠入味、份量十足。河粉選用較細既河粉，相當滑溜！湯偏咸及重口,可能過多腩汁！倘若愛辣之人記得要落辣椒醬，味道會加分啊！油菜係腐乳通菜, 腐乳適量通菜爽口嫩綠！賣相得入口亦掂~午市時候雖然要搭枱,四十零蚊已經食得好開心,完全冇壓力｡雖然地方唔係好大,環境我覺得接受到~

性價比超高的一間潮州粉麵館。疫情期間任何粉麵加10元可以送油菜和飲品實在超划算，所以進來試試。點了最基本的雲吞麵+腐乳通菜+熱齋啡才38元。性價比爆棚。不過老實話雲吞麵做得一般般。雲吞粒比較小，湯底也不是正宗雲吞麵湯底。不過味道還是可以的。再加上這個價錢你實在不能要求太多。腐乳通菜還可以，只嫌腐乳醬實在放得太多太咸。反而我最欣賞是那杯熱咖啡😂這裡裝修算是乾淨。服務屬於正常水平整體不過不失。想便宜點吃一頓的話是值得推薦。

前兩日同同事去左位於灣仔嘅潮隆泰食晏, 之前同事試過呢間餐廳, 話lunch幾抵食大食妹一於去睇一睇<京都炸醬麵>大食妹嗌左份炸醬麵, 份量唔會話好大, 但炸醬幾足料甜甜嘅炸醬撈麵食味道唔錯仲有送湯, 俾你食落唔會覺得太乾加多10蚊仲可以跟菜同飲品, 大食妹揀左通菜腐乳太多, 有啲太咸, 建議大家叫腐乳另上, 咁咸度就可以自己調整<凍檸茶>凍檸茶味道standard, 不過不失Overall, 42蚊可以食到咁多野, 潮隆泰嘅性價比可以話係above average

公司附近的潮式粉麵店，本身已經算抵食，最近推出抗疫價，加10蚊有油菜同飲品！食咗墨丸河，墨丸做得唔錯，算係彈牙，唔會好似食緊一團麵粉咁樣！佢地用嘅係較幼身嘅河粉，食落夠滑身，亦唔會一夾就斷，比好多粉麵店出色！加咗一碟通菜，睇得出呢個腐乳汁係有誠意嘅，色澤金黃油潤，舖滿在菜面，食住啖啖沾滿腐乳嘅通菜，都幾有滿足感！附帶一提潮隆泰嘅辣椒油做得出色，辣得嚟夠香，亦無一般潮洲辣椒油咁咸，為碗麵加分不少。總體而言，潮隆泰性價比高，環境乾淨衛生，服務都唔錯，會繼續成為我同同事嘅飯堂！

平時返工放工成日經過見到已經想試架喇，今日一支公冇飯食就醒起可以去哩度試一試～收工六點幾七點，間舖唔算多人，因為啲檯唔會排到好逼，所以靜靜地咁係坐得幾舒服。地方都算乾淨企理。放檯面玻璃底嘅餐牌圖文並茂，好清楚話你知有啲咩嘢食👍🏼我叫左個爽滑牛筋麵（$30）+芥蘭（$10）。份量對我黎講啱啱好，牛筋都算多，我個人係比較鍾意食林啲似啫喱果種，咁碗麵除左有’啫喱‘牛筋，亦有爽口彈牙嘅牛筋，一次過可以享受唔同口感而有好入味嘅牛筋😋😋 麵質彈牙，湯底都唔錯，唔似啲重味精嘅湯。碟蠔油芥蘭其實都冇咩嘢可以出錯。麵同菜加埋$40埋單相當實惠，連夜晚食都係哩個價，我覺得超抵😃👍🏼

今日去灣仔睇醫生，睇完就喺診所附近搵嘢食。老公帶咗我去呢間餐廳，話之前去食過一兩次，覺得啲牛丸好好味，又話其他嘢都唔錯，叫我試吓。我一睇完餐牌，即刻嗌我最鍾意嘅崩沙腩、又叫咗腐乳通菜及牛丸湯。崩沙腩忟得又香又嫩滑、牛腩味好香，牛丸既彈口又多汁，一咬落去啲汁就彈出嚟，好正！夥計特登走過來同我地講，崩沙腩通常朝早就賣晒，好難得到下午時段仲有，話我地好好彩。因為牛丸實在太好味，食得兩粒實在唔夠喉，我哋特登叫多一份牛丸湯，過足口癮。呢間粉面店係家庭式經營，夥計好親切又有禮貌，地方同一般粉麵店一樣位置不是很大，以圓枱為主，但環境十分企理。

向店員要了崩沙腩河粉, 態度友善、湯味偏重、肉質彈牙有嚼勁亦有肉味。店員溫馨提示+１０蚊包野飲、解口渴又健康D。店内環境也算潔淨、亦不會太逼。衛生程度不差、桌面不會令人感到”痴笠笠”。$52包菜包野飲沒伏、返工或者住附近値得長期支持。

外面天氣熱，飯都唔想食，就食魚旦粉名字夠霸氣這店魚旦，魚餃，牛腩（可瘦/半肥瘦）等等丸類爽口彈牙，牛腩比較肥美，河粉超滑，麵爽甜麵不包飲品就另加8元，如果叫飯類就包飲品

到香港旅遊，其實本來是要到某間網友推的名店用餐，但人潮太多，於是路過潮隆泰，價錢便宜，又很好吃，再香港物價那麼高的環境，還可以有這樣平價又好吃的味道，ㄧ定要推薦ㄧ下！建議大家有去，可以吃看看哦！

今日放工回家途中，係等巴士嘅時候，突然有啲肚餓。唔想餓一程車先至有飯食，我決定喺附近食咗晚餐先返屋企。由於小店就係巴士站隔離，所以就走咗入去試吓。雖然係一間小店，不過都有好多食物種類可供選擇，有碟頭飯、有粉麵，仲有唔同嘅單點食物。小店嘅餐牌仲有每款食物嘅相片，最啱我呢啲鍾意睇公仔，唔鍾意睇字嘅懶鬼😜我叫咗一碗牛筋牛腩米，同凍檸茶少甜少冰。碗米粉好好味，我最欣賞就係佢夠多牛筋，平時有好多鋪頭，都只係俾一兩嚿，而且有好多鋪頭啲牛筋都偏硬，唔夠入味。呢間小店嘅牛筋炆得軟硬適中，好入味，我LIKE 👍🏻侍應姐姐都有記得我凍檸茶要少甜少冰嘅要求，我成杯飲晒杯，都唔覺得有太大罪惡感😜埋單都係成為40幾蚊，真係經濟又實惠。我肯定會再次嚟幫襯，支持灣仔區嘅小店！

原先諗住追到班巴士點知嚟到剛剛走咗，見到有一間粉面反正要等半個鐘就走入去食碗麵。叫咗一碗韭菜餃米粉同埋一碟油菜。佢個韭菜餃真係好好食，個皮夠薄，入面肉同韭菜嘅比例剛剛好。 都只係$25一碗，好抵食。

開既鋪頭。經過幾次。但因為都趕時間，所以都無幫襯過，今次特登過黎試下先。鋪頭細細。位並不多，得一張大圓臺。最多可以坐到6、7個人，因為都係新裝修完，所有野都好新正。門口打住25蚊起，咁平個價錢真係好親民。今日叫左佢地呢度既推介，崩沙腩河。都唔貴。因為佢個牛既份量都好足夠，但因為黎既比較夜，今日d河粉賣晒，就退而求其次。選擇米粉。上臺已經覺得好吸引。濃濃既湯底加上肥瘦適中既崩沙腩，再加上蔥既點綴。首先當然試下個湯得唔得。飲落口真係滿滿既牛腩味，鹹度適中。再黎食下崩沙腩，嗯，真係好有口感，咬落有沙沙既口感，故名為崩沙。but.我都係中意普通牛腩多d.米粉果然沒有河粉岩我胃口，因為我中意d粉面可吸收湯汁。另:炸魚皮個份量十足，而且店家仲會貼心咁送碗湯卑你點黎食。咁可以去左d油份與熱氣。外軟內酥既口感都唔錯噶，或者唔点湯就咁食又得。

第一次光顧小店,聽說朋友話湯底好味而且是新開張的，所以便來品嚐一下，進入了店舖面積不算很大，而且餐桌很細，環境尚算可以。還要說這裡的湯底真的很好，好像沒有放太多味精，飲了一整碗也不覺得口渴

前段時間見佢新開張，仲好快咁見到好多人幫襯，於是一試，果然不負期望，值得推介。門口櫥窗位有自家產品任君選擇可以買返屋企打邊爐，魚皮餃同牛丸都好好味。魚皮餃嘅材料好足，個潮式扎肉肥瘦肉嘅份量配搭得宜，經油炸更美味。其實我最鍾意嘅係個湯底，實試冇味精，次次食都係食到個碗乾乾淨淨。最後比大家觀摩下個乾淨嘅碗～朋友仔每次都會叫牛腩河，之前試過崩砂牛腩，不過朋友仔覺得啲筋會攝牙，反而覺得普通牛腩燜得淋啲啱食啲，各位可以因應自己喜好選擇。必點小食炸鮮蝦雲吞，入面落咗芝麻更香口。點埋個辣醬更惹味。必食推介非潮汕地區傳統小食炸魚皮莫屬，鬆脆可口，店家仲會奉送埋清湯比你浸浸佢，一種小食可以有兩種食法，令一餐普通嘅湯麵變得一點都唔簡單。